ഐസിസി ടെസ്റ്റ് റാങ്കിംഗ്: വിരാട് കോലി ആദ്യ 20ൽ നിന്ന് പുറത്ത്, സ്മിത്തിന് നേട്ടം; രോഹിത്തിനും തിരിച്ചടി
യശസ്വി ജയ്സ്വാള്‍ മാത്രമാണ് ആദ്യ പത്തിലുള്ള ഏക ഇന്ത്യൻ താരം.
Followദുബായ്: ഐസിസി ടെസ്റ്റ് ബാറ്റിംഗ് റാങ്കിംഗില്‍ ഇന്ത്യയുടെ വിരാട് കോലിക്കും രോഹിത് ശര്‍മ്മകും കനത്ത തിരിച്ചടി. വിരാട് കോലി ആദ്യ 20ല്‍ നിന്ന് പുറത്തായി 24ാം സ്ഥാനത്തേക്ക് വീണപ്പോള്‍ രോഹിത് ശര്‍മ അഞ്ച് സ്ഥാനം നഷ്ടപ്പെടുത്തി നാല്‍പതാം സ്ഥാനത്തേക്ക് വീണു. മെല്‍ബണ്‍ ടെസ്റ്റിന്‍റെ രണ്ട് ഇന്നിംഗ്സിലും അര്‍ധസെഞ്ചുറി നേടിയ യശസ്വി ജയ്സ്വാള്‍ ഒരു സ്ഥാനം മെച്ചപ്പെടുത്തി നാലാം സ്ഥാനത്തെത്തിയപ്പോൾ മെല്‍ബണില്‍ നിരാശപ്പെടുത്തി റിഷഭ് പന്ത് ഒരു സ്ഥാനം നഷ്ടമാക്കി പന്ത്രണ്ടാം സ്ഥാനത്തായി. യശസ്വി ജയ്സ്വാള്‍ മാത്രമാണ് ആദ്യ പത്തിലുള്ള ഏക ഇന്ത്യൻ താരം.
മെല്‍ബണില്‍ ആദ്യ ഇന്നിംഗ്സില്‍ സെഞ്ചുറി നേടിയ ഓസ്ട്രേലിയയുടെ സ്റ്റീവ് സ്മിത്ത് മൂന്ന് സ്ഥാനം ഉയര്‍ന്ന് ഏഴാം സ്ഥാനത്തേക്ക് കയറിയപ്പോള്‍ രണ്ട് ഇന്നിംഗ്സിലും അര്‍ധസെഞ്ചുറി നേടിയ മാര്‍നസ് ലാബുഷെയ്ന്‍ മൂന്ന് സ്ഥാനം മെച്ചപ്പെടുത്തി പതിനൊന്നം സ്ഥാനത്തെത്തി. ദക്ഷിണാഫ്രിക്കക്കെതിരായ ടെസ്റ്റില്‍ തിളങ്ങിയ പാകിസ്ഥാന്‍റെ സൗദ് ഷക്കീല്‍ മൂന്ന് സ്ഥാനം ഉയര്‍ന്ന് ആറാം സ്ഥാനത്തെത്തിയതാണ് ആദ്യ പത്തിലെ മറ്റൊരു മാറ്റം.
ഇംഗ്ലണ്ടിന്‍റെ ജോ റൂട്ട് പുതുവര്‍ഷത്തിലും ഒന്നാം സ്ഥാനം നിലനിലര്‍ത്തിയപ്പോള്‍ ഹാരി ബ്രൂക്ക് രണ്ടാമതും കെയ്ന്‍ വില്യംസണ്‍ മൂന്നാമതുമാണ്. മെല്‍ബണ്‍ ടെസ്റ്റില്‍ നിരാശപ്പെടുത്തിയ ഓസ്ട്രേലിയയുടെ ട്രാവിസ് ഹെഡ് ഒരു സ്ഥാനം നഷ്ടമായി അഞ്ചാം സ്ഥാനത്തായി. അഫ്ഗാനിസ്ഥാനെതിരായ ടെസ്റ്റില്‍ തിളങ്ങിയ സിംബാബാ‌വെയുടെ ഷോണ്‍ വില്യംസ് പത്ത് സ്ഥാനങ്ങള്‍ മെച്ചപ്പെടുത്തി പത്തൊമ്പതാം സ്ഥാനത്തേക്ക് ഉയര്‍ന്നപ്പോള്‍ മെല്‍ബണില്‍ കളിക്കാതിരുന്ന ശുഭ്മാന്‍ ഗില്‍ ഇരുപതാം സ്ഥാനത്ത് തുടരുന്നു. ടെസ്റ്റ് ഓള്‍ റൗണ്ടര്‍മാരുടെ റാങ്കിംഗില്‍ നിന്ന് അശ്വിന്‍ പുറത്തായപ്പോള്‍ രവീന്ദ്ര ജഡേജയാണ് ഒന്നാമത്. ബംഗ്ലാദേശിന്‍റെ മെഹ്ദി ഹസന്‍ രണ്ടാമതും ഓസ്ട്രേലിയന്‍ ക്യാപ്റ്റന്‍ പാറ്റ് കമിന്‍സ് മൂന്നാമതുമുണ്ട്.
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക
