'സാമന്തയെ വെല്ലുമോ ശ്രീലീല': ഞായറാഴ്ച അറിയാം 'പുഷ്പ 2' വന്‍ അപ്ഡേറ്റ്
പുഷ്പ 2: ദി റൂൾ എന്ന ചിത്രത്തിലെ 'കിസ്സിക്ക്' ഗാനം നവംബർ 24ന് ചെന്നൈയിൽ ലോഞ്ച് ചെയ്യും. ഡിസംബർ 5ന് ചിത്രം റിലീസ് ചെയ്യുന്നതിന് മുന്നോടിയായി നവംബർ 27ന് അല്ലു അർജുൻ കൊച്ചിയിലെത്തും.
 )
Followചെന്നൈ: പട്‌നയിലെ ഗാന്ധി മൈതാനിയിൽ നടന്ന പുഷ്പ 2: ദി റൂൾ എന്ന ചിത്രത്തിന്‍റെ ഗ്രാൻഡ് ട്രെയിലർ ലോഞ്ച് ഇവന്‍റ് വന്‍ ഹൈപ്പാണ് ഇന്ത്യന്‍ സിനിമ മേഖലയില്‍ ഉണ്ടാക്കിയിരിക്കുന്നത്. ഇപ്പോള്‍ സിനിമയുടെ പുതിയ അപ്ഡേറ്റ് എത്തിയിരിക്കുകയാണ്.
ചിത്രത്തിലെ 'കിസ്സിക്ക്' ഗാനത്തിന്‍റെ ലോഞ്ച് ഉടന്‍ എത്തും എന്നാണ് വിവരം. നവംബർ 24ന് വൈകിട്ട് അഞ്ച് മണി മുതൽ ചെന്നൈയിലെ ലിയോ മുത്തു ഇൻഡോർ സ്റ്റേഡിയത്തില്‍ വച്ചാണ് ചിത്രത്തിലെ ഈ ഗാനം ലോഞ്ച് ചെയ്യുന്നത്. ശ്രീലീലയുടെ ഡാന്‍സുമായി എത്തുന്ന ചിത്രം പുഷ്പ 1ലെ സാമന്തയുടെ ഡാന്‍സ് ഗാനത്തിന് സമാനമാണ് എന്നാണ് ഇപ്പോള്‍ തന്നെ ഹൈപ്പ്.
ചിത്രത്തിന്‍റെ പോസ്റ്റര്‍ വലിയ തോതില്‍ വൈറലായിരുന്നു. ശ്രീലീല സാമന്തയോളം വരുമോ എന്നത് സോഷ്യല്‍ മീഡിയയില്‍ വലിയ തര്‍ക്കം തന്നെ നടക്കുന്നതിനിടെയാണ് ഗാനം എത്തുന്നത്. ദേവി ശ്രീ പ്രസാദാണ് ചിത്രത്തിന്‍റെ സംഗീതം നിര്‍വഹിക്കുന്നത്.
അതേ സമയം 'പുഷ്പ 2: ദ റൂൾ' റിലീസിന് ദിവസങ്ങൾ മാത്രം ശേഷിക്കേ കൊച്ചിയെ ഇളക്കി മറിക്കാൻ അല്ലു അർജുൻ എത്തുന്നു. നവംബർ 27ന് നടൻ കൊച്ചിയിൽ എത്തും. ഡിസംബർ അഞ്ചിനാണ് ചിത്രത്തിന്‍റെ വേൾഡ് വൈഡ് റിലീസ്.
'പുഷ്പ ഇനി നാഷണല്ല, ഇന്‍റർനാഷണൽ!' എന്ന ഡയലോഗുമായി എത്തിയിരുന്ന ട്രെയിലർ ഇതിനകം ശ്രദ്ധനേടി കഴിഞ്ഞു. ആദ്യ ഭാഗത്തേക്കാൾ പതിന്മടങ്ങ് ആക്ഷൻ പാക്ക്ഡ് എന്‍റർടെയ്നറായിട്ടാണ് രണ്ടാം ഭാഗം എത്തുന്നതെന്ന് അടിവരയിടുന്നതായിരുന്നു ട്രെയിലർ. പുഷ്പരാജായി അല്ലു അർജ്ജുനും ഭൻവർസിംഗ് ഷെഗാവത്തായി ഫഹദ് ഫാസിലും രണ്ടാം ഭാഗത്തിൽ പൂണ്ടുവിളയാടിയിട്ടുണ്ടെന്നാണ് ട്രെയിലറിൽ നിന്ന് അറിയാനാകുന്നത്. ശ്രീവല്ലിയായി രശ്മികയുടേയും മനോഹരമായ അഭിനയമുഹൂർത്തങ്ങൾ രണ്ടാം ഭാഗത്തിലുമുണ്ടെന്നാണ് സൂചന.
പുഷ്പ 2 കേരളത്തിലെത്തിക്കുന്നത് ഇ ഫോർ എന്‍റർടെയ്ൻമെന്‍റ്സ് ആണ്. സിനിമ ഇറങ്ങുന്നതിന് ഒരു മാസം മുമ്പേ കേരളത്തിലെ പുഷ്പ 2 ഫാൻസ് ഷോ ടിക്കറ്റുകൾ വിറ്റ് തീർന്നിരിക്കുകയാണ്. 'പുഷ്പ ദ റൂൾ' ഡിസംബർ 5 മുതൽ കേരളക്കരയിലെ തിയേറ്ററുകളിൽ 24 മണിക്കൂറും പ്രദർശനമുണ്ടാകുമെന്നാണ് ഇ ഫോർ എന്‍റർടെയ്ൻമെന്‍റ്സ് സാരഥി മുകേഷ് ആർ മേത്ത അറിയിച്ചിട്ടുള്ളത്. തിയേറ്ററുകള്‍തോറും ഇതുവരെ കാണാത്ത വിധത്തിലുള്ള ഗംഭീരമായ റിലീസിങ് മാമാങ്കത്തിനാണ് നിർമ്മാതാക്കളായ മൈത്രി മൂവി മേക്കേഴ്സും സുകുമാർ റൈറ്റിംഗ്സും പദ്ധതിയിടുന്നത്.
'പുഷ്പ 2' എത്താൻ ഇനി 12 നാൾ; മലയാളികളെ കാണാൻ അല്ലു അർജുൻ എത്തുന്നു
