Mercedes Benz G Class : പുതിയ ജി ക്ലാസ് ഫേസ്‌ലിഫ്റ്റ് പരീക്ഷണം ആരംഭിച്ച് ബെന്‍സ്
മോഡലിന് വേണ്ടിയുള്ള ഒരു അപ്‌ഡേറ്റിനായിട്ടാണ് ഇപ്പോള്‍ കമ്പനിയുടെ ശ്രമം
Followജര്‍മ്മന്‍ ആഡംബര വാഹന നിര്‍മ്മാതാക്കളായ മെഴ്സിഡസ് ബെന്‍സ് പുതിയ ജി ക്ലാസ് ഫേസ്‌ലിഫ്റ്റിന്‍റെ (Mercedes-Benz G-Class) പരീക്ഷണയോട്ടം തുടങ്ങിയതായി റിപ്പോര്‍ട്ട്. ഗ്രില്ലിലെ തിരശ്ചീന സ്ലാറ്റുകൾ അനുസരിച്ച് ഈ പരീക്ഷണ വാഹനം G550 വേരിയന്റായിരിക്കാം എന്ന് കാര്‍ വെയ്‍ല്‍ റിപ്പോര്‍ട്ട് ചെയ്യുന്നു.
പുതിയ തലമുറ മെഴ്സിഡസ് ബെന്‍സ് ജി ക്ലാസ് (Mercedes-Benz G-Class) 2018-ൽ ആണ് അവതരിപ്പിച്ചത്. മോഡലിന് വേണ്ടിയുള്ള ഒരു അപ്‌ഡേറ്റിനായിട്ടാണ് ഇപ്പോള്‍ കമ്പനിയുടെ ശ്രമം. പുതിയ മോഡല്‍ 2023 ന്റെ തുടക്കത്തിൽ എത്തുമെന്ന് പ്രതീക്ഷിക്കുന്നു. ഇപ്പോള്‍ പുറത്തു വന്ന പരീക്ഷണ ചിത്രങ്ങള്‍ വ്യക്തമാക്കുന്നത് പോലെ, പുതിയ മെഴ്സിഡസ് ബെന്‍സ് ജി-ക്ലാസിന് ഫ്രണ്ട്, റിയർ, സൈഡ് പ്രൊഫൈൽ എന്നിവയുൾപ്പെടെ ബാഹ്യ രൂപകൽപ്പനയിലേക്ക് അപ്‌ഡേറ്റുകൾ ലഭിക്കും.
മുന്നിൽ, 2023 മെഴ്സിഡസ്-ബെൻസ് ജി-ക്ലാസിന് പരിഷ്‌കരിച്ച ഹുഡും പുനർരൂപകൽപ്പന ചെയ്‍ത ബമ്പറും ലഭിക്കുമെന്ന് പ്രതീക്ഷിക്കുന്നു. ഇരുവശത്തും, എസ്‌യുവിയുടെ രൂപകൽപ്പനയിലെ മാറ്റങ്ങൾ ട്വീക്ക് ചെയ്‍ത ഫെൻഡർ ഫ്ലെയറുകളിലും ഒരു കൂട്ടം പുതിയ അലോയ് വീലുകളിലും പരിമിതപ്പെടുത്തിയേക്കാം. പിൻഭാഗത്ത്, പുനർനിർമ്മിച്ച ടെയിൽ ലൈറ്റുകളും പുതുക്കിയ ബമ്പറും മോഡലിന് ലഭിക്കാൻ സാധ്യതയുണ്ട്.
പുതിയ മെഴ്സിഡസ് ബെന്‍സ് ജി ക്ലാസിന്റെ ഇന്റീരിയറിലെ മാറ്റങ്ങൾ MBUX സിസ്റ്റത്തിന്റെ രൂപത്തിൽ എത്തിയേക്കാം. കാരണം ഈ സുപ്രധാന അപ്‌ഡേറ്റ് ഇതുവരെ ലഭിക്കാത്ത ഒരേയൊരു മോഡൽ ജി ക്ലാസ് ആണ്. സെന്റർ കൺസോളിലേക്കോ ഡാഷ്‌ബോർഡിലേക്കോ ഉള്ള ഒരു അപ്‌ഡേറ്റ് ഇപ്പോൾ തള്ളിക്കളയാനാവില്ല.
വരാനിരിക്കുന്ന മെഴ്സിഡസ് ബെന്‍സ് ജി ക്ലാസ് ഫെയ്‌സ്‌ലിഫ്റ്റ് നിലവിലെ മോഡലിന് സമാനമായ എഞ്ചിനുകൾക്കൊപ്പം നൽകുമെന്ന് പ്രതീക്ഷിക്കുന്നു. ഇത് ഓരോ പ്രദേശത്തിനും വ്യത്യസ്‍തമായിരിക്കും, അടുത്ത വർഷം അവസാനം എത്തുമ്പോൾ ഇന്ത്യ-സ്പെക്ക് മോഡലിന് G63, G350d രൂപത്തിൽ തുടരാനാകും എന്നാണ് റിപ്പോര്‍ട്ടുകള്‍.
അതേസമയം ബെന്‍സിനെക്കുറിച്ചുള്ള മറ്റ് വാര്‍ത്തകള്‍ പരിശോധിക്കുമ്പോല്‍, ഓട്ടോമോട്ടീവ് വ്യവസായത്തെ പിടികൂടിയ അർദ്ധചാലക വിതരണ ശൃംഖലയിലെ തടസങ്ങള്‍ സാരമായി ബാധിച്ചതിനാൽ 2021-ൽ ജര്‍മ്മന്‍ വാഹന ഭീമനായ മെഴ്സിഡസ് ബെൻസ് ആഗോള വിൽപ്പനയിൽ അഞ്ച് ശതമാനം ഇടിവ് നേരിട്ടതായി കഴിഞ്ഞദിവസം റിപ്പോര്‍ട്ടുകള്‍ പുറത്തുവന്നിരുന്നു.
ജർമ്മൻ സ്ഥാപനം 2021 ജനുവരിക്കും ഡിസംബറിനും ഇടയിൽ 20,93,496 വാഹനങ്ങൾ വിറ്റതായും 2020 ലെ കൊവിഡ് വ്യാപനം ഏല്‍പ്പിച്ച ആഘാതത്തെ അപേക്ഷിച്ച് 70,691 യൂണിറ്റുകൾ കുറഞ്ഞതായും ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നു. നാലാം പാദത്തിൽ വിൽപ്പന 24.7 ശതമാനം ഇടിഞ്ഞെന്നുമാണ് റിപ്പോര്‍ട്ടുകള്‍.
അതേസമയം കമ്പനിയുടെ ഇലക്ട്രിക്ക് വാഹനങ്ങളുടെ വിൽപ്പന ഗണ്യമായി ഉയർന്നു എന്നാണ് കണക്കുകള്‍. 2,27,458 യൂണിറ്റ് ഇലക്ട്രിക്ക് വാഹനങ്ങളോളം 2021ല്‍ കമ്പനി വിറ്റു. ഇത് 69.3 ശതമാനം വളർച്ചയെ പ്രതിനിധീകരിക്കുന്നു. ഇതിൽ ഏതാണ്ട് 99,301 എണ്ണം പ്യുവർ-ഇലക്ട്രിക് ആയിരുന്നു. 90.3 ശതമാനം ആണ് ഉയർച്ച. സ്ഥാപനത്തിന്റെ ലക്ഷ്വറി, പ്രകടനം, ഓഫ്-റോഡ് സബ് ബ്രാൻഡുകൾ എന്നിവയും മികച്ച വില്‍പ്പന ഫലങ്ങൾ രേഖപ്പെടുത്തി. മെയ്ബാക്ക്, എഎംജി, ജി-ക്ലാസ് എന്നിവയുടെ വിൽപ്പന റെക്കോർഡ് രേഖപ്പെടുത്തി. “വെല്ലുവിളി നിറഞ്ഞ ഒരു വർഷത്തിൽ, മെയ്ബാക്ക്, എഎംജി, ജി-ക്ലാസ് വാഹനങ്ങൾ പുതിയ റെക്കോർഡുകൾ സൃഷ്ടിച്ചു,” മെഴ്സിഡസ് ബെൻസ് മാർക്കറ്റിംഗും വിൽപ്പനയും സംബന്ധിച്ച ബോർഡ് അംഗം ബ്രിട്ടാ സീഗർ പറഞ്ഞു.
ഏകദേശം 15,730 മെയ്ബാക്ക് മോഡലുകൾ വിറ്റഴിക്കപ്പെട്ടു.കൂടുതലും ചൈനയിൽ ആണ് മെയ്ബാക്ക് മോഡലുകൾ വന്‍ തോതില്‍ വിറ്റത് എന്നാണ് കണക്കുകള്‍. എസ്-ക്ലാസിന്റെ ഏകദേശം 900 യൂണിറ്റുകൾ ഓരോ മാസവും ഡെലിവറി ചെയ്‍തു. അതേസമയം, എഎംജി മോഡലുകളുടെ ആഗോള വിൽപ്പന 16.7 ശതമാനം ഉയർന്ന് 1,45,979 യൂണിറ്റിലെത്തി.
കഴിഞ്ഞ വർഷം ഓഗസ്റ്റിൽ പുറത്തിറക്കിയതിന് ശേഷം EQS ഇലക്ട്രിക് ലിമോസിനിന്റെ ഓർഡറുകൾ 16,370 ആയി ഉയർന്നതായി മെഴ്സിഡസ് ബെൻസ് അറിയിച്ചു. അതിന്റെ ഇലക്ട്രിക്, ഇലക്‌ട്രിഫൈഡ് കാർ ലൈനപ്പ് വളർന്നു കൊണ്ടിരിക്കുന്നതിനാൽ, തങ്ങളുടെ ലൈനപ്പിലുടനീളം തുടർച്ചയായ ഇടിവ് രേഖപ്പെടുത്തുമെന്ന് കമ്പനി പ്രതീക്ഷിക്കുന്നു. അർദ്ധചാലക വിതരണ തടസ്സങ്ങൾക്കിടയിലും 2021 നാലാം പാദത്തിൽ ഡിമാൻഡ് ഉയർന്നതാണെന്നും ഉപഭോക്താക്കൾ തങ്ങളുടെ ഓർഡറുകൾ പൂർത്തീകരിക്കുമെന്നും മെഴ്സിഡസ് ബെൻസ് പറയുന്നു.
കുതിച്ചുയരുന്ന ഉപഭോക്തൃ ഓർഡറുകൾ എത്രയും വേഗം പൂർത്തീകരിക്കാനാകുമെന്ന് ഉറപ്പാക്കാൻ മെഴ്സിഡസ് ബെൻസ് എല്ലാ ശ്രമങ്ങളും നടത്തുന്നുണ്ട്,” സീഗർ പറഞ്ഞു. “വാഹന ഉൽപ്പാദനത്തിനായി വിരളമായ ചിപ്പുകൾ അനുവദിക്കുമ്പോൾ ഒരു ഉപഭോക്താവ് ഓർഡർ നൽകിയ തീയതി കണക്കിലെടുക്കുന്നു. അർദ്ധചാലക വിതരണ സാഹചര്യം അസ്ഥിരമായി തുടരുന്നു, ഉത്പാദനത്തിന്റെയും വിൽപ്പനയുടെയും കാര്യത്തിൽ വരാനിരിക്കുന്ന പാദങ്ങളെ ക്ഷാമം ബാധിക്കുമെന്നാണ് കരുതുന്നത്.." അദ്ദേഹം വ്യക്തമാക്കുന്നു.
