വനിതാ ഹോക്കിയിലെ തോല്‍വിയിലും ഇന്ത്യ മടങ്ങുന്നത് തല ഉയര്‍ത്തി; അഭിമാനിക്കാന്‍ ഏറെയുണ്ടെന്ന് പ്രമുഖര്‍

മുന്‍ ഇന്ത്യന്‍ ക്രിക്കറ്റ് താരങ്ങളായ സച്ചിന്‍ ടെന്‍ഡുല്‍ക്കര്‍, അനില്‍ കുംബ്ലെ, വിവിഎസ് ലക്ഷ്മണ്‍ എന്നിവരെല്ലാം ടീം ഇന്ത്യക്ക് അഭിനന്ദന സന്ദേശമയച്ചു. 

നിര്‍ഭാഗ്യം കൊണ്ട് മാത്രമാണ് ഇന്ത്യന്‍ വനിതകള്‍ക്ക് മെഡല്‍ നഷ്ടമായതെന്ന് മോദി ട്വീറ്റ് ചെയ്തു. 

ഗ്രൂപ്പ് ഘട്ടത്തില്‍ നാലാം സ്ഥാനക്കാരായാണ് ഇന്ത്യന്‍ ക്വാര്‍ട്ടറില്‍ ഇടം നേടിയത്.

ദക്ഷിണാഫ്രിക്ക, അയര്‍ലന്‍ഡ് എന്നിവരെ മാത്രമാണ് ഇന്ത്യ തോല്‍പ്പിച്ചത്. 

ബ്രിട്ടണ്‍, ജര്‍മനി, നെതര്‍ലന്‍ഡ്‌സ് എന്നിവരോട് പരാജയപ്പെട്ടു.

ക്വാര്‍ട്ടറില്‍ ഓസ്‌ട്രേലിയയെ അട്ടിമറിച്ചാണ് ഇന്ത്യ സെമി പോരാട്ടത്തിന് യോഗ്യത നേടുന്നത്. 

സെമിയില്‍ അര്‍ജന്റീനയോട് തോല്‍ക്കുകയായിരുന്നു.

പുരുഷ ടീം വെങ്കലം നേടിയതിന് പിന്നാലെയാണ് വനിതാ ടീം പുറത്താകുന്നത്. 

മെഡല്‍ നേടിയിരുന്നെങ്കില്‍ വനിതാ ഹോക്കി ചരിത്രത്തിലെ ആദ്യ ഒളിംപിക് മെഡലാകുമായിരുന്നു അത്.

മത്സരം തുടങ്ങി രണ്ടാം ക്വാര്‍ട്ടറിന്റെ തുടക്കത്തിലെ ഇരട്ട ഗോളുകളുമായി ബ്രിട്ടന്‍ മുന്നിലെത്തി.

ഡബിളടിച്ച്ഗുര്‍ജിത് കൗര്‍ ഇന്ത്യയെ ഒപ്പമെത്തിച്ചു. പിന്നാലെ വന്ദന കത്താരിയയിലൂടെ മൂന്നാം ഗോളും നേടി ഇന്ത്യ ലീഡെടുത്തു.

മൂന്നാം ക്വാര്‍ട്ടറില്‍ ബ്രിട്ടന്‍ 3-3ന് സമനില പിടിച്ചതോടെ അവസാന ക്വാര്‍ട്ടര്‍ നിര്‍ണായകമായി.

ഇരു ടീമിനും തുല്യ സാധ്യതകള്‍ കല്‍പിച്ച അവസാന ക്വാര്‍ട്ടര്‍ ആവേശമായിരുന്നു. 

തുടക്കത്തിലെ പെനാല്‍റ്റി കോര്‍ണറുകള്‍ വഴങ്ങിയത് ഇന്ത്യക്ക് തിരിച്ചടിയായി.

അവസരം മുതലെടുത്ത് ബ്രിട്ടണ്‍ 48-ാം മിനുറ്റില്‍ ഗ്രേസിലൂടെമുന്നിലെത്തി.

വീണ്ടുമൊരിക്കല്‍ കൂടി സമനിലയിലെത്താന്‍ ഇന്ത്യന്‍ വനിതകള്‍ക്ക് കഴിയാതെ പോയി.

പുരുഷ വിഭാഗത്തില്‍ ഇന്ത്യ ഇന്നലെ വെങ്കല മെഡല്‍ നേടിയിരുന്നു.

വെങ്കലപ്പോരാട്ടത്തില്‍ ജര്‍മനിയെ 5-4ന് മലര്‍ത്തിയടിച്ചാണ് പുരുഷ ടീം ടോക്കിയോയില്‍ മെഡല്‍ അണിഞ്ഞത്. 

ഒളിംപിക്സ് ഹോക്കിയില്‍ നീണ്ട നാല് പതിറ്റാണ്ടിന്റെ മെഡല്‍ കാത്തിരിപ്പിന് വിരാമമിടാന്‍ ഇതോടെ ഇന്ത്യക്കായി. 

ഒരുവേള 1-3ന് പിന്നില്‍ നിന്ന ഇന്ത്യ അതിശക്തമായ തിരിച്ചുവരവില്‍ മെഡല്‍ കൊയ്യുകയായിരുന്നു. 

മലയാളി ഗോള്‍ കീപ്പര്‍ പി ആര്‍ ശ്രീജേഷ് നിര്‍ണായക പ്രകടനം പുറത്തെടുത്തു.

ഒളിംപിക്സ് ഹോക്കിയില്‍ ഇന്ത്യ 12-ാം തവണയാണ് മെഡല്‍ സ്വന്തമാക്കുന്നത്. 

എട്ട് സ്വര്‍ണം, ഒരു വെള്ളി, മൂന്ന് വെങ്കലം എന്നിങ്ങനെയാണ് ഇന്ത്യന്‍ സമ്പാദ്യം. 

പി ആര്‍ ശ്രീജേഷിലൂടെ ഒളിംപിക് പോഡിയത്തില്‍ വീണ്ടുമൊരു മലയാളി സാന്നിധ്യം അറിയിക്കാനുമായി. 

1972ല്‍ മാനുവേല്‍ ഫ്രെഡറിക്സ് വെങ്കലം നേടിയിരുന്നു.

1980 മോസ്കോ ഒളിംപ്ക്സിലാണ് വനിതാ ഹോക്കി ആദ്യമായി ഉള്‍പ്പെടുത്തുന്നത്. 

അന്നും നാലാം സ്ഥാനത്തായിരന്നു ഇന്ത്യ. 

അതിന് ശേഷം 2016 റിയൊ  ഒളിംപിക്സിനാണ് ഇന്ത്യന്‍ ടീം യോഗ്യത  നേടുന്നത്. 

ഇന്ത്യന്‍ വനിതകളുടെ മൂന്നാമത്തെ മാത്രം ഒളിംപിക്സാണിത്. റിയൊയില്‍ പ്രാഥമിക റൌണ്ടില്‍ പുറത്തായിരുന്നു.