സഞ്ജു അരങ്ങേറുമോ..? ശ്രീലങ്കയ്‌ക്കെതിരെ ആദ്യ ഏകദിനത്തിനുള്ള ഇന്ത്യയുടെ സാധ്യത ഇലവന്‍ ഇങ്ങനെ
ഇന്ത്യ- ശ്രീലങ്ക ഏകദിന പരമ്പരയ്ക്ക് നാളെ കൊളംബൊ പ്രേമദാസ സ്റ്റേഡിയത്തില്‍ തുടക്കമാവുകയാണ്. ഉച്ചയ്ക്ക് ശേഷം മൂന്ന് മണിക്കാണ് മത്സരം ആരംഭിക്കുന്നത്. ഇന്ത്യന്‍ ടീമില്‍ ഒരുപാട് യുവതാരങ്ങള്‍ക്ക് അവസരം ലഭിക്കുമെന്ന് കരുതപ്പെടുന്ന പരമ്പരയാണിത്. ഇന്ത്യയുടെ പ്രധാന താരങ്ങള്‍ ഇംഗ്ലണ്ട് പര്യടനത്തിന് പോയ സാഹചര്യത്തില്‍ ശിഖര്‍ ധവാനാണ് ഇന്ത്യയെ നയിക്കുന്നത്. ഭുവനേശ്വര്‍ കുമാറാണ് വൈസ് ക്യാപ്റ്റന്‍. സ്ഥിരം പരിശീലകന്‍ രവി ശാസ്ത്രിയുടെ അഭാവത്തില്‍ രാഹുല്‍ ദ്രാവിഡാണ് ഇന്ത്യയുടെ പരിശീകന്‍.
മലയാളിതാരം സഞ്ജു സാംസണ്‍ ഉള്‍പ്പെടെ നിരവധി യുവതാരങ്ങള്‍ ടീം ഇന്ത്യക്കൊപ്പമുണ്ട്. ഇഷാന്‍ കിഷന്‍, സൂര്യകുമാര്‍ യാദവ്, ദേവ്ദത്ത് പടിക്കല്‍, നിതീഷ് റാണ, ചേതന്‍ സക്കറിയ, രാഹുല്‍ ചാഹല്‍, വരുണ്‍ ചക്രവര്‍ത്തി എന്നീ യുവതാരങ്ങളെല്ലാം ടീമില്‍ ഉള്‍പ്പെട്ടിട്ടുണ്ട്. ധവാന്‍, ഭുവി എന്നിവര്‍ക്ക് പുറമെ ഹാര്‍ദിക് പാണ്ഡ്യ, ക്രുനാല്‍ പാണ്ഡ്യ യൂസ്‌വേന്ദ്ര ചാഹല്‍, കുല്‍ദീപ് യാദവ്് എന്നിവരെല്ലാമാണ് ടീമിലെ സീനിയര്‍ താരങ്ങള്‍. ഇതില്‍ നിന്ന് പ്ലയിംഗ് ഇലവനെ തിരഞ്ഞെടുക്കുകയെന്നത് ടീം മാനേജ്‌മെന്റിന് തലവേദന ഉണ്ടാക്കുന്ന ജോലി. എങ്കിലും നാളെയിറങ്ങാന്‍ സാധ്യതയുള്ള പ്ലയിംഗ് ഇലവന്‍ പരിശോധിക്കാം.
Followശിഖര്‍ ധവാന്‍
ക്യാപ്റ്റന്‍ എന്ന നിലയ്ക്ക് ടീമിന്റെ മുന്നില്‍ നിന്ന് നയിക്കേണ്ട ചുമതല ധവാനാണ്. അതോടൊപ്പം താരത്തിന്റെ ക്യാപ്റ്റന്‍സിയും ആരാധകര്‍ ഉറ്റുനോക്കുന്നു. മാച്ചി വിന്നിംഗ് തീരുമാനങ്ങള്‍ അദ്ദേഹത്തില്‍ നിന്നുണ്ടാവുമെന്നാണ് ആരാധകരുടെ പ്രതീക്ഷ. മാത്രലല്ല, പരമ്പരയില്‍ മികച്ച പ്രകടനം പുറത്തെടുത്താല്‍ ടി20 ലോകകപ്പിനുള്ള ടീമില്‍ ഇടം നേടാന്‍ സാധ്യതയേറെയാണ്.
പൃഥ്വ ഷാ
ഷാ ധവാനൊപ്പം ഓപ്പണ്‍ ചെയ്യും. ദേവ്ദത്ത്, നിതീഷ് റാണ എന്നിവര്‍ ഇനിയും അരങ്ങേറ്റത്തിനായി കാത്തിരിക്കേണ്ടി വരും. ഇന്ത്യന്‍ ടീമിലേക്കുള്ള തിരിച്ചുവരവിന് കാത്തിരിക്കുകയാണ് താരം. 2020 ഓസ്‌ട്രേലിയന്‍ പര്യടനത്തില്‍ അഡ്‌ലെയ്ഡ് ടെസ്റ്റില്‍ മോശം പ്രകടനത്തെ തുടര്‍ന്നാണ് താരം പുറത്തായത്. ഈ പരമ്പരയിലെ മികച്ച പ്രകടനത്തിലൂടെ വന്‍ തിരിച്ചുവരവാണ് താരം ലക്ഷ്യമിടുന്നത്.
സൂര്യകുമാര്‍ യാദവ്
ഇന്ത്യക്ക് വേണ്ടി ടി20 മത്സരങ്ങള്‍ കളിച്ചിട്ടുണ്ടെങ്കിലും ഏകദിന കുപ്പായത്തില്‍ അരങ്ങേറാന്‍ സൂര്യകുമാറിന് ആയിട്ടില്ല. ആഭ്യന്തര ലീഗലും ഐപിഎല്‍ മത്സരങ്ങളിലും മികച്ച ഫോമിലായിരുന്നു സൂര്യകുമാര്‍. അതേ ഫോം ശ്രീലങ്കയ്‌ക്കെതിരേയും തുടരുമെന്നാണ് ആരാധകര്‍ പ്രതീക്ഷിക്കുന്നത്.
സഞ്ജു സാംസണ്‍ (വിക്കറ്റ് കീപ്പര്‍)
സഞ്ജു ഏകദിനത്തില്‍ അരങ്ങേറിയേക്കും. ഇന്ത്യക്കായി ഏഴ് ടി20 മത്സരങ്ങള്‍ കളിച്ചിട്ടുള്ള സഞ്ജു നിരാശ മാത്രമാണ് സമ്മാനിച്ചത്. പ്രതിഭയ്‌ക്കൊത്തുള്ള പ്രകടനം സഞ്ജുവിന്റെ ഭാഗത്തുനിന്നുണ്ടായിട്ടില്ല. നാളെ ആദ്യ ഏകദിനത്തിന് ഇറങ്ങുമ്പോള്‍ ഒരു മികച്ച ഇന്നിഹ്‌സ് ആരാധകര്‍ പ്രതീക്ഷിക്കുന്നുണ്ട്. വിക്കറ്റ് കീപ്പറും സഞ്ജുവായിരിക്കും.
മനീഷ് പാണ്ഡെ
ഇന്ത്യന്‍ ടീമില്‍ അകത്തും പുറത്തുമായി കഴിയുന്ന താരമാണ് പാണ്ഡെ. ശ്രീലങ്കന്‍ പര്യടനം അദ്ദേഹത്തിന് സ്ഥിരമായി ഇന്ത്യന്‍ ടീമില്‍ സ്ഥാനമുറപ്പിക്കാനുള്ള സുവര്‍ണാവസരമാണ്. മധ്യനിരയില്‍ ഇന്ത്യക്ക് കരുത്താവാന്‍ പാണ്ഡെ ഉണ്ടാവും.
ഹാര്‍ദിക് പാണ്ഡ്യ
ആരാധകരുടെ കണ്ണ ഹാര്‍ദിക്കിലാണ്. ഓള്‍റൗണ്ടാറായ പാണ്ഡ്യ പന്തെറിയുമെന്നാണ് ആരാധകര്‍ പ്രതീക്ഷിക്കുന്നത്. പന്തെറിയുമെങ്കില്‍ മാത്രമെ ഹാര്‍ദിക്കിനെ ഇന്ത്യന്‍ ടീമിന് ആവശ്യമുള്ളുവെന്ന് ക്രിക്കറ്റ് പണ്ഡിതര്‍ അഭിപ്രായപ്പെട്ടിരുന്നു. നിര്‍ത്തിവച്ച ഐപിഎല്‍ മത്സരത്തില്‍ മുംബൈ ഇന്ത്യന്‍സിനായി മികച്ച പ്രകടനം പുറത്തെടുക്കാന്‍ ഹാര്‍ദിക്കിനായിരുന്നു.
ക്രുനാല്‍ പാണ്ഡ്യ
ഇംഗ്ലണ്ടിനെതിരായ ഏകദിന പരമ്പരയില്‍ അരങ്ങേറിയപ്പോള്‍ മോശം പ്രകടനമായിരുന്നു താരത്തിന്റേത്. അതോടെ ക്രുനാലിനെ ടീമില്‍ എടുത്തതിനെതിരെ വിമര്‍ശനങ്ങള്‍ ഉയര്‍ന്നു. സ്പിന്‍ എറിയുന്നനോടൊപ്പം ബാറ്റിംഗിലും താരത്തിന് മികച്ച പ്രകടനം പുറത്തെടുക്കേണ്ടതുണ്ട്.
ഭൂവനേശ്വര്‍ കുമാര്‍
ബൗളിംഗ് വകുപ്പ് നയിക്കുന്നത് ഭുവിയായിരിക്കും. ടീമിന്റെ വൈസ് ക്യാപ്റ്റന്‍കൂടിയാണ് ഭുവി. ടീമില്‍ ഏറ്റവും കൂടുതല്‍ വിക്കറ്റ് നേടിയ താരവും മറ്റാരുമല്ല. ഇംഗ്ലണ്ടിനെതിരായ ടെസ്റ്റ് പരമ്പരയില്‍ നിന്ന് താരത്തെ ഒഴിവാക്കിയത് വിമര്‍ശനങ്ങള്‍ ഇടയാക്കിയിരുന്നു. ആദ്യ ഓവറുകളില്‍ വിക്കറ്റ് നേടി ലങ്കയെ പ്രതിരോധത്തിലാക്കുകയാണ് ഭുവിയുടെ ജോലി.
ദീപക് ചാഹര്‍
ചെന്നൈ സൂപ്പര്‍ കിംഗ്‌സിന്റെ ബൗളറായ ദീപക് ഈ ഐപിഎല്ലില്‍ മികച്ച പ്രകടനം പുറത്തെടുത്തിരുന്നു. ഇന്ത്യക്കായി മൂന്ന് ഏകദിനങ്ങള്‍ കളിച്ചിട്ടുള്ള ചാഹര്‍ രണ്ട് വിക്കറ്റാണ് വീഴ്ത്തിയത്. ടി20യില്‍ അല്‍പംകൂടി മികച്ച റെക്കോഡാണ് താരത്തിന്. 13 മത്സരങ്ങളില്‍ നിന്ന് വീഴ്ത്തിയത് 18 വിക്കറ്റുകള്‍. ചാഹര്‍ കളിക്കുന്നതോടെ ചേതന്‍ സക്കറിയ, നവ്ദീപ് സൈനി തുടങ്ങിയവര്‍ പുറത്തിരിക്കും.
കുല്‍ദീപ് യാദവ്
മാസങ്ങളായി ഇന്ത്യന്‍ ടീമിന് പുറത്താണ് കുല്‍ദീപ്. പഴയ മൂര്‍ച്ചയൊന്നും കുല്‍ദീപിന്റെ പന്തുകള്‍ക്കില്ല. എന്നാല്‍ ലങ്കയിലെ തിരിയുന്ന പിച്ചില്‍ കുല്‍ദീപിന്റെ ബൗളിംഗ് ടീമിന് ഗുണം ചെയ്യും.
യൂസ്‌വേന്ദ്ര ചാഹല്‍
ടീമിനകത്തും പുറത്തുമായി നില്‍ക്കുന്ന മറ്റൊരു താരമാണ് ചാഹല്‍. രാഹുല്‍ ചാഹറിനെ പോലെയുള്ള താരങ്ങല്‍ അവസരം കാത്തുനില്‍ക്കെ ഫോം തെളിയിക്കേണ്ടത് താരത്തിന്റെ കടമയാണ്.
