ഗുജറാത്ത് ടൈറ്റന്‍സിനെതിരെ പഞ്ചാബ് കിംഗ്‌സിന് ടോസ് നഷ്ടം; ഹാര്‍ദിക് തിരിച്ചെത്തി, ഇരു ടീമിലും മാറ്റം
കൊല്‍ക്കത്ത നൈറ്റ് റൈഡേഴ്‌സിനെതിരെ കഴിഞ്ഞ മത്സരം ഹാര്‍ദിക് കളിച്ചിരുന്നില്ല. അതേസമയം, രണ്ട് മാറ്റങ്ങളുമായിട്ടാണ് പഞ്ചാബ് ഇറങ്ങിയത്. പേസര്‍ നതാന്‍ എല്ലിസ്, ഓള്‍റൗണ്ടര്‍ സിക്കന്ദര്‍ റാസ എന്നിവര്‍ പുറത്തായി. ഭാനുക രജപക്‌സ, കഗിസോ റബാദ എന്നിവരാണ് പകരമെത്തിയത്.
 )
Followമൊഹാലി: ഐപിഎല്ലില്‍ ഗുജറാത്ത് ടൈറ്റന്‍സിനെതിരായ മത്സരത്തില്‍ പഞ്ചാബ് കിംഗ്‌സ് ആദ്യം ബാറ്റ് ചെയ്യും. ടോസ് നേടിയ ഗുജറാത്ത് ക്യാപ്റ്റന്‍ ഹാര്‍ദിക് പാണ്ഡ്യ ബൗളിംഗ് തിരഞ്ഞെടുക്കുകയായിരുന്നു. കൊല്‍ക്കത്ത നൈറ്റ് റൈഡേഴ്‌സിനെതിരെ കഴിഞ്ഞ മത്സരം ഹാര്‍ദിക് കളിച്ചിരുന്നില്ല. അതേസമയം, രണ്ട് മാറ്റങ്ങളുമായിട്ടാണ് പഞ്ചാബ് ഇറങ്ങിയത്. പേസര്‍ നതാന്‍ എല്ലിസ്, ഓള്‍റൗണ്ടര്‍ സിക്കന്ദര്‍ റാസ എന്നിവര്‍ പുറത്തായി. ഭാനുക രജപക്‌സ, കഗിസോ റബാദ എന്നിവരാണ് പകരമെത്തിയത്. ഗുജറാത്ത് രണ്ട് മാറ്റം വരുത്തി. ഹാര്‍ദിക് തിരിച്ചെത്തിയപ്പോള്‍ അഭിനവ് മനോഹര്‍ പുറത്തായി. യഷ് ദയാലിന് പകരം മോഹിത് ശര്‍മ ടീമിലെത്തി. വിജയ് ശങ്കര്‍ ഇംപാക്റ്റ് പ്ലയറായി കളിച്ചേക്കും.
ഗുജറാത്ത് ടൈറ്റന്‍സ്: വൃദ്ധിമാന്‍ സാഹ, ശുഭ്മാന്‍ ഗില്‍, സായ് സുദര്‍ശന്‍, ഹാര്‍ദിക് പാണ്ഡ്യ, ഡേവിഡ് മില്ലര്‍, രാഹുല്‍ തെവാട്ടിയ, റാഷിദ് ഖാന്‍, അല്‍സാരി ജോസഫ്, മുഹമ്മദ് ഷമി, മോഹിത് ശര്‍മ, ജോഷ്വാ ലിറ്റില്‍.
പഞ്ചാബ് കിംഗ്‌സ്: പ്രഭ്‌സിമ്രാന്‍ സിംഗ്, ശിഖര്‍ ധവാന്‍, മാത്യൂ ഷോര്‍ട്ട്, ഭാനുക രജപക്‌സ, ജിതേഷ് ശര്‍മ, സാം കറന്‍, ഷാരുഖ് ഖാന്‍, ഹര്‍പ്രീത് ബ്രാര്‍, കഗിസോ റബാദ, ഋഷി ധവാന്‍, അര്‍ഷ്ദീപ് സിംഗ്.
സണ്‍റൈസേഴ്‌സ് ഹൈദരാബാദിനോട് തോറ്റാണ് പഞ്ചാബ് ഹോം ഗ്രൗണ്ടില്‍ ഇറങ്ങുന്നത്. ക്യാപ്റ്റന്‍ ശിഖര്‍ ധവാനെ അമിതമായി ആശ്രയിക്കുന്നതാണ് പ്രധാന ദൗര്‍ബല്യം. ഹൈദരാബാദിനെതിരെ 143 റണ്‍സ് നേടിയപ്പോള്‍ 99ഉം ധവാന്റെ ബാറ്റില്‍ നിന്നായിരുന്നു. ധവാനെപ്പോലെ വിശ്വസിക്കാവുന്നൊരു ബാറ്റര്‍ പഞ്ചാബ് നിരയിലില്ല.
204 റണ്‍സ് നേടിയിട്ടും കൊല്‍ക്കത്ത നൈറ്റ് റൈഡേഴ്സിനോടേറ്റ തോല്‍വിയുടെ ഞെട്ടലിലാണ് നിലവിലെ ചാമ്പ്യന്‍മാരായ ഗുജറാത്ത്. റിങ്കു സിംഗിന്റെ വെടിക്കെട്ട് ബാറ്റിംഗാണ് ഗുജറാത്തിന്റെ താളം തെറ്റിച്ചത്. പരിക്കില്‍ നിന്ന് മോചിതനായി ക്യാപ്റ്റന്‍ ഹാര്‍ദിക് പാണ്ഡ്യ തിരിച്ചെത്തുമ്പോള്‍ ജയവും തിരികെയെത്തുമെന്ന പ്രതീക്ഷയിലാണ് ഗുജറാത്ത്.
