IPL 2022 : ആവേഷും ഹോള്‍ഡറും എറിഞ്ഞിട്ടു; കൊല്‍ക്കത്തയ്‌ക്കെതിരെ ലഖ്‌നൗവിന് തകര്‍പ്പന്‍ ജയം, ഒന്നാമത്
വിജയലക്ഷ്യത്തിലേക്ക് ബാറ്റേന്തിയ കൊല്‍ക്കത്ത നിരയില്‍ റസ്സലൊഴികെ മറ്റാര്‍ക്കും തിളങ്ങാന്‍ സാധിച്ചില്ല. പവര്‍പ്ലേയില്‍ മൂന്ന് വിക്കറ്റ് നഷ്ടപ്പെടുത്തിയപ്പോള്‍ കൊല്‍ക്കത്ത തോല്‍വി സമ്മതിച്ചിരുന്നു.
 )
Followപൂനെ: ഐപിഎല്ലില്‍ ലഖ്‌നൗ സൂപ്പര്‍ ജയന്റ്‌സ് (LSG) പോയിന്റ് പട്ടികയില്‍ ഒന്നാമത്. കൊല്‍ക്കത്ത നൈറ്റ് റൈഡേഴ്‌സിനെതിരായ (KKR) മത്സരത്തില്‍ 75 റണ്‍സിന്റെ തകര്‍പ്പന്‍ ജയം സ്വന്തമാക്കിയതോടെയാണ് ലഖ്‌നൗ ഗുജറാത്ത് ടൈറ്റന്‍സിനെ പിന്തള്ളി ഒന്നാമതെത്തിയത്. പൂനെയില്‍ നടന്ന മത്സരത്തില്‍ ടോസ് നഷ്ടപ്പെട്ട് ബാറ്റിംഗിന് ഇറങ്ങിയ ലഖ്‌നൗ നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 176 റണ്‍സാണ് നേടിയത്. മറുപടി ബാറ്റിംഗില്‍ കൊല്‍ക്കത്ത 14.3 ഓവറില്‍ 101ന് എല്ലാവരും പുറത്തായി. മൂന്ന് വിക്കറ്റ് വീതം നേടിയ ജേസണ്‍ ഹോള്‍ഡര്‍, ആവേഷ് ഖാന്‍ എന്നിവരാണ് കൊല്‍ക്കത്തയെ തകര്‍ത്തത്. 19 പന്തില്‍ 45 റണ്‍സ് നേടിയ ആന്ദ്രേ റസ്സലാണ് കൊല്‍ക്കത്തയുടെ ടോപ് സ്‌കോറര്‍. നേരത്തെ ക്വിന്റണ്‍ ഡി കോക്ക് (29 പന്തില്‍ 50), ദീപക് ഹൂഡ (27 പന്തില്‍ 41) എന്നിവരുടെ ഇന്നിംഗ്‌സാണ് ലഖ്‌നൗവിന് മാന്യമായ സ്‌കോര്‍ നല്‍കിയത്. ആന്ദ്രേ റസ്സില്‍ കൊല്‍ക്കത്തക്കായി രണ്ട് വിക്കറ്റ് വീഴ്ത്തി.
വിജയലക്ഷ്യത്തിലേക്ക് ബാറ്റേന്തിയ കൊല്‍ക്കത്ത നിരയില്‍ റസ്സലൊഴികെ മറ്റാര്‍ക്കും തിളങ്ങാന്‍ സാധിച്ചില്ല. പവര്‍പ്ലേയില്‍ മൂന്ന് വിക്കറ്റ് നഷ്ടപ്പെടുത്തിയപ്പോള്‍ കൊല്‍ക്കത്ത തോല്‍വി സമ്മതിച്ചിരുന്നു. ബാബ ഇന്ദ്രജിത് (0), ആരോണ്‍ ഫിഞ്ച് (14), ശ്രേയസ് അയ്യര്‍ (6), നിതീഷ് റാണ (2), റിങ്കു സിംഗ് (6), സുനില്‍ നരെയ്ന്‍ (22) എന്നിങ്ങനെയാണ് പുറത്തായ പ്രമുഖരുടെ സ്‌കോറുകള്‍. വാലറ്റത്ത് അനുകുല്‍ റോയ് (0), ടിം സൗത്തി (0), ഹര്‍ഷിത് റാണ (2) എന്നിവരും പെട്ടന്ന് പുറത്തായി. ശിവം മാവി (1) പുറത്താവാതെ നിന്നു.
ലഖ്‌നൗവിന് മികച്ച ഫോമിലുള്ള ക്യാപ്റ്റന്‍ കെ എല്‍ രാഹുലിനെ ആദ്യ ഓവറില്‍ തന്നെ നഷ്ടമായിരുന്നു. ആദ്യ പന്ത് നേരിടുന്നതിന് മുമ്പ് പവലിയനിലെത്തിക്കാന്‍ കൊല്‍ക്കത്തയ്ക്കായി. കൊല്‍ക്കത്ത ക്യാപ്റ്റന്‍ ശ്രേയസ് അയ്യരുടെ നേരിട്ടുള്ള ത്രോയില്‍ റണ്ണൗട്ടാവുകയായിരുന്നു രാഹുല്‍. എന്നാല്‍ മൂന്നാം വിക്കറ്റില്‍ ഡി കോക്ക്- ഹൂഡ സഖ്യം 71 റണ്‍സ് കൂട്ടിചേര്‍ത്തു. എന്നാല്‍ ഡി കോക്ക് മടങ്ങിയതോടെ റണ്‍നിരക്ക് കുറഞ്ഞു. സുനില്‍ നരെയ്‌ന്റെ പന്തില്‍ ലോങ് ഓഫി ശിവം മാവിക്ക് ക്യാച്ച്.
വൈകാതെ ഹൂഡ പവലിയനില്‍ തിരിച്ചെത്തി. റസ്സലിന്റെ പന്തില്‍ ശ്രേയസിന് ക്യാച്ച്. ക്രുനാല്‍ പാണ്ഡ്യയേയും (25) മടക്കി റസ്സല്‍ തന്റെ രണ്ടാം വിക്കറ്റ് നേടി. 14 പന്തില്‍ 28 റണ്‍സ് നേടിയ മാര്‍കസ് സ്റ്റോയിനിസ് വാലറ്റത്ത് നിര്‍ണായക സംഭാവന നല്‍കി. അവസാന ഓവറില്‍ ജേസണ്‍ ഹോള്‍ഡറുടെ (നാല് പന്തില്‍ 13) രണ്ട് സിക്‌സ് കൂടിയായപ്പോള്‍ സ്‌കോര്‍ 175 കടന്നു. ശിവം മാവിയുടെ ഒരോവറില്‍ അഞ്ച് സിക്‌സാണ് ഇരവരും നേടിയത്. ആയുഷ് ബദോനി (17 പന്തില്‍ 15) പുറത്താവാതെ നിന്നു. അവസാന പന്തില്‍ ദുഷ്മന്ത് ചമീര (0) റണ്ണൗട്ടായി.
നേരത്തെ, കൊല്‍ക്കത്ത ഒരു മാറ്റം വരുത്തിയാണ് ഇറങ്ങിയത്. പരിക്കിനെ തുടര്‍ന്ന് ഉമേഷ് യാദവ് പുറത്തായി. ഹര്‍ഷിത് റാണ ടീമിലെത്തി. ലഖ്‌നൗ ഒരു മാറ്റം വരുത്തി. കൃഷ്ണപ്പ ഗൗതമിന് പകരം ആവേഷ് ഖാന്‍ ടീമിലെത്തി.
ലഖ്‌നൗ സൂപ്പര്‍ ജയന്റ്‌സ്: ക്വിന്റണ്‍ ഡി കോക്ക്, കെ എല്‍ രാഹുല്‍, ദീപക് ഹൂഡ, മാര്‍കസ് സ്റ്റോയിനിസ്, ക്രുനാല്‍ പാണ്ഡ്യ, ആയുഷ് ബദോനി, ജേസണ്‍ ഹോള്‍ഡര്‍, ദുഷ്മന്ത ചമീര, ആവേഷ് ഖാന്‍, മുഹ്‌സിന്‍ ഖാന്‍, രവി ബിഷ്‌ണോയ്.
കൊല്‍ക്കത്ത നൈറ്റ് റൈഡേഴ്‌സ്: ബാബ ഇന്ദ്രജിത്ത്, ആരോണ്‍ ഫിഞ്ച്, ശ്രേയസ് അയ്യര്‍, നിതീഷ് റാണ, റിങ്കു സിംഗ്, സുനില്‍ നരെയ്ന്‍, അനുകൂല്‍ റോയ്, ആന്ദ്രേ റസ്സല്‍, ഉമേഷ് യാദവ്, ടിം സൗത്തി, ശിവം മാവി.
