ദൈവമേ, ഞാനിനി എന്താണ് ചെയ്യേണ്ടത്? മുംബൈ ടീമില്‍ നിന്നൊഴിവാക്കിയതിന് പിന്നാലെ പ്രതികരണവുമായി പൃഥ്വി ഷാ
ടീമില്‍ നിന്നൊഴിവാക്കിയതിന് പിന്നാലെ ഇന്‍സ്റ്റഗ്രാമിലൂടെയാണ് താരം പ്രതിഷേധം പരസ്യമാക്കിയത്.
Followമുംബൈ: വിജയ് ഹസാരെ ട്രോഫിക്കുള്ള മുംബൈ ടീമില്‍ നിന്ന് ഒഴിവാക്കിയതിന് പിന്നാലെ പ്രതിഷേധം പ്രകടമാക്കി പൃഥ്വി ഷാ. ഇന്ന് പ്രഖ്യാപിച്ച ടീമില്‍ നിന്ന് ഓപ്പണര്‍ പൃഥ്വി ഷായെ തഴഞ്ഞിരുന്നു. ശ്രേയസ് അയ്യര്‍ നയിക്കുന്ന ടീമില്‍ അജിന്‍ക്യ രഹാനയേയും ഉള്‍പ്പെടുത്തിയിരുന്നില്ല. വ്യക്തിപരമായ കാരണങ്ങളാണ് രഹാനെ അവധി ചോദിച്ചതെന്നാണ് അറിയുന്നത്. എന്നാല്‍ പൃഥ്വിയുടെ കാര്യത്തില്‍ അച്ചടക്കമില്ലായ്മയും ഫോമും ഫിറ്റ്‌നെസുമെല്ലാം ചര്‍ച്ചയായിരിക്കാം. ഇന്ത്യന്‍ താരങ്ങളായ സൂര്യകുമാര്‍ യാദവ്, ശിവം ദുബെ, ഷാര്‍ദുല്‍ ഠാക്കൂര്‍, മുംബൈയുടെ വണ്ടര്‍കിഡ് സൂര്യാന്‍ഷ് ഷെഡ്‌ജെ എന്നിവരെല്ലാം ടീമിലുണ്ട്.
ടീമില്‍ നിന്നൊഴിവാക്കിയതിന് പിന്നാലെ ഇന്‍സ്റ്റഗ്രാമിലൂടെയാണ് താരം പ്രതിഷേധം പരസ്യമാക്കിയത്. ''ദൈവമേ, ഞാന്‍ ഇനിയും എന്താണ് ചെയ്യേണ്ടതെന്ന് എന്നോട് പറയൂ. 65 ഇന്നിംഗ്സില് നിന്ന് 3399 റണ്‍സ്. അതും 55.07 ശരാശരിയില്‍. 126 സ്ട്രൈക്ക് റേറ്റും എനിക്കുണ്ട്. ഇത്രയൊന്നും മതിയാവില്ലേ. ഞാനിപ്പോഴും ദൈവത്തില്‍ വിശ്വാസമര്‍പ്പിക്കുന്നു. ജനം എന്നെ വിശ്വസിക്കുമെന്ന് പ്രതീക്ഷിക്കുന്നു. ഞാന്‍ തിരിച്ചുവരും.'' പൃഥ്വി കുറിച്ചിട്ടു.
മുംബൈ സ്‌ക്വാഡ്: ശ്രേയസ് അയ്യര്‍ (ക്യാപ്റ്റന്‍), ആയുഷ് മാത്രെ, ആംഗ്രിഷ് രഘുവന്‍ഷി, ജയ് ബിസ്റ്റ, സൂര്യകുമാര്‍ യാദവ്, ശിവം ദുബെ, സൂര്യാന്‍ഷ് ഷെഡ്‌ജെ, സിദ്ധേഷ് ലാഡ്, ഹാര്‍ദിക് തമോറെ, പ്രസാദ് പവാര്‍, അഥര്‍വ അങ്കോളേക്കര്‍, തനുഷ് കൊടിയാന്‍, ഷാര്‍ദുല്‍ ഠാക്കൂര്‍, റോയ്‌സ്റ്റണ്‍ ഡയസ്, ജുനെദ് ഖാന്‍, ഹര്‍ഷ് താന്ന, വിനായക് ഭോര്‍.
സയ്യിദ് മുഷ്താഖ് അലി ടി20 നേടിയതിന്റെ ആത്മവിശ്വാസത്തിലാണ് മുംബൈ. മധ്യ പ്രദേശിനിനെതിരെ അഞ്ച് വിക്കറ്റിനായിരുന്നു മുംബൈയുടെ ജയം. ബെംഗളൂരു, ചിന്നസ്വാമി സ്റ്റേഡിയത്തില്‍ 175 റണ്‍സ് വിജയലക്ഷ്യം മുംബൈ 17.5 ഓവറില്‍ അഞ്ച് വിക്കറ്റ് മാത്രം നഷ്ടത്തില്‍ ലക്ഷ്യം മറികടന്നു. ശ്രേയസിന് കീഴിലാണ് മുഷ്താഖ് അലിയിലും മുംബൈ കളിച്ചത്. കഴിഞ്ഞ സീസണില്‍ രഞ്ജി ട്രോഫി കിരീടവും മുംബൈക്കായിരുന്നു. അന്നും ക്യാപ്റ്റനായിരുന്നത് ശ്രയസായിരുന്നു.
മുഷ്താഖ് അലി ടി20യില്‍ ഈ സീസണില്‍ ഏറ്റവും കൂടുതല്‍ റണ്‍സെടുത്ത താരമായിരുന്നു അജിന്‍ക്യ രഹാനെ. എട്ട് ഇന്നിംഗ്സില് നിന്ന് (9 മത്സരം) 469 റണ്‍സാണ് രഹാനെ അടിച്ചെടുത്തത്. 98 റണ്‍സാണ് ഉയര്‍ന്ന സ്‌കോര്‍. 164.56 സ്ട്രൈക്ക് റേറ്റും 58.62 ശരാശരിയും രഹാനെയ്ക്കുണ്ട്. അഞ്ച് അര്‍ധ സെഞ്ചുറികളും ഇതില്‍ ഉള്‍പ്പെടും. 19 സിക്സും 46 ഫോറും രഹാനെ നേടി. ടൂര്‍ണമെന്റിലെ താരവും രഹാനെ തന്നെ. ഐപിഎല്‍ താരലേലത്തില്‍ അടിസ്ഥാന വിലയായ 1.5 കോടിക്ക് രഹാനെയെ കൊല്‍ക്കത്ത നൈറ്റ് റൈഡേഴ്‌സ് സ്വന്തമാക്കിയിരുന്നു.
