കമ്പനിയുടെ വിൽപ്പനയിൽ വൻ ഇടിവ്, എന്നിട്ടും ഈ ബൈക്കിന് കൂട്ടയിടി; സ്‍കൂട്ടറും സൂപ്പർഹിറ്റ്!
2024 ഒക്ടോബറിൽ കഴിഞ്ഞ വർഷത്തെ അപേക്ഷിച്ച് ബജാജിന്‍റെ വിൽപ്പനയിൽ കുറവുണ്ടായി. ഉത്സവ സീസണായിട്ടും കമ്പനിയുടെ വിൽപ്പനയിൽ കുതിച്ചുചാട്ടം ഉണ്ടായിട്ടില്ല.
 )
Followബജാജ് ഓട്ടോ ലിമിറ്റഡിന്‍റെ കഴിഞ്ഞ മാസത്തെ വിൽപ്പന കണക്കുകൾ പുറത്തുവന്നിരിക്കുന്നു. 2024 ഒക്ടോബറിൽ കഴിഞ്ഞ വർഷത്തെ അപേക്ഷിച്ച് ബജാജിന്‍റെ വിൽപ്പനയിൽ കുറവുണ്ടായി. ഉത്സവ സീസണായിട്ടും കമ്പനിയുടെ വിൽപ്പനയിൽ കുതിച്ചുചാട്ടം ഉണ്ടായിട്ടില്ല. ആഭ്യന്തര വിപണിയിലെ വെല്ലുവിളികളും ഡിമാൻഡ് കുറഞ്ഞതുമാണ് വിൽപ്പനയെ ബാധിച്ചത്. 2024 ഒക്ടോബറിൽ ബജാജ് ഓട്ടോയുടെ ആഭ്യന്തര വിൽപ്പന 7.11 ശതമാനം ഇടിഞ്ഞ് 2,45,421 യൂണിറ്റിലെത്തി. കഴിഞ്ഞ വർഷം ഇതേ മാസത്തിൽ കമ്പനി 2,64,198 യൂണിറ്റുകൾ വിറ്റഴിച്ചിരുന്നു. ഇതുകൂടാതെ, 2024 സെപ്റ്റംബറിൽ 2,47,118 യൂണിറ്റുകൾ വിറ്റു. ഇത് ഒക്ടോബറിലെ വിൽപ്പനയേക്കാൾ 0.69% കൂടുതലാണ്.
പക്ഷേ ഈ വിൽപ്പന ഇടിവിന് ഇടയിലും ബജാജ് പൾസർ വീണ്ടും വിൽപ്പന ചാർട്ടിൽ ഒന്നാമതെത്തി. ഒക്ടോബറിൽ പൾസർ 1,11,834 യൂണിറ്റുകൾ വിറ്റു, ഇത് കഴിഞ്ഞ വർഷത്തെ 1,61,572 യൂണിറ്റിനേക്കാൾ 30.78% കുറവാണ്. 45.57 ശതമാനമാണ് പൾസറിൻ്റെ വിപണി വിഹിതം. 68,511 യൂണിറ്റുകൾ വിറ്റഴിച്ച 125 സിസി മോഡൽ ബജാജ് പൾസർ ശ്രേണിയിലെ ഏറ്റവും മികച്ച വിൽപ്പനയായിരുന്നു. ഇതിന് പുറമെ പൾസർ 150 സിസിയുടെ 21,438 യൂണിറ്റുകളും 200 സിസിയുടെ 14,898 യൂണിറ്റുകളും 250 സിസിയുടെ 5,665 യൂണിറ്റുകളും വിറ്റു. ടിവിഎസ് റൈഡർ, ഹീറോ എക്‌സ്ട്രീം 125ആർ തുടങ്ങിയ ബൈക്കുകളിൽ നിന്ന് ഈയിടെ പുറത്തിറക്കിയ പൾസർ എൻ125 കടുത്ത മത്സരമാണ് നേരിടുന്നത്. ബജാജ് പ്ലാറ്റിനയുടെ വിൽപ്പന ഒക്ടോബറിൽ 61,689 യൂണിറ്റായിരുന്നു, ഇത് കഴിഞ്ഞ വർഷത്തെ 74,539 യൂണിറ്റുകളെ അപേക്ഷിച്ച് 17.24% കുറവാണ്. എങ്കിലും, സെപ്റ്റംബറിനെ അപേക്ഷിച്ച് 23.94% വർദ്ധനയുണ്ട്.
ബജാജ് ചേതക് ഇലക്ട്രിക് സ്‌കൂട്ടറിൻ്റെ ആവശ്യം വർധിച്ചുവരികയാണ്. ഒക്ടോബറിലെ വിൽപ്പന 30,644 യൂണിറ്റായിരുന്നു, ഇത് കഴിഞ്ഞ വർഷത്തെ 12,137 യൂണിറ്റിനേക്കാൾ 152.48% കൂടുതലാണ്. രാജ്യത്ത് ഏറ്റവുമധികം വിൽക്കപ്പെടുന്ന മൂന്നാമത്തെ ഇലക്ട്രിക് സ്‍കൂട്ടറാണിത്. 2024 ജൂലൈയിൽ പുറത്തിറക്കിയ ബജാജ് ഫ്രീഡം സിഎൻജി ബൈക്കിന് മികച്ച തുടക്കമാണ് ലഭിച്ചത്. ഒക്ടോബറിൽ 30,051 യൂണിറ്റുകൾ വിറ്റു. ഇത് സെപ്റ്റംബറിനെ അപേക്ഷിച്ച് 53.02% വർധന. ഈ ബൈക്ക് സിഎൻജിയിൽ 100 km/kg മൈലേജും പെട്രോളിൽ 65 km/ലിറ്ററും നൽകുന്നു. ബജാജ് സിടി, അവഞ്ചർ, ഡൊമിനാർ എന്നിവയുടെ വിൽപ്പന കഴിഞ്ഞ മാസങ്ങളിൽ കുറഞ്ഞു. ഒക്ടോബറിൽ സിടി വിൽപ്പന 8,503 യൂണിറ്റായിരുന്നു, കഴിഞ്ഞ വർഷത്തെ 11,886 യൂണിറ്റിൽ നിന്ന് 28.46% കുറഞ്ഞു. അവഞ്ചർ വിൽപ്പന 37.93 ശതമാനവും ഡോമിനാർ വിൽപ്പന 25.28 ശതമാനവും കുറഞ്ഞു.
