അടുത്തയാഴ്ച ഈ സമയം ടൈറ്റില്‍ വിജയി; ഈ ആറ് മത്സരാര്‍ഥികളില്‍ ഒരാള്‍! ബിഗ് ബോസ് 'ഫൈനല്‍ 6' പ്രഖ്യാപിച്ചു
അടുത്ത ഞായറാഴ്ച ഫിനാലെ
 )
Followബിഗ് ബോസ് മലയാളം സീസണ്‍ 6 ലെ ഫൈനല്‍ സിക്സ് ലൈനപ്പ് ആയി. കഴിഞ്ഞയാഴ്ച എട്ട് മത്സരാര്‍ഥികള്‍ ഉണ്ടായിരുന്നിടത്തുനിന്ന് ഈ വാരാന്ത്യത്തില്‍ രണ്ട് പേര്‍ കൂടി പുറത്തായതോടെയാണ് ഫൈനല്‍ 6 ല്‍ തീരുമാനമായത്. രണ്ട് ശ്രദ്ധേയ മത്സരാര്‍ഥികളാണ് ഈ വാരാന്ത്യത്തില്‍ പുറത്തായത്. നോറയും സിജോയുമാണ് അവര്‍. നോറയുടെ എവിക്ഷന്‍ ഇന്നലെയും സിജോയുടേത് ഇന്നും ആയിരുന്നു.
ബിഗ് ബോസ് മലയാളത്തിന്‍റെ ചരിത്രത്തില്‍ത്തന്നെ സിജോ നേരിട്ട രീതിയിലുള്ള ഒരു പ്രതിസന്ധി മറ്റൊരു മത്സരാര്‍ഥിക്ക് നേരിടേണ്ടിവന്നിട്ടില്ല. സീസണിന്‍റെ 15-ാം ദിവസം മറ്റൊരു മത്സരാര്‍ഥിയില്‍ നിന്നും ശാരീരിക ആക്രമണം നേരിട്ട സിജോയ്ക്ക് മുഖത്ത് പരിക്കേറ്റിരുന്നു. ശസ്ത്രക്രിയ ആവശ്യമായിവന്ന സിജോ പതിനാറാം ദിവസം ഹൗസില്‍ നിന്ന് ചികിത്സയ്ക്കായി പോയി. പിന്നീട് ഒരു മാസത്തിന് ശേഷമാണ് ഹൗസിലേക്ക് തിരിച്ചെത്തിയത്. അവശേഷിച്ച സമയം കൊണ്ട് തന്‍റെ സാന്നിധ്യം വീണ്ടും അടയാളപ്പെടുത്താന്‍ സിജോയ്ക്ക് സാധിച്ചു. പക്ഷേ ഫൈനല്‍ 6 ലേക്ക് എത്താന്‍ അദ്ദേഹത്തിന് സാധിക്കാതെപോയി.
അതേസമയം ഈ സീസണിലെ ഫൈനല്‍ 6 ഇവരാണ്- ശ്രീതു കൃഷ്ണന്‍, ജാസ്മിന്‍ ജാഫര്‍, അഭിഷേക് ശ്രീകുമാര്‍, ജിന്‍റോ, ഋഷി എസ് കുമാര്‍, അര്‍ജുന്‍. കരുത്തരായ പല മത്സരാര്‍ഥികളും നേരത്തേതന്നെ പുറത്തായ സീസണാണ് ഇത്. അന്തിമ വിജയി ആരെന്നത് സംബന്ധിച്ച് സോഷ്യല്‍ മീഡിയയില്‍ നടന്നുകൊണ്ടിരിക്കുന്ന പോളുകളില്‍ പല മത്സരാര്‍ഥികളും മുന്നേറ്റം കാണിക്കുന്നുണ്ട്. എന്നാല്‍ അന്തിമ വിജയി ആരെന്നത് ഈ സീസണിലെ ഒരു സര്‍പ്രൈസ് ആണ്. ഫിനാലെ വീക്ക് എത്തുമ്പോഴും അത് അറിയാന്‍ സാധിക്കുന്നില്ല എന്നത് ആറാം സീസണിന്‍റെ പ്രത്യേകതയാണ്.
