'നിർത്തിയങ്ങ് അഭിനന്ദിക്കുവാന്നേ', മികച്ച സംവിധായകൻ 'പോത്തേട്ടൻ ബ്രില്യൻസ്', ശ്യാം പുഷ്കരനും 'ജോജി' തിളക്കം

ചിത്രത്തിന്‍റെ തിരക്കഥയിലൂടെ ശ്യാം പുഷ്കരന് മികച്ച അവലംബിത തിരക്കഥയ്ക്കുള്ള പുരസ്കാരവും ലഭിച്ചിട്ടുണ്ട്.

best director dileesh pothan for joji movie, syam pushkaran also best adapted screenplay

Thiruvananthapuram, First Published May 27, 2022, 4:49 PM IST | Last Updated May 27, 2022, 7:13 PM IST

തിരുവനന്തപുരം: കഴിഞ്ഞ വർഷത്തെ മലയാള സിനിമാ പുരസ്കാര പ്രഖ്യാപനം കഴിയുമ്പോൾ ഏറ്റവും തിളക്കമുള്ള സിനിമയായി മാറിയിരിക്കുകയാണ് ജോജി. പോത്തേട്ടൻ ബ്രില്യൻസ് എന്ന് എന്തുകൊണ്ടാണ് ചലച്ചിത്ര ലോകം വാഴ്ത്താറുള്ളതെന്ന് ഒരിക്കൽ കൂടി ദിലീഷ് പോത്തൻ അടിവരയിടുകയായിരുന്നു ചിത്രത്തിലൂടെ. മികച്ച സംവിധാനയകനുള്ള പുരസ്കാരമാണ് പോത്തേട്ടൻ ബ്രില്യൻസ് ഇക്കുറി സ്വന്തമാക്കിയിരിക്കുന്നത്. ഫഹദ് ഫാസിൽ നായകനായെത്തിയ ചിത്രം നേരത്തെ തന്നെ പ്രേക്ഷക പ്രശംസ പിടിച്ചുപറ്റിയിരുന്നു. മികച്ച സംവിധായകനുള്ള പുരസ്കാരമടക്കം 'ജോജി' 4 അവാ‍ർഡുകളാണ് വാരിക്കുട്ടിയത്. ചിത്രത്തിന്‍റെ തിരക്കഥയിലൂടെ ശ്യാം പുഷ്കരന് മികച്ച അവലംബിത തിരക്കഥയ്ക്കുള്ള പുരസ്കാരവും ലഭിച്ചു. ഉണ്ണിമായ പ്രസാദിനും ചിത്രം വലിയ നേട്ടമായി. മികച്ച സ്വഭാവ നടിക്കുള്ള പുരസ്കാരം ജോജിയിലൂടെ ഉണ്ണിമായ പ്രസാദിനെ തേടിയെത്തി. ജസ്റ്റിന്‍ വര്‍ഗീസിനും ജോജി പുരസ്കാര തിളക്കം സമ്മാനിച്ചു. സംഗീത സംവിധായകന്‍ (മികച്ച പശ്ചാത്തല സംഗീതം) പുരസ്കാരമാണ് ജോജിയിലൂടെ ജസ്റ്റിൻ സ്വന്തമാക്കിയത്.

ജൂറിയുടെ വിലയിരുത്തല്‍

ഹിംസാത്മകമായ ആണധികാര വ്യവസ്‍ഥ നിലവിലിരിക്കുന്ന ഒരു കുടുംബാന്തരീക്ഷത്തിലെ മനുഷ്യജീവിതങ്ങളുടെ മാനസിക വ്യാപാരങ്ങളെ അതിസൂക്ഷ്‍മമായി ആവിഷ്‍കരിക്കുന്ന ചലച്ചിത്രഭാഷയുടെ ശില്‍പ്പഭദ്രമായ പ്രയോഗത്തിന് ആണ് മികച്ച സംവിധാനത്തിനുള്ള അവാര്‍ഡ്.

മികച്ച നടൻ ബിജു മേനോൻ, ജോജു ജോർജ്, നടി രേവതി; മികച്ച സംവിധായൻ ദിലീഷ് പോത്തൻ

അതേസമയം 52-ാമത് സംസ്ഥാന ചലച്ചിത്ര അവാർഡ് പ്രഖ്യാപനത്തിൽ മികച്ച നടനുള്ള പുരസ്കാരം ബിജു മേനോനും ജോജു ജോർജും പങ്കിടുകയായിരുന്നു. മികച്ച നടിയായി രേവതിയെയും തെരഞ്ഞെടുത്തു.ആർക്കറിയാം എന്ന ചിത്രത്തിലൂടെ ബിജു മേനോനും നായാട്ട്, മധുരം, ഫ്രീഡം ഫൈറ്റ് എന്നീ ചിത്രങ്ങളിലൂടെ ജോജുവിനെയും മികച്ച നടനായി തെരഞ്ഞെടുത്തത്. ഭൂതകാലം എന്ന ചിത്രത്തിനാണ് രേവതിയെ മികച്ച നടിയായി തെരഞ്ഞെടുത്തത്.