രണ്ട് ദിവസം കൊണ്ട് 28 ലക്ഷം പ്രീ-ഓര്‍ഡര്‍; ആപ്പിളിനെ ഞെട്ടിച്ച് വാവെയ് ട്രൈ-ഫോള്‍ഡ് ഫോണ്‍
ആപ്പിളും വാവെയ്‌യും മുഖാമുഖം, ചരിത്രത്തിലെ ഏറ്റവും വലിയ സ്‌മാര്‍ട്ട്ഫോണുകളുമായി ഇരു കമ്പനികളും ഇന്ന് ലോഞ്ച് യുദ്ധത്തില്‍
 )
Followബെയ്‌ജിങ്ങ്‌: ചൈനീസ് സ്‌മാര്‍ട്ട്ഫോണ്‍ ബ്രാന്‍ഡായ വാവെയ് ഇന്ന് പുറത്തിറക്കാനിരിക്കുന്ന ട്രൈ-ഫോള്‍ഡ് ഫോള്‍ഡബിള്‍ ഫോണിന് (മേറ്റ് എക്‌സ്‌ടി) വന്‍ ഡിമാന്‍ഡ്. പുറത്തിറങ്ങും മുമ്പേ 28 ലക്ഷം പ്രീ-ഓര്‍ഡറുകളാണ് വാവായ്‌യുടെ ട്രൈ-ഫോള്‍ഡ് ഫോള്‍ഡബിളിന് വെറും രണ്ട് ദിവസത്തിനകം ലഭിച്ചിരിക്കുന്നത് എന്നാണ് അവരുടെ വെബ്‌സൈറ്റിലെ വിവരങ്ങള്‍ വ്യക്തമാക്കുന്നത്. ഇന്നുതന്നെ നടക്കുന്ന ആപ്പിളിന്‍റെ ഐഫോണ്‍ 16 ലോഞ്ചില്‍ നിന്ന് ശ്രദ്ധതിരിക്കുന്ന വാര്‍ത്ത കൂടിയാണിത്.
പ്രതീക്ഷകളെക്കാള്‍ വലുത് സംഭവിച്ചിരിക്കുന്നു. ചൈനീസ് സ്‌മാര്‍ട്ട്ഫോണ്‍ ബ്രാന്‍ഡായ വാവെയ്യുടെ ട്രൈ-ഫോള്‍ഡ് ഫോള്‍ഡബിളിന്‍റെ പ്രീ-ഓര്‍ഡര്‍ കുതിച്ചുയര്‍ന്നിരിക്കുകയാണ്. കമ്പനിയുടെ വെബ്‌സൈറ്റിലെ വിവരങ്ങള്‍ പ്രകാരം 2.8 മില്യണ്‍ പ്രീ-ഓര്‍ഡറാണ് ഈ ഫോണിന് ഇതിനകം ലഭിച്ചിരിക്കുന്നത്. ഐഫോണ്‍ 16 ലോഞ്ചിന് രണ്ട് ദിവസം മാത്രം മുമ്പായി കഴിഞ്ഞ ശനിയാഴ്‌ചയായിരുന്നു പുത്തന്‍ സ്‌മാര്‍ട്ട് ഫോണ്‍ മോഡലിന്‍റെ പ്രീ-ഓര്‍ഡര്‍ വാവെയ് സ്വീകരിച്ച് തുടങ്ങിയത്.
ഇന്ന് ഏതാണ് ഒരേസമയം തന്നെയാണ് വാവെയ് മേറ്റ് എക്‌സ്‌ടിയും ആപ്പിള്‍ ഐഫോണ്‍ 16 സിരീസും പുറത്തിറക്കാനിരിക്കുന്നത്. ലോഞ്ചിന് മുന്നോടിയായി ടീസര്‍ വീഡിയോ വാവെയ് അവതരിപ്പിച്ചിട്ടുണ്ട്. മൂന്നായി മടക്കിക്കൂട്ടി കീശയില്‍ വെക്കാവുന്ന ലോകത്തെ ആദ്യ ട്രൈ-ഫോള്‍ഡ് ഫോള്‍ഡബിളുമായാണ് വാവെയ്യുടെ വരവ്. രണ്ട് തവണ മടക്കി സൂക്ഷിക്കാവുന്ന തരത്തില്‍ മൂന്ന് സ്ക്രീനുകളാണ് ട്രൈ-ഫോള്‍ഡ് ഫോള്‍ഡബിളിനുണ്ടാവുക. ഫോണിന്‍റെ കനത്തില്‍ മുന്‍ ഫോള്‍ഡബിളുകളില്‍ നിന്ന് വ്യത്യാസം പ്രതീക്ഷിക്കാം.
ആപ്പിള്‍ ഇന്ന് ഐഫോണ്‍ 16 സിരീസാണ് അവതരിപ്പിക്കുന്നത്. ഐഫോൺ 16, ഐഫോൺ 16 പ്ലസ്, ഐഫോൺ 16 പ്രോ, ഐഫോൺ 16 പ്രോ മാക്‌സ് എന്നിങ്ങനെ നാല് മോഡലുകളാണ് ഈ ഐഫോണ്‍ സിരീസില്‍ വരിക.
Read more: മൂന്നായി മടക്കി പോക്കറ്റില്‍ വെക്കാം; ലോകത്തെ ആദ്യ ട്രൈ-ഫോള്‍ഡ് ഫോണ്‍ ഉടന്‍ വരുന്നു- റിപ്പോര്‍ട്ട്
