തെലുങ്കില്‍ വീണ്ടും തിളങ്ങാന്‍ ദുല്‍ഖര്‍; 8 വര്‍ഷത്തിന് ശേഷം ആ തെന്നിന്ത്യന്‍ നായികയ്‍ക്കൊപ്പം
ദുല്‍ഖറിന്‍റെ പിറന്നാള്‍ ദിനമായിരുന്ന ജൂലൈ 28 ന് പ്രഖ്യാപിച്ച ചിത്രം
 )
Followപാന്‍ ഇന്ത്യന്‍ പ്രേക്ഷക സ്വീകാര്യതയിലേക്കുള്ള വളര്‍ച്ചയില്‍ ദുല്‍ഖര്‍ സല്‍മാന്‍റെ നിര്‍ണ്ണായക ചുവടുവെപ്പാണ് തെലുങ്ക് ചിത്രം ലക്കി ഭാസ്കര്‍. ദീപാവലി റിലീസ് ആയി ഇന്നലെ തിയറ്ററുകളിലെത്തിയ പിരീഡ് ക്രൈം ത്രില്ലര്‍ ചിത്രത്തിന് ബുധനാഴ്ച രാത്രി നടന്ന പ്രിവ്യൂ ഷോകള്‍ മുതലേ മികച്ച അഭിപ്രായമാണ് ലഭിച്ചത്. ദീപാവലിക്ക് തെലുങ്കിലെ ഏറ്റവും പ്രധാന റിലീസ് ആയി എത്തിയ ചിത്രം റിലീസ് ദിനത്തിലും മികച്ച പ്രേക്ഷകാഭിപ്രായമാണ് നേടിയത്. തെലുങ്കിലെ ശ്രദ്ധേയ യുവതാരമായി മാറുന്ന ദുല്‍ഖറിന്‍റെ മറ്റൊരു ചിത്രവും അവിടെനിന്ന് വരാനുണ്ട്. പവൻ സാദിനേനി സംവിധാനം ചെയ്യുന്ന 'ആകാശം ലോ ഒക താര' എന്ന ചിത്രമാണ് അത്. ഇപ്പോഴിതാ ആരാധകര്‍ക്ക് ആവേശം പകരുന്ന ഒരു റിപ്പോര്‍ട്ട് ഈ ചിത്രത്തെ സംബന്ധിച്ച് എത്തിയിരിക്കുകയാണ്.
ദുല്‍ഖറിന്‍റെ പിറന്നാള്‍ ദിനമായിരുന്ന ജൂലൈ 28 ന് പ്രഖ്യാപിച്ച ചിത്രമാണ് ഇത്. ഇപ്പോള്‍ പുറത്തെത്തിയിരിക്കുന്ന റിപ്പോര്‍ട്ട് ചിത്രത്തില്‍ നായിക ആരെന്നത് സംബന്ധിച്ചാണ്. സായ് പല്ലവിയാണ് ചിത്രത്തില്‍ ദുല്‍ഖറിന്‍റെ നായികയാവുകയെന്നാണ് ടോളിവുഡില്‍ നിന്നുള്ള വിവരം. ലെറ്റ്സ് സിനിമ അടക്കം പ്രമുഖ ട്രാക്കര്‍മാര്‍ ഇക്കാര്യം എക്സില്‍ പോസ്റ്റ് ചെയ്തിട്ടുണ്ട്. അതേസമയം വിഷയത്തില്‍ ഔദ്യോഗിക പ്രതികരണങ്ങള്‍ എത്തിയിട്ടില്ല. നേരത്തെ 2016 ല്‍ പുറത്തെത്തിയ മലയാള ചിത്രം 'കലി'യിലാണ് ദുല്‍ഖറും സായ് പല്ലവിയും ഒരുമിച്ച് അഭിനയിച്ചത്.
വ്യത്യസ്തമായ കഥപറച്ചിലിനും സിനിമാറ്റിക് സമീപനത്തിനും പേരുകേട്ട സംവിധായകനാണ് പവൻ സാദിനേനി. തെലുങ്കിലെ മറ്റ് നായകന്മാരില്‍ നിന്നും സിനിമകളുടെ തെരഞ്ഞെടുപ്പില്‍ വ്യത്യസ്തമായ വഴി സ്വീകരിക്കുന്ന ദുല്‍ഖറിന്‍റെ വരാനിരിക്കുന്ന ചിത്രവും അത്തരത്തിലുള്ളതായിരിക്കുമെന്നാണ് പ്രേക്ഷക പ്രതീക്ഷ. സന്ദീപ് ഗണ്ണവും രമ്യ ഗണ്ണവും ചേർന്ന് നിർമ്മിക്കുന്ന ഈ വമ്പൻ ചിത്രം തെലുങ്കിലെ പ്രശസ്ത നിർമ്മാണ കമ്പനികളായ ഗീത ആർട്സ്, സ്വപ്ന സിനിമ, ലൈറ്റ്ബോക്സ് മീഡിയ എന്നിവർ ചേര്‍ന്നാണ് അവതരിപ്പിക്കുന്നത്. തെലുങ്ക് കൂടാതെ തമിഴ്, ഹിന്ദി, മലയാളം ഭാഷകളിൽ പാൻ ഇന്ത്യൻ ചിത്രമായാണ് ആകാശം ലോ ഒക താര പ്രേക്ഷകരുടെ മുന്നിലെത്തുക.
ALSO READ : മലയാളത്തിലെ ദീപാവലി റിലീസ്; 'ഓശാന' പ്രദര്‍ശനം ആരംഭിക്കുന്നു
