26,000 ഐസ്ക്രീം സ്റ്റിക്കുകൾ കൊണ്ടൊരു രംഗോലി, റെക്കോർഡിട്ട് അമ്മയും മകളും
പ്രശസ്തരായ തമിഴ് കവികളുടെ രൂപമാണ് ഇതിൽ വരച്ചിരിക്കുന്നത്. സുധാ രവി എന്ന യുവതിയും മകൾ രക്ഷിതയും ചേർന്നാണ് ഈ വ്യത്യസ്തമായ രംഗോലി നിർമ്മിച്ചിരിക്കുന്നത്.
Followപൂർത്തിയാക്കാൻ ഒരുപാട് സമയം വേണ്ടി വരുന്ന ഒന്നാണ് രംഗോലി. ഉത്തരേന്ത്യയിൽ വളരെ പ്രശസ്തം കൂടിയാണ് ഇത്. അരിപ്പൊടി, സിന്ദൂരം, മഞ്ഞൾ എന്നിവയെല്ലാം ഉപയോഗിച്ചാണ് സാധാരണ രംഗോലി വരക്കുന്നത്. എന്നാൽ, ഇവിടെ ഒരു അമ്മയും മകളും ചേർന്ന് തികച്ചും വ്യത്യസ്തമായ ഒരു രംഗോലി നിർമ്മിച്ചിരിക്കുകയാണ്.
അതുവഴി അമ്മയും മകളും സിംഗപ്പൂർ ബുക്ക്സ് ഓഫ് റെക്കോർഡ്‍സിലും ഇടം നേടി. 26,000 ഐസ്ക്രീം സ്റ്റിക്കുകൾ ഉപയോഗിച്ചാണ് ഇരുവരും ചേർന്ന് ഈ രംഗോലി ഉണ്ടാക്കിയിരിക്കുന്നത്. പ്രശസ്തരായ തമിഴ് കവികളുടെ രൂപമാണ് ഇതിൽ വരച്ചിരിക്കുന്നത്. സുധാ രവി എന്ന യുവതിയും മകൾ രക്ഷിതയും ചേർന്നാണ് ഈ വ്യത്യസ്തമായ രംഗോലി നിർമ്മിച്ചിരിക്കുന്നത്.
സിംഗപ്പൂരിൽ ലിറ്റിൽ ഇന്ത്യയിൽ നടക്കുന്ന പൊങ്കൽ ആഘോഷങ്ങളുടെ ഭാഗമായുള്ള സാംസ്കാരിക പരിപാടികളോടനുബന്ധിച്ചായിരുന്നു ഇരുവരും രംഗോലി ഒരുക്കിയത്. 2016 -ൽ 3200 സ്ക്വയർ ഫീറ്റിൽ രംഗോലി ഒരുക്കിയും സുധാരവി റെക്കോർഡ് നേട്ടം ഉണ്ടാക്കിയിരുന്നു. ഒരു മാസം എടുത്താണ് അമ്മയും മകളും ഇപ്പോൾ ഈ രംഗോലി പൂർത്തിയാക്കിയത്. തിരുവള്ളുവർ, അവ്വയാർ, ഭാരതിയാർ, ഭാരതിദാസൻ തുടങ്ങിയ പ്രശസ്ത തമിഴ് കവികളെ ആദരിക്കുന്നതാണ് രംഗോലി. തമിഴ് സാംസ്കാരിക സംഘടനയായ കലാമഞ്ജരി, ലിറ്റിൽ ഇന്ത്യ ഷോപ്പ്കീപ്പേഴ്‌സ് ആൻഡ് ഹെറിറ്റേജ് അസോസിയേഷൻ എന്നിവ ചേർന്ന് നടത്തുന്ന ആഘോഷങ്ങളുടെ ഭാഗമായിട്ടായിരുന്നു രംഗോലി നിർമ്മിച്ചത്.
ഇതിന് പുറമേ ഈ കവികളുടെ കവിതകളുടെ അവതരണമടക്കം മറ്റ് സാംസ്കാരിക പരിപാടികളും തങ്ങൾ സംഘടിപ്പിച്ചിരുന്നു എന്ന് കലാമഞ്ജരിയുടെ സ്ഥാപകനായ സൗന്ദര നായകി വൈരവൻ പറഞ്ഞു. സുധാ രവി ഒരു രംഗോലി ആർട്ടിസ്റ്റാണ്. തമിഴ് സംസ്കാരത്തെ എടുത്തുകാട്ടുകയും പ്രോത്സാഹിപ്പിക്കുകയും ചെയ്യുന്ന അനവധി രൂപങ്ങൾ നേരത്തെയും അവർ തയ്യാറാക്കിയിട്ടുണ്ട്.
