എല്ലാ ദിവസവും പലഹാരപൊതിയുമായി വരുന്ന മകൻ ഇനിയില്ല; ജോയിയുടെ വേര്‍പാടിൽ മനംതകര്‍ന്ന് അമ്മ
ജോയിയുടെ കുടുംബത്തിന് നല്‍കിയ നാല് ഉറപ്പുകള്‍ പാലിക്കപ്പെടണമെന്നാണ് പ്രതീക്ഷയെന്നും ജില്ലാ പഞ്ചായത്ത് അംഗം വിഎസ് ബിനു പറഞ്ഞു.
Followതിരുവനന്തപുരം: തിരുവനന്തപുരം നഗരത്തിലെ ആമയിഴഞ്ചാൻ തോട്ടില്‍ അകപ്പെട്ട് മരിച്ച ശുചീകരണ തൊഴിലാളി ജോയിയുടെ വേര്‍പാടിൽ മനംതകര്‍ന്ന് അമ്മ. എല്ലാ ദിവസവും പലഹാരപ്പൊതിയുമായി എത്തിയിരുന്ന മകനെയാണ് മെൽഹിക്ക് നഷ്ടമായത്. എത്ര ബുദ്ധിമുട്ടുള്ള സമയത്തും എന്ത് ജോലിയും ചെയ്തും ജോയി അമ്മയെ നോക്കിയിരുന്നു. അടച്ചുറപ്പുള്ള ഒരു വീടോ, വീട്ടിലേക്ക് ഒരു വഴിയോ പോലുമില്ലാത്ത ഒരു ദിവസക്കൂലിക്കാരന്‍റെ ജീവനാണ് അനാസ്ഥയിൽ കുരുങ്ങി നഷ്ടമായത്. ജോയിയുടെ അപകടവിവരം അറിഞ്ഞ നിമിഷം മുതൽ വീടിന്‍റെ മുൻവശത്തെ മുറിയിലെ സോഫയിൽ ഒറ്റയിരിപ്പായിരുന്നു അമ്മ മെൽഹി.
മകൻ തിരിച്ചുവരുമെന്ന ഉറപ്പോടെ പ്രാര്‍ഥനുമായി രണ്ട് പകലും രണ്ട് രാവും കഴിച്ചുകൂട്ടി. ആർക്കും ഒന്നും പറഞ്ഞ് ആശ്വസിപ്പിക്കാനാകാത്ര സങ്കടത്തിലായിരുന്നു മെല്‍ഹി. എന്നാല്‍, പ്രാര്‍ഥനകളും പ്രതീക്ഷകളുമെല്ലാം മൂന്നാം ദിനം വിഫലമായി. മൃതദേഹം വീട്ടുവളപ്പില്‍ സംസ്കരിക്കുമ്പോഴും സങ്കടമടക്കാനാകാതെ കരയുന്ന ജോയിയുടെ അമ്മയെ ആശ്വസിപ്പിക്കാനാകാതെ കൂടെയുള്ളവരും കുഴങ്ങി. ജോയിയുടെ സംസ്കാര ചടങ്ങുകള്‍ക്കുശേഷം തന്‍റെ പ്രിയപ്പെട്ട മകൻ നഷ്ടപ്പെട്ട വേദനക്കിടെയും മകനോടൊപ്പമുള്ള ഓര്‍മകള്‍ ആ അമ്മ പങ്കുവെച്ചു.
എല്ലാ ദിവസവും തനിക്ക് പലഹാര പൊതിയുമായി വരുമായിരുന്നുവെന്നും ഇനി അവൻ ഇല്ലെന്ന് ഓര്‍ക്കുമ്പോള്‍ സങ്കടം താങ്ങാനാകുന്നില്ലെന്നും അമ്മ പറഞ്ഞു. രക്ഷപ്പെടാൻ സ്ഥലം ഇല്ലാത്തതുകൊണ്ടാണ് ജോയി അപകടത്തില്‍പ്പെട്ടത്. അല്ലെങ്കില്‍ നീന്തി രക്ഷപ്പെടുമായിരുന്നു. എന്നെ പൊന്നുപോലെ നോക്കിയ മകനാമ്. അപകടസ്ഥലത്ത് അല്‍പം കൂടി സ്ഥലമുണ്ടായിരുന്നെങ്കില്‍ അവൻ നീന്തിരക്ഷപ്പെടുമായിരുന്നുവെന്ന് ഉറപ്പായിരുന്നു. എല്ലാ ജോലിക്കും പോകുമായിരുന്നുവെന്നും അമ്മ കണ്ണീരോടെ പറഞ്ഞു.
ദുർഘടമായ രക്ഷാപ്രവർത്തനമെന്ന് അറിഞ്ഞപ്പോഴും ബന്ധുക്കൾ പ്രതീക്ഷ കൈവിട്ടിരുന്നില്ല. മുമ്പും മരണത്തെ തോൽപിച്ച ജോയി ഇത്തവണയും തിരിച്ചുവരുമെന്ന് പ്രതീക്ഷിച്ചു. അപകടവിവരമറിഞ്ഞ ഉടൻ ജോയിയുടെ സഹോദരിമാരും മാരായിമുട്ടത്തെ വീട്ടിലേക്ക് എത്തിയിരുന്നു. രക്ഷാപ്രവര്‍ത്തകര്‍ അവര്‍ക്ക് കഴിയുന്നതിന്‍റെ പരമാവധി ചെയ്തുവെന്നും അതില്ലെല്ലാം പൂര്‍ണ തൃപ്തിയുണ്ടെന്നും ജോയിയുടെ സഹോദരന്‍റെ മകൻ ഷിജിൻ പറഞ്ഞു. നാല് ആവശ്യങ്ങളില്‍ ചര്‍ച്ച നടത്തിയിരുന്നുവെന്നും ഇതില്‍ എംഎല്‍എയും മേയറും ഉറപ്പ് നല്‍കിയിട്ടുണ്ടെന്നും ഷിജിൻ പറഞ്ഞു.
അതേസമയം, മാലിന്യം നീക്കം ചെയ്യാൻ കരാറെടുത്തയാള്‍ ഇതുവരെയും കുടുംബത്തെ ബന്ധപ്പെട്ടിട്ടില്ലെന്നും ഇവിടെ എത്തിയിട്ടില്ലെന്നും റെയില്‍വെയെ ഇക്കാര്യം അറിയിച്ചിട്ടും നടപടിയുണ്ടായിട്ടില്ലെന്നും ജില്ലാ പഞ്ചായത്ത് അംഗം വിഎസ്‍ബിനു പറഞ്ഞു. ജോയിയുടെ കുടുംബത്തിന് നല്‍കിയ നാല് ഉറപ്പുകള്‍ പാലിക്കപ്പെടണമെന്നാണ് പ്രതീക്ഷയെന്നും വിഎസ് ബിനു പറഞ്ഞു.
ജോയിയുടെ മാതാവിന് പത്തു ലക്ഷം രൂപയുടെ സാമ്പത്തിക സഹായം, വീട് നല്‍കണം, വീട്ടിലേക്കുള്ള വഴി ശരിയാക്കണം, ജോയിയുടെ ആശ്രിതനായ സഹോദരന്‍റെ മകന് നഗരസഭയോ റെയില്‍വെയോ ജോലി നല്‍കണം എന്നീ നാല് ആവശ്യങ്ങളിലാണ് സര്‍ക്കാര്‍ ഉറപ്പ് നല്‍കിയിട്ടുള്ളതെന്നും വിഎസ് ബിനു പറഞ്ഞു. മാരായമുട്ടത്തെ ജോയിയുടെ വീട്ടുവളപ്പിലായിരുന്നു ജോയിയുടെ സംസ്കാര ചടങ്ങുകള്‍. പോസ്റ്റ്‍മോർട്ടം നടപടികൾക്ക് ശേഷമാണ് മൃതദേഹം വീട്ടിലെത്തിച്ചത്. ഏറെ വികാര ഭരിതമായിരുന്നു ജോയിയുടെ വീട്ടില്‍ നിന്നുള്ള കാഴ്ച. അമ്മയുടെയും ബന്ധുക്കളുടെയും കരച്ചില്‍ ചുറ്റുമുള്ളവരുടെയും കണ്ണുകളെ ഈറനണിയിച്ചു. 48 മണിക്കൂർ നേരത്തെ തിരച്ചിലിനൊടുവിൽ ഇന്ന് രാവിലെ തകരപ്പറമ്പ് വഞ്ചിയൂർ റോ‍ഡിലെ കനാലിൽ നിന്നുമാണ് ജോയിയുടെ മൃതദേഹം കണ്ടെത്തിയത്.
കാണാതായ ശുചീകരണത്തൊഴിലാളി ജോയിയുടെ മൃതദേഹം കണ്ടെത്തി, തകരപറമ്പിന് പുറകിലെ കനാലിൽ പൊങ്ങി
