ഫാഫ്- കോലി സഖ്യം ആര്‍സിബിക്ക് പ്രതീക്ഷ; തിരിച്ചടികളില്‍ നിന്ന് കരകയറാന്‍ കൊല്‍ക്കത്ത- സാധ്യതാ ഇലവന്‍
ഈഡനില്‍ മുന്‍തൂക്കം ബാംഗ്ലൂരിന് തന്നെ. ബാറ്റിംഗിലും ബൗളിംഗിലും ശക്തരുടെ നിരയുണ്ട് ആര്‍സിബിക്ക്. വിരാട് കോലി, ഫാഫ് ഡുപ്ലസി ഓപ്പണിംഗ് സഖ്യം ഉജ്വല ഫോമില്‍. മുംബൈക്കെതിരെ 148 റണ്‍സാണ് ഇരുവരും ഒന്നാംവിക്കറ്റില്‍ കുറിച്ചത്.
 )
Followകൊല്‍ക്കത്ത: ഐപിഎല്ലില്‍ രണ്ടാംജയം തേടി റോയല്‍ ചാലഞ്ചേഴ്‌സ് ബാംഗ്ലൂര്‍ ഇന്നിറങ്ങും. കൊല്‍ക്കത്ത നൈറ്റ് റൈഡേഴ്‌സാണ് എതിരാളികള്‍. വൈകീട്ട് ഏഴരയ്ക്ക് ഈഡന്‍ ഗാര്‍ഡന്‍സിലാണ് മത്സരം. മുംബൈയെ തകര്‍ത്ത് വെടിക്കെട്ട് തുടക്കമിട്ട ആര്‍സിബി. ഈഡനില്‍ മുന്‍തൂക്കം ബാംഗ്ലൂരിന് തന്നെ. ബാറ്റിംഗിലും ബൗളിംഗിലും ശക്തരുടെ നിരയുണ്ട് ആര്‍സിബിക്ക്. വിരാട് കോലി, ഫാഫ് ഡുപ്ലസി ഓപ്പണിംഗ് സഖ്യം ഉജ്വല ഫോമില്‍. മുംബൈക്കെതിരെ 148 റണ്‍സാണ് ഇരുവരും ഒന്നാംവിക്കറ്റില്‍ കുറിച്ചത്. ഗ്ലെന്‍ മാക്‌സ്‌വെല്‍, മൈക്കേല്‍ ബ്രേസ്‌വെല്‍, ദിനേശ് കാര്‍ത്തിക് എന്നിവരും മത്സരം ജയിപ്പിക്കാന്‍ പോന്നവര്‍.
മുഹമ്മദ് സിറാജ്, ഹര്‍ഷല്‍ പട്ടേല്‍ സഖ്യത്തിനാണ് പേസ് ആക്രമണത്തിന്റെ ചുമതല. ഏഴ് പേര്‍ക്കെങ്കിലും പന്തേല്‍പ്പിക്കാനുള്ള വൈവിദ്ധ്യമുണ്ട് ആര്‍സിബിയുടെ ബൗളിംഗ് യൂണിറ്റിന്. രജത് പട്ടിദാര്‍ പരിക്കേറ്റ് പുറത്തായത് മാത്രമാണ് തിരിച്ചടി.
ക്യാപ്റ്റന്‍ ശ്രേയസ് അയ്യര്‍ക്ക് സീസണ്‍ മുഴുവന്‍ നഷ്ടമാകുമെന്ന നിരാശയോടെയാണ് കൊല്‍ക്കത്ത സ്വന്തം മണ്ണിലിറങ്ങുന്നത്. ഷാക്കിബ് അല്‍ ഹസനും ഇത്തവണയില്ലെന്ന് വ്യക്തമായതോടെ മുന്നോട്ടുള്ള പോക്ക് എളുപ്പമാകില്ല. കഴിഞ്ഞ സീസണിന് സമാനമായി മികച്ച ബാറ്റിംഗ് ലൈനപ്പ് തീരുമാനിക്കാന്‍ പോലും ഇതുവരെ ടീമിനായിട്ടില്ല. റഹ്മത്തുള്ള ഗുര്‍ബാസിനൊപ്പം വെങ്കിടേഷ് അയ്യരെ ഓപ്പണിംഗിലേക്ക് പരിഗണിച്ചേക്കും.
ക്യാപ്റ്റന്‍ നിതീഷ് റാണ, ആന്ദ്രേ റസല്‍, എന്നിവരില്‍ നിന്നും ടീം ഏറെ പ്രതീക്ഷിക്കുന്നു. ടിം സൗത്തി, ഉമേഷ് യാദവ്, സുനില്‍ നരെയ്ന്‍, ഷാര്‍ദുല്‍ ഠാക്കൂര്‍ എന്നിവര്‍ ബൗളിംഗ് നിരയിലുണ്ടെങ്കിലും പഞ്ചാബിനെതിരെ നിറംമങ്ങി. മികച്ച ബാറ്റിംഗ് വിക്കറ്റുള്ള കൊല്‍ക്കത്തയില്‍ സ്പിന്നര്‍മാരുടെ പ്രകടനവും മത്സരത്തിന് ഗതി നിര്‍ണയിക്കും. ഇരുടീമുകളും നേര്‍ക്കുനേര്‍ വന്ന 30 മത്സരങ്ങളില്‍ 16 കളിയില്‍ കൊല്‍ക്കത്തയും 14ല്‍ ആര്‍സിബിയും ജയിച്ചു. ഇരു ടീമുകളുടേയും സാധ്യതാ ഇലവന്‍ അറിയാം...
കൊല്‍ക്കത്ത നൈറ്റ് റൈഡേഴ്‌സ് : റഹ്മാനുള്ള ഗുര്‍ബാസ്, വെങ്കടേഷ് അയ്യര്‍, നിതീഷ് റാണ, റിങ്കു സിംഗ്, ആന്ദ്രേ റസ്സല്‍, ഷാര്‍ദുല്‍ ഠാക്കൂര്‍, സുനില്‍ നരെയ്ന്‍, ലോക്കി ഫെര്‍ഗൂസണ്‍, അനുകൂല്‍ റോയ്, ഉമേഷ് യാദവ്, വരുണ്‍ ചക്രവര്‍ത്തി.
റോയല്‍ ചലഞ്ചേഴ്‌സ് ബാംഗ്ലൂര്‍ : വിരാട് കോലി, ഫാഫ് ഡു പ്ലെസിസ്, ഗ്ലെന്‍ മാക്‌സ്‌വെല്‍, മൈക്കല്‍ ബ്രേസ്‌വെല്‍, ഷബാസ് അഹമ്മദ്, ദിനേശ് കാര്‍ത്തിക്, കരണ്‍ ശര്‍മ, ഹര്‍ഷല്‍ പട്ടേല്‍, അകാശ് ദീപ്, ഡേവിഡ് വില്ലി, മുഹമ്മദ് സിറാജ്.
ഐപിഎല്ലിലേറ്റ പരിക്ക് വില്ലന്‍! കെയ്ന്‍ വില്യംസണ്‍ ഏകദിന ലോകകപ്പിനില്ല; വിഷമം പങ്കുവച്ച് താരം
