ചീറിപ്പാഞ്ഞ് എസ്‌യുവി, ഡാഷ്‌ബോർഡിൽ കാലുവെച്ച് ഉറക്കം നടിച്ച് ഡൈവർ, 'ജീവൻ നഷ്‍ടമാക്കൽ പ്രവർത്തനമോ' എന്ന് ജനം!
സോഷ്യൽ മീഡിയയിൽ റീലുകളുണ്ടാക്കുന്നതിനോ പൊങ്ങച്ചം കാണിക്കുന്നതിനോ ഒക്കെ ആയിരിക്കാം പലരും ഇങ്ങനെ ചെയ്യുന്നത്. എന്നാൽ സാങ്കേതികവിദ്യയുടെ ദുരുപയോഗം അത്തരം ഡ്രൈവർമാരുടെ ജീവൻ മാത്രമല്ല, മറ്റ് റോഡുപയോഗിക്കുന്നവരുടെയും ജീവൻ കൂടിയാണ് അപകടത്തിലാക്കുന്നത്.
 )
Followനമ്മുടെ ഡ്രൈവിംഗ് അനുഭവം മെച്ചപ്പെടുത്തുന്നതിനായി കാർ കമ്പനികൾ തുടർച്ചയായി പ്രവർത്തിക്കുകയാണ്. ഇക്കാലത്ത് പുതിയ നൂതന സാങ്കേതികവിദ്യയും സവിശേഷതകളും കാറുകളിൽ ഉൾപ്പെടുത്തിയിട്ടുണ്ട്. കാറുകളുടെ പ്രകടനം മെച്ചപ്പെടുത്തുന്നതിന് മാത്രമല്ല, ഉപയോക്താവിന് സുരക്ഷിതമായ ഡ്രൈവിംഗ് അനുഭവം ലഭിക്കുന്നതിനും വേണ്ടിയാണ് ഈ ഫീച്ചറുകൾ നൽകുന്നത്. എന്നാൽ ചില ഉപയോക്താക്കൾ ഈ ഫീച്ചറുകൾ ദുരുപയോഗം ചെയ്യുന്നതായി കാണുന്നു. സോഷ്യൽ മീഡിയയിൽ റീലുകളുണ്ടാക്കുന്നതിനോ പൊങ്ങച്ചം കാണിക്കുന്നതിനോ ഒക്കെ ആയിരിക്കാം പലരും ഇങ്ങനെ ചെയ്യുന്നത്. എന്നാൽ സാങ്കേതികവിദ്യയുടെ ദുരുപയോഗം അത്തരം ഡ്രൈവർമാരുടെ ജീവൻ മാത്രമല്ല, മറ്റ് റോഡുപയോഗിക്കുന്നവരുടെയും ജീവൻ കൂടിയാണ് അപകടത്തിലാക്കുന്നത്.
അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം (ADAS) ഇന്ന് കാറുകളിൽ ലഭ്യമാക്കിയിരിക്കുന്ന അത്യാധുനിക ഫീച്ചറാണ്. ഈ ഫീച്ചർ ഇന്ന് വളരെ ജനപ്രിയമാണ്. ഓട്ടോമോട്ടീവ് വ്യവസായത്തിലെ ഏറ്റവും വലിയ മുന്നേറ്റങ്ങളിലൊന്നാണ് അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം. ഈ സുരക്ഷാ സ്യൂട്ടിൽ ഡ്രൈവർമാരെ സമ്മർദരഹിതമായ ഡ്രൈവിംഗ് അനുഭവം നേടാൻ സഹായിക്കുന്ന നിരവധി സവിശേഷതകൾ ഉൾപ്പെടുന്നു. എന്നാൽ ഏറ്റവും പുതിയ സംഭവത്തിൽ, ഒരു ഡ്രൈവർ ഈ സവിശേഷത ദുരുപയോഗം ചെയ്യുന്ന ദൃശ്യങ്ങളാണ് വൈറലാകുന്നത്. ഈ മനുഷ്യൻ തന്റെ എസ്‌യുവി റോഡിലൂടെ വളരെ അശ്രദ്ധമായി ഓടിക്കുന്ന വീഡിയോ സോഷ്യൽ മീഡിയയില്‍ വൈറലായിരിക്കുകയാണ്.
ഈ വൈറൽ വീഡിയോയിൽ, മഹീന്ദ്ര XUV700 ൽ രണ്ട് പേർ ഇരിക്കുന്നത് കാണാം. അതിൽ ഡ്രൈവർ സ്റ്റിയറിംഗ് വീൽ ഉപേക്ഷിച്ച് ഡാഷ്‌ബോർഡിൽ കാലുകൾ വച്ചിട്ട് ഉറങ്ങുന്നതായി അഭിനയിക്കുന്നു. ഈ സമയത്ത്, കോ-ഡ്രൈവിംഗ് സീറ്റിൽ ഇരിക്കുന്നയാൾ മുന്നോട്ട് നോക്കാനും സ്റ്റിയറിംഗ് വീൽ പിടിക്കാനും ഡ്രൈവറോട് ആവർത്തിച്ച് ആവശ്യപ്പെടുന്നു. കാറിൽ ഫുൾ വോളിയത്തിൽ ഒരു ഗാനം പ്ലേ ചെയ്യുന്നു. ഈ സമയത്ത് വാഹനത്തിന്റെ വേഗത മണിക്കൂറിൽ ഏകദേശം 63 കിലോമീറ്ററാണ്. ഈ സംഭവം മുഴുവൻ കാറിന്റെ പിൻസീറ്റിൽ ഇരുന്ന ആരോ പകർത്തിയാണെന്ന് ചുരുക്കം. ന്നിരുന്നാലും, ഒരു ചെറിയ വൈറൽ വീഡിയോയ്‌ക്കായി ഡ്രൈവർ തന്റെ അപകടകരവും മൂകവുമായ പ്രവൃത്തി തുടരുന്നത് കാണാം.
അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം യഥാർത്ഥത്തിൽ ഡ്രൈവിംഗ് മെച്ചപ്പെടുത്തുന്നതിനായി നിരവധി വ്യത്യസ്ത സൗകര്യങ്ങൾ നൽകുന്ന ഒരു കൂട്ടം സവിശേഷതകളാണ്. മഹീന്ദ്ര XUV700ൽ എഡിഎഎസ് സംവിധാനമാണ് ഉപയോഗിച്ചിരിക്കുന്നത്. മനുഷ്യന്റെ പിഴവ് മൂലമുണ്ടാകുന്ന വാഹനാപകടങ്ങൾ ഒരു പരിധി വരെ കുറയ്ക്കാൻ ഈ സാങ്കേതികവിദ്യ സഹായിക്കുമെന്ന് വിശ്വസിക്കപ്പെടുന്നു. റഡാർ അധിഷ്ഠിത അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം, ചുറ്റുമുള്ള സാഹചര്യങ്ങളെയും പരിസ്ഥിതിയെയും അടിസ്ഥാനമാക്കിയുള്ള മൾട്ടി വിഷൻ അധിഷ്ഠിത അൽഗോരിതത്തിലാണ് പ്രവർത്തിക്കുന്നത്. അതിനനുസരിച്ച് സിസ്റ്റം പ്രോസസ്സ് ചെയ്യുന്നു.
എന്താണ് അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം?
ഇത് ഇപ്പോൾ രാജ്യത്തെ ഒന്നിലധികം മാസ് മാർക്കറ്റ് കാറുകളിൽ ലഭ്യമായ ഒരു സാധാരണ സാങ്കേതിക സവിശേഷതയാണ്. അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം സാങ്കേതികവിദ്യ അടിസ്ഥാനപരമായി ഒരു റഡാർ അധിഷ്ഠിത സാങ്കേതികവിദ്യയാണ്. അത് ഒരു നിശ്ചിത തലത്തിലുള്ള സ്വയം നിയന്ത്രണ ശേഷി വാഗ്ദാനം ചെയ്യുന്നു. ലളിതമായി പറഞ്ഞാൽ, ഡ്രൈവിംഗ് സമയത്ത് ഡ്രൈവറെ സഹായിക്കാൻ ഈ നൂതന സാങ്കേതികവിദ്യ ഉപയോഗിക്കുന്നു. അങ്ങനെ ഡ്രൈവറുടെ പ്രകടനം മെച്ചപ്പെടുത്താൻ സഹായിക്കുന്നു. ഈ സംവിധാനങ്ങൾ വാഹനത്തിന് ചുറ്റുമുള്ള അവസ്ഥകൾ നിരീക്ഷിക്കുന്നതിനും ഡ്രൈവർക്ക് വിവരങ്ങൾ നൽകുന്നതിനും അല്ലെങ്കിൽ ആവശ്യമുള്ളപ്പോൾ സ്വയം സജീവമാക്കുന്നതിനും സെൻസർ സാങ്കേതികവിദ്യ ഉപയോഗിക്കുന്നു.
ഇത് സെൻസറും ക്യാമറയും അടിസ്ഥാനമാക്കിയുള്ള സാങ്കേതികവിദ്യയാണ്. ക്യാമറ അധിഷ്ഠിത സെൻസറുകൾ ഉപയോഗിക്കുന്നതിലൂടെ, ഈ സംവിധാനങ്ങൾ ഡ്രൈവറെയും വാഹനത്തെയും ഡ്രൈവിംഗ് സാഹചര്യത്തെക്കുറിച്ച് ബോധവാന്മാരാക്കാൻ സഹായിക്കുന്നു. റോഡ് അടയാളങ്ങൾ, കാൽനടയാത്രക്കാർ, റോഡിലെ വാഹനങ്ങളുടെ സ്ഥാനം, മറ്റ് തടസ്സങ്ങൾ എന്നിവ കൃത്യമായി പകർത്താൻ നിരവധി വ്യത്യസ്ത ക്യാമറകൾ ഉപയോഗിക്കുന്നു. ഇത് സെൻസറുകളുടെ സഹായത്തോടെ വാഹനത്തിന് ചുറ്റുമുള്ള സാഹചര്യം പകർത്തി സിസ്റ്റത്തിൽ നൽകിയിരിക്കുന്ന സോഫ്‌റ്റ്‌വെയറിലേക്ക് അയയ്ക്കുന്നു.
ക്യാമറകൾ പകർത്തുന്ന ചിത്രങ്ങൾ സോഫ്‌റ്റ്‌വെയർ വിശകലനം ചെയ്യുകയും അതിന്റെ അടിസ്ഥാനത്തിൽ സുരക്ഷാ ഫീച്ചറുകൾ സജീവമാക്കുകയും ചെയ്യുന്നു. ഈ സംവിധാനത്തിന് ഏതെങ്കിലും തരത്തിലുള്ള അടിയന്തരാവസ്ഥയിൽ ഓട്ടോമാറ്റിക് എമർജൻസി ബ്രേക്കിംഗ് പ്രയോഗിക്കാൻ കഴിയും, അല്ലെങ്കിൽ വാഹനം അതിന്റെ പാതയിൽ നിന്ന് നീങ്ങുകയോ ബ്ലൈൻഡ് സ്പോട്ടിൽ ഒരു വാഹനം ഉണ്ടെങ്കിലോ, ഈ സാഹചര്യത്തിൽ ഈ സാങ്കേതികവിദ്യ വാഹനത്തെ നിയന്ത്രിക്കുന്നു.
മൊത്തത്തിൽ, ഈ സാങ്കേതികവിദ്യ വാഹനത്തിൽ അസിസ്റ്റന്റ് ഡ്രൈവറായി പ്രവർത്തിക്കുന്നു. എന്നാൽ ഈ സംവിധാനത്തെ പൂർണമായും ആശ്രയിക്കുന്നത് ഒട്ടും ഉചിതമല്ല. നിങ്ങളുടെ വാഹനത്തിൽ നൽകിയിരിക്കുന്ന അഡ്വാൻസ്ഡ് ഡ്രൈവിംഗ് അസിസ്റ്റൻസ് സിസ്റ്റം സാങ്കേതിക വിദ്യയുടെ നിലവാരത്തിൽ മാത്രം വാഹനം ഓടിക്കണമെന്നാണ് വിദഗ്ധരുടെ അഭിപ്രായം. എല്ലാത്തിനുമുപരി, ഇത് ഒരു യന്ത്രമാണ്. ഇത് പൂർണ്ണമായും സെൻസറുകളും ക്യാമറകളും അടിസ്ഥാനമാക്കിയാണ് പ്രവർത്തിക്കുന്നത്. അതിനാൽ, ഡ്രൈവിംഗ് മെച്ചപ്പെടുത്താൻ മാത്രം ഇത് ഉപയോഗിക്കുക. സ്റ്റിയറിംഗ് വീൽ പിടിക്കാതെ ഒരിക്കലും റോഡിൽ ഡ്രൈവ് ചെയ്യരുത്. അത് നിങ്ങളുടെ മാത്രമല്ല, മറ്റുള്ളവരുടെയും ജീവന് ഭീഷണിയാണ്.
