പുതിയ റെനോ ഡസ്റ്റർ; ഇതാ അറിയേണ്ടതെല്ലാം

2012 ൽ ആദ്യമായി പുറത്തിറക്കിയ റെനോ ഡസ്റ്റർ ഇന്ത്യയിലെ ഇടത്തരം എസ്‌യുവി സെഗ്‌മെൻ്റിലെ ജനപ്രിയ മോഡൽ ആയിരുന്നു. പരുക്കൻ സ്റ്റൈലിംഗ്, സുഖപ്രദമായ ഇൻ്റീരിയർ, ഓഫ്-റോഡ് കഴിവുകൾ എന്നിവയ്ക്ക് എസ്‌യുവി എപ്പോഴും അംഗീകരിക്കപ്പെട്ടിട്ടുണ്ട്.  എന്നാൽ അതിൻ്റെ വിൽപ്പന ക്രമേണ കുറയാൻ തുടങ്ങുകയും മോശം വിൽപ്പന കാരണം 2022 ൻ്റെ തുടക്കത്തിൽ ഇത് നിർത്തലാക്കുകയും ചെയ്‍തു.

ഇന്ത്യയിൽ ഒന്നാം തലമുറ ഡസ്റ്റർ മാത്രമേ ഉണ്ടായിരുന്നുള്ളൂ. അതിൻ്റെ രണ്ടാം തലമുറ മോഡൽ ഇവിടെ വന്നിട്ടില്ല. ഇപ്പോൾ, ഒരു തലമുറയെ ഒഴിവാക്കി, 2025-ൽ എസ്‌യുവി അതിൻ്റെ മൂന്നാം തലമുറ രൂപത്തിൽ തിരിച്ചെത്താൻ ഒരുങ്ങുകയാണ്. മഹീന്ദ്ര XUV700, ടാറ്റ സഫാരി തുടങ്ങിയ എതിരാളികളെ വെല്ലുവിളിക്കാൻ റെനോ ഇത്തവണ പുതിയ ഡസ്റ്ററിൻ്റെ 7 സീറ്റർ പതിപ്പും അവതരിപ്പിക്കും. ഹ്യൂണ്ടായ് അൽകാസർ, കിയ സെൽറ്റോസ്, ഹ്യുണ്ടായ് ക്രെറ്റ, മാരുതി ഗ്രാൻഡ് വിറ്റാര, ടൊയോട്ട ഹൈറൈഡർ തുടങ്ങിയ എതിരാളികൾക്കെതിരെ ഇടത്തരം എസ്‌യുവി വിഭാഗത്തിൽ 2025 റെനോ ഡസ്റ്റർ (5-സീറ്റർ) മത്സരിക്കും.

പുതിയ റെനോ ഡസ്റ്ററിൻ്റെ രൂപകല്പന ഏറെക്കുറെ പ്രചോദിതമാകുന്നത് ഇതിനകം തന്നെ അനാച്ഛാദനം ചെയ്ത ഡാസിയ ഡസ്റ്ററിൽ നിന്നാണ്. അടുത്തിടെ എസ്‍യുിവിയുടെ RHD പതിപ്പ് (വലത്-കൈ ഡ്രൈവ്) ദക്ഷിണാഫ്രിക്കയിൽ വെളിപ്പെടുത്തിയിരുന്നു. ഇതേ മോഡൽ ഇന്ത്യൻ വിപണിയിലേക്കും എത്തും. എങ്കിലും, ഇന്ത്യ-സ്പെക്ക് പതിപ്പ് കൂടുതൽ സവിശേഷതകൾ വാഗ്‍ദാനം ചെയ്യും.

പ്രദർശിപ്പിച്ച RHD മോഡലിൽ 10.1 ഇഞ്ച് ഫ്രീ-സ്റ്റാൻഡിംഗ് ടച്ച്‌സ്‌ക്രീൻ ഇൻഫോടെയ്ൻമെൻ്റ് സിസ്റ്റം, 7 ഇഞ്ച് ഫുൾ ഡിജിറ്റൽ ഇൻസ്ട്രുമെൻ്റ് ക്ലസ്റ്റർ, 4WD സെലക്ടറിനുള്ള സർക്കുലർ ഡയൽ, മൂന്ന് സ്‌പോക്ക് സ്റ്റിയറിംഗ് വീൽ, പിൻ എസി വെൻ്റുകൾ എന്നിവ ഉൾപ്പെടുന്നു. ഇന്ത്യയിൽ, 2025 റെനോ ഡസ്റ്ററിൽ ADAS സാങ്കേതികവിദ്യയും മറ്റ് നിരവധി പ്രീമിയം സവിശേഷതകളും ഉൾപ്പെടും.

ഇന്ത്യ-സ്പെക്ക് 2025 റെനോ ഡസ്റ്ററിൻ്റെ എഞ്ചിൻ സവിശേഷതകൾ അതിൻ്റെ ഔദ്യോഗിക അനാച്ഛാദനത്തോടടുത്ത് വെളിപ്പെടുത്തും. പെട്രോൾ എഞ്ചിനിൽ മാത്രമേ ഇത് വരൂ എന്ന്  പ്രതീക്ഷിക്കുന്നു. ആഗോളതലത്തിൽ, ഈ എസ്‌യുവിക്ക് മൂന്ന് വ്യത്യസ്‍ത പവർട്രെയിനുകൾ അതായത് മൈൽഡ് ഹൈബ്രിഡ്, ശക്തമായ ഹൈബ്രിഡ്, എൽപിജി ഇന്ധന ഓപ്ഷൻ എന്നിവയുണ്ട്.

• Renault Duster