രാജ്യത്ത് കൊവിഡ് ബാധിതരുടെ എണ്ണം രണ്ടു ലക്ഷത്തിലേക്ക്; ദില്ലിയിൽ സിബിഐ ഉദ്യോഗസ്ഥർക്കും രോഗം
മഹാരാഷ്ട്ര,തമിഴ്നാട്, ദില്ലി, ഗുജറാത്ത് എന്നിവിടങ്ങളിലാണ് രോഗബാധിതർ ഏറ്റവും കൂടുതലുള്ളത്. മഹാരാഷ്ട്രയിൽ രോഗബാധിതരുടെ എണ്ണം 70000 കടന്നു.
Followദില്ലി: രാജ്യത്ത് കൊവിഡ് ബാധിതരുടെ എണ്ണം 1,90,535 ആയി. ഇതുവരെ 5394 പേരാണ് രോഗം ബാധിച്ച് ഇവിടെ മരിച്ചത്. മഹാരാഷ്ട്ര,തമിഴ്നാട്, ദില്ലി, ഗുജറാത്ത് എന്നിവിടങ്ങളിലാണ് രോഗബാധിതർ ഏറ്റവും കൂടുതലുള്ളത്.
മഹാരാഷ്ട്രയിൽ രോഗബാധിതരുടെ എണ്ണം 70000 കടന്നു. ഇന്ന് 2361 പേർക്ക് കൂടി കൊവിഡ് സ്ഥിരീകരിച്ചതോടെ ഇവിടെ രോഗബാധിതരുടെ എണ്ണം 70013 ആയി. 37534 പേരാണ് നിലവിൽ ചികിത്സയിലുളളത്. ഇന്ന് മാത്രം മഹാരാഷ്ട്രയിൽ 76 കൊവിഡ് മരണമുണ്ടായി. ഇതോടെ രോഗം ബാധിച്ച് മരിച്ചവരുടെ എണ്ണം 2362 ആയി. മുംബൈയിൽ മാത്രം 41099 കൊവിഡ് കേസുകളാണ് റിപ്പോർട്ട് ചെയ്തിരിക്കുന്നത്. 24 മണിക്കൂറിനിടെ ഇവിടെ 1413 പേർക്ക് രോഗം സ്ഥിരീകരിച്ചു. 40 മരണമാണ് മുംബൈയിൽ ഇന്ന് റിപ്പോർട്ട് ചെയ്തത്. ഇതുവരെ 1413 പേരാണ് മുംബൈയിൽ മാത്രം കൊവിഡ് ബാധിച്ച് മരിച്ചത്.
ദില്ലിയിൽ ഇന്ന് 990 പേർക്ക് കൊവിഡ് സ്ഥിരീകരിച്ചു. ആകെ രോഗബാധിതരുടെ എണ്ണം 20834 ആയി. ഇന്ന് 12 പേർ കൂടി മരിച്ചതോടെ കൊവിഡ് മൂലമുള്ള മരണസംഖ്യ 523 ആയി. ദില്ലിയിൽ രണ്ട് സിബിഐ ഉദ്യോഗസ്ഥരും ഇന്ന് രോഗം സ്ഥിരീകരിച്ചവരിൽ ഉൾപ്പെടുന്നു. രണ്ട് പേരും നേരത്തെ തന്നെ നിരീക്ഷണത്തിൽ ആയിരുന്നു എന്നും വേണ്ട സുരക്ഷ ക്രമീകരണങ്ങൾ എടുത്തിട്ടുണ്ട് എന്നും സിബിഐ വൃത്തങ്ങൾ വ്യക്തമാക്കി.
തമിഴ്നാട്ടിൽ രോഗബാധിതരുടെ എണ്ണത്തിൽ വൻ വർധനയാണ് ഉണ്ടായിരിക്കുന്നത്. ഇന്ന് 1162 പേര്‍ക്ക് കൂടി കൊവിഡ് സ്ഥിരീകരിച്ചതോടെ
രോഗബാധിതര്‍ 23,495 ആയി. 24 മണിക്കൂറിനിടെ 11 പേരാണ് സംസ്ഥാനത്ത് കൊവിഡ് ബാധിച്ച് മരിച്ചത്. ഇതോടെ ആകെ മരണസംഖ്യ 184 ആയി. ഇന്ന് രോഗം സ്ഥിരീകരിച്ചവരിൽ 967 പേരും ചെന്നൈയിൽ ഉള്ളവരാണ്. ചെന്നൈയിൽ ഇതുവരെ 15770 കൊവിഡ് കേസുകളാണ് റിപ്പോർട്ട് ചെയ്തിരിക്കുന്നത്.
