IPL 2022 : ഡല്‍ഹി കാപിറ്റല്‍സിന്റെ പ്ലേ ഓഫ് സാധ്യതകള്‍ തുലാസില്‍; ചെന്നൈ സൂപ്പര്‍ കിംഗ്‌സിന് കൂറ്റന്‍ ജയം
ഡെവോണ്‍ കോണ്‍വെയുടെ (49 പന്തില്‍ 87) ഇന്നിംഗ്‌സാണ് ചെന്നൈയ്ക്ക് തുണയായത്. റിതുരാജ് ഗെയ്കവാദ് (33 പന്തില്‍ 41), ശിവം ദുബെ (19 പന്തില്‍ 32) എന്നിവരും മികച്ച പ്രകടനം പുറത്തെടുത്തു. മറുപടി ബാറ്റിംഗില്‍ ഡല്‍ഹി 17.4 ഓവറില്‍ 117ന് എല്ലാവരും പുറത്തായി. മൂന്ന് വിക്കറ്റ് നേടിയ മൊയീന്‍ അലിയാണ് ഡല്‍ഹിയെ തകര്‍ത്തത്.
 )
Followമുംബൈ: ഐപിഎല്ലില്‍ ഡല്‍ഹി കാപിറ്റല്‍സിന്റെ പ്ലേഓഫ് സാധ്യതകള്‍ക്ക് തിരിച്ചടി. ചെന്നൈ സൂപ്പര്‍ കിംഗ്‌സിനെതിരായ മത്സരത്തില്‍ 91 റണ്‍സിന്റെ കൂറ്റന്‍ തോല്‍വി ഏറ്റുവാങ്ങിയതോടെയാണ് ഡല്‍ഹിയുടെ സാധ്യതകള്‍ തുലാസിലായത്. ടോസ് നഷ്ടപ്പെട്ട് ബാറ്റിംഗിന് ഇറങ്ങിയ ചെന്നൈ നിശ്ചിത ഓവറില്‍ 208 റണ്‍സാണ് നേടിയത്. ഡെവോണ്‍ കോണ്‍വെയുടെ (49 പന്തില്‍ 87) ഇന്നിംഗ്‌സാണ് ചെന്നൈയ്ക്ക് തുണയായത്. റിതുരാജ് ഗെയ്കവാദ് (33 പന്തില്‍ 41), ശിവം ദുബെ (19 പന്തില്‍ 32) എന്നിവരും മികച്ച പ്രകടനം പുറത്തെടുത്തു. മറുപടി ബാറ്റിംഗില്‍ ഡല്‍ഹി 17.4 ഓവറില്‍ 117ന് എല്ലാവരും പുറത്തായി. മൂന്ന് വിക്കറ്റ് നേടിയ മൊയീന്‍ അലിയാണ് ഡല്‍ഹിയെ തകര്‍ത്തത്. 25 റണ്‍സ് നേടിയ മിച്ചല്‍ മാര്‍ഷാണ് ഡല്‍ഹിയുടെ ടോപ് സ്‌കോറര്‍. 11 മത്സരങ്ങളില്‍ 10 പോയിന്റുള്ള ഡല്‍ഹി അഞ്ചാം സ്ഥാനത്താണ്. ഇത്രയും മത്സരങ്ങളില്‍ എട്ട് പോയിന്റുള്ള ചെന്നൈ എട്ടാമതും.
മാര്‍ഷിന് പുറമെ റിഷഭ് പന്ത് (21), ഷാര്‍ദുല്‍ ഠാകൂര്‍ (24), ഡേവിഡ് വാര്‍ണര്‍ (19) എന്നിവരാണ് രണ്ടക്കം കണ്ട മറ്റു ബാറ്റ്‌സ്മാന്‍മാര്‍. ശ്രീകര്‍ ഭരത് (8), റോവ്മാന്‍ പവല്‍ (3), റിപാല്‍ പട്ടേല്‍ (6), അക്‌സര്‍ പട്ടേല്‍ (1), കുല്‍ദീപ് യാദവ് (5), ഖലീല്‍ അഹമ്മദ് (0) എന്നിങ്ങനെയാണ് മറ്റു താരങ്ങളുടെ സ്‌കോറുകള്‍. നോര്‍ജെ (1) പുറത്താവാതെ നിന്നു. മൊയീന്‍ അലിക്ക് പുറമെ മുകേഷ് ചൗധരി, സിമാര്‍ജീത് സിംഗ്, ഡ്വെയ്ന്‍ ബ്രാവോ എന്നിവര്‍ രണ്ട് വിക്കറ്റ് വീതം വീഴ്ത്തി.
നേരത്തെ, തകര്‍പ്പന്‍ തുടക്കമാണ് ചെന്നൈയ്ക്ക് ലഭിച്ചത്. കോണ്‍വെ- റിതുരാജ് സഖ്യം 11 ഓവറില്‍ 110 റണ്‍സെടുത്തു. എന്നാല്‍ ഗെയ്കവാദിനെ പുറത്താക്കി ആന്റിച്ച് നോര്‍ജെ ഡല്‍ഹിക്ക് ബ്രേക്ക് ത്രൂ നല്‍കി. മൂന്നാമനായി ക്രീസിലെത്തിയ ശിവം ദുബെയും മികച്ച പ്രകടനം പുറത്തെടുത്തു. 32 റണ്‍സെടുത്ത താരത്തെ മിച്ചല്‍ മാര്‍ഷ് മടക്കി. നാലമനായി ക്രീസിലെത്തിയ അമ്പാട്ടി റായുഡു (5) നിരാശപ്പെടുത്തി. റണ്‍റേറ്റ് ഉയര്‍ത്താനുള്ള ശ്രമത്തില്‍ മൊയീന്‍ അലി (9), റോബിന്‍ ഉത്തപ്പ (0) എന്നിവര്‍ മടങ്ങിയെങ്കിലും എം എസ് ധോണി (8 പന്തില്‍ പുറത്താവാതെ 21), ഡ്വെയ്ന്‍ ബ്രാവോ (1) എന്നിവര്‍ സ്‌കോര്‍ 200 കടത്തി.
മത്സരത്തില്‍ ചെന്നൈ ഒരു മാറ്റം വരുത്തിയാണ് ഇറങ്ങിയത്. പരിക്കിനെ തുടര്‍ന്ന് രവീന്ദ്ര ജഡേജ പുറത്തായി. ശിവം ദുബെ തിരിച്ചെത്തി. ഡല്‍ഹി ടീമില്‍ രണ്ട് മാറ്റമുണ്ട്. കെ എസ് ഭരത്, അക്‌സര്‍ പട്ടേല്‍, റിഫാല്‍ പട്ടേല്‍ എന്നിവര്‍ ടീമിലെത്തി. ലളിത് യാദവ്, മന്‍ദീപ്, പൃഥ്വി ഷാ പുറത്തായി.
ചെന്നൈ സൂപ്പര്‍ കിംഗ്‌സ്: റിതുരാജ് ഗെയ്കവാദ്, ഡെവോണ്‍ കോണ്‍വെ, മൊയീന്‍ അലി, റോബിന്‍ ഉത്തപ്പ, അമ്പാട്ടി റായുഡു, ശിവം ദുബെ, എം എസ് ധോണി, ഡ്വെയ്ന്‍ ബ്രാവോ, മഹീഷ് തീക്ഷണ, സിമ്രാന്‍ജീത് സിംഗ്, മുകേഷ് ചൗധരി.
ഡല്‍ഹി കാപിറ്റല്‍സ്: ഡേവിഡ് വാര്‍ണര്‍, കെ എസ് ഭരത്, മിച്ചല്‍ മാര്‍ഷ്, റിഷഭ് പന്ത്, റോവ്മാന്‍ പവല്‍, അക്‌സര്‍ പട്ടേല്‍, റിപാല്‍ പട്ടേല്‍, ഷാര്‍ദുല്‍ ഠാക്കൂര്‍, ആന്റിച്ച് നോര്‍ജെ, കുല്‍ദീപ് യാദവ്, ഖലീല്‍ അഹമ്മദ്.
