നടി ജോയി കിംഗിനെ ബാധിച്ച രോഗത്തെ കുറിച്ചറിയാം, ലക്ഷണങ്ങള്‍ ഇതൊക്കെ

പെരിയോറൽ ഡെർമറ്റൈറ്റിസ് ( perioral dermatitis) എന്ന ചർമ്മരോ​ഗം ബാധിച്ചതായി അമേരിക്കൻ നടി ജോയി കിംഗ് (Joey King) വെളിപ്പെടുത്തി. പെരിയോറൽ ഡെർമറ്റൈറ്റിസ് എന്ന രോ​ഗം ബാധിച്ചിട്ട് ഏഴ് മാസമായെന്നും താരം പറയുന്നു. ടിക് ടോക് വീഡിയോയിലൂടെയാണ് താരം ഇക്കാര്യം വ്യക്തമാക്കിയത്.

എന്താണ് പെരിയോറൽ ഡെർമറ്റൈറ്റിസ്? (perioral dermatitis)

വായയ്ക്ക് ചുറ്റുമുള്ള ചർമ്മം വരണ്ട് പൊട്ടി പോകുന്ന രോ​ഗമാണ് പെരിയോറൽ ഡെർമറ്റൈറ്റിസ് എന്നത്.  ചർമ്മം വരണ്ട് പൊട്ടുകയും ചൊറിച്ചിലുണ്ടാക്കുകയും ചെയ്യുന്നു. ചില കേസുകളിൽ കണ്ണുകൾ, മൂക്ക്, നെറ്റി, ജനനേന്ദ്രിയങ്ങൾ എന്നിവിടങ്ങളിലും ഇത് ബാധിക്കാം.

90 ശതമാനവും ചെറുപ്പക്കാരായ സ്ത്രീകളിലാണ് ഇത് കൂടുതലായി ബാധിക്കുന്നത്. സ്ത്രീകളിൽ മാത്രമല്ല പുരുഷന്മാരിലും ഈ രോ​ഗം ബാധിക്കാം. വായ്ക്ക് ചുറ്റും ബാധിക്കുന്ന ചുവന്ന് പാടുകളും ചൊറിച്ചിലും മൂക്കിലേക്കോ കണ്ണുകളിലേക്കോ വ്യാപിക്കാമെന്നും വിദ​ഗ്ധർ പറയുന്നു.  

രോ​ഗത്തിന്റെ തുടക്കത്തിൽ കുമിളകൾ, ചുണങ്ങ്, ചൊറിച്ചിൽ എന്നിവ പ്രകടമാകാം. കുമിളകൾ പൊട്ടി 
അതിനുള്ളിൽ നിന്നും ദ്രാവകം വരികയും മറ്റ് ഭാ​ഗങ്ങളിലേക്ക്  വ്യാപിക്കുകയും ചെയ്യാം. 20 നും 45 നും ഇടയിൽ പ്രായമുള്ള സ്ത്രീകളിലാണ് ഈ ചർമ്മ രോ​ഗം കൂടുതലായി കാണുന്നതെന്ന് സ്റ്റാറ്റ് പേൾസിൽ പ്രസിദ്ധീകരിച്ച പഠനത്തിൽ പറയുന്നു. 

വരണ്ടതും‌ ചുവന്നതമായ ചർമ്മം, കുമിളകൾ, വായയ്ക്ക് ചുറ്റുമുള്ള ചെറിയ ചുവന്ന മുഖക്കുരു എന്നിവയാണ് പെരിയോറൽ ഡെർമറ്റൈറ്റിസിൻ്റെ പ്രധാന ലക്ഷണങ്ങൾ. മോയ്സ്ചറൈസറിന്റെ അമിത ഉപയോ​ഗം, ഹോർമോൺ മാറ്റങ്ങൾ, കോസ്മെറ്റിക് ഉൽപ്പന്നങ്ങളുടെ അമിത ഉപയോ​ഗം, ബാക്ടീരിയ അല്ലെങ്കിൽ ഫംഗസ് അണുബാധ, ചില സൺസ്‌ക്രീനുകളുടെ ഉപയോ​ഗം എന്നിവയെല്ലാമാണ് പെരിയോറൽ ഡെർമറ്റൈറ്റിസ് പിടിപെടുന്നതിന് പിന്നിലെ ചില കാരണങ്ങൾ. 

ഏതെങ്കിലും ഫേഷ്യൽ ഉൽപ്പന്നങ്ങളോ സൗന്ദര്യവർദ്ധക വസ്തുക്കളോ ഉപയോഗിച്ച ശേഷം ചർമ്മത്തിൽ അസ്വസ്ഥത അനുഭവപ്പെടുന്നുണ്ടെങ്കിൽ ഉടൻ തന്നെ ആ ക്രീം ഉപയോ​ഗിക്കുന്നത് അവസാനിപ്പിക്കണം. ഹൈഡ്രോകോർട്ടിസോൺ, സ്റ്റിറോയിഡ് ക്രീമുകൾ എന്നിവയുടെ ഉപയോഗം ചിലരിൽ വിവിധ ചർമ്മപ്രശ്നങ്ങൾ ഉണ്ടാക്കാമെന്ന് അമേരിക്കൻ ഓസ്റ്റിയോപതിക് കോളേജ് ഓഫ് ഡെർമറ്റോളജി വ്യക്തമാക്കുന്നു. 

Read more മലമ്പനി ; ഈ ലക്ഷണങ്ങൾ അവ​ഗണിക്കരുത്

• joey king
• perioral dermatitis
• perioral dermatitis treatment