2026ലെ ലക്ഷ്യങ്ങള്‍ ഇതൊക്കെ; ഇന്നോവ മുതലാളിയുടെ മാസ്റ്റര്‍ പ്ലാൻ പുറത്ത്!
2026 ഓടെ 10 പുതിയ ഇവി മോഡലുകൾ പുറത്തിറക്കുമെന്നും പ്രതിവർഷം 1.5 ദശലക്ഷം ബാറ്ററി ഇലക്ട്രിക് വാഹനങ്ങൾ വിൽക്കുമെന്നും ഹൈബ്രിഡ്, പ്ലഗ്-ഇൻ ഹൈബ്രിഡ് മോഡലുകൾ ശക്തിപ്പെടുത്തുമെന്നും കമ്പനി അറിയിച്ചു.
 )
Followതങ്ങളുടെ വാഹന നിരയെ വൈദ്യുതീകരിക്കാനുള്ള ദീർഘകാലമായി കാത്തിരുന്ന പ്ലാൻ അനാച്ഛാദനം ചെയ്‌ത് ജാപ്പനീസ് ജനപ്രിയ വാഹന ബ്രാൻഡായ ടൊയോട്ട മോട്ടോർ കോർപ്പറേഷൻ. 2026 ഓടെ 10 പുതിയ ഇവി മോഡലുകൾ പുറത്തിറക്കുമെന്നും പ്രതിവർഷം 1.5 ദശലക്ഷം ബാറ്ററി ഇലക്ട്രിക് വാഹനങ്ങൾ വിൽക്കുമെന്നും ഹൈബ്രിഡ്, പ്ലഗ്-ഇൻ ഹൈബ്രിഡ് മോഡലുകൾ ശക്തിപ്പെടുത്തുമെന്നും കമ്പനി അറിയിച്ചു.
ഇലക്ട്രിക് വാഹന വിപണിയിലെ മറ്റ് പ്രധാന എതിരാളികളെ നേരിടാനും അവരുമായി മത്സരിക്കാനുമുള്ള ശ്രമത്തിലാണ് ജാപ്പനീസ് വാഹന നിർമ്മാതാവ് ഈ നീക്കം നടത്തുന്നത്. എന്നാൽ ടെസ്‌ല പോലുള്ള ഇവി എതിരാളികളെ എങ്ങനെ മറികടക്കാൻ പദ്ധതിയിടുന്നുവെന്ന് ടൊയോട്ട കൃത്യമായി വ്യക്തമാക്കിയിട്ടില്ല.
2035-ഓടെ അതിന്റെ ഉദ്‌വമനം പകുതിയായി കുറയ്ക്കാനും 2050-ഓടെ കാർബൺ ന്യൂട്രൽ ആക്കാനും ടൊയോട്ട ലക്ഷ്യമിടുന്നു. കമ്പനിയുടെ സിഇഒയും പ്രസിഡന്റും ആയ കോജി സാറ്റോ ആണ് ഇക്കാര്യം വ്യക്തമാക്കിയത്. മറ്റ് പല വാഹന നിർമ്മാതാക്കളും ചെയ്തതുപോലെ 100 ശതമാനം വൈദ്യുത ഭാവിയെ പൂർണ്ണമായും ടൊയോട്ട സ്വീകരിക്കില്ല എന്നും കാർബൺ ന്യൂട്രാലിറ്റിക്ക് ഒരു വ്യത്യസ്‍ത സമീപനമാണ് ടൊയോട്ടയ്ക്ക് ഉള്ളതെന്നുമാണ് റിപ്പോര്‍ട്ടുകള്‍.
വികസിത വിപണികളിൽ, ടൊയോട്ട അതിന്റെ ബിസെഡ് സീരീസ് ഇവികളുടെ പ്രകടനം മെച്ചപ്പെടുത്താൻ പദ്ധതിയിടുന്നുണ്ട്. വടക്കേ അമേരിക്കയിൽ 2025-ഓടെ പ്രാദേശികമായി നിർമ്മിക്കുന്ന ബാറ്ററി എസ്‌യുവി ഉണ്ടാക്കാനും ബാറ്ററി പ്ലാന്റ് ഉത്പാദനം വർദ്ധിപ്പിക്കാനും പദ്ധതിയിടുന്നു. ചൈനയിൽ, 2024 ഓടെ പ്രാദേശികമായി വികസിപ്പിച്ച രണ്ട് ഇലക്ട്രിക് മോഡലുകൾ കൂട്ടിച്ചേർക്കാൻ പദ്ധതിയിടുന്നു. ഏഷ്യയിൽ, ടൊയോട്ട ബാറ്ററി പിക്ക്-അപ്പ് ട്രക്കുകളിലും കോംപാക്റ്റ് ഇലക്ട്രിക് കാറുകളിലും ശ്രദ്ധ കേന്ദ്രീകരിക്കും.
നീണ്ടുനിൽക്കുന്ന കൊവിഡ് മഹാമാരി പ്രതിസന്ധികള്‍, വിതരണ ശൃംഖലകളിലെ തടസങ്ങള്‍, അർദ്ധചാലക ക്ഷാമം എന്നിവ തരണം ചെയ്യുമ്പോൾ ആദ്യം മുതൽ ഒരു സമർപ്പിത ഇവി പ്രൊഡക്ഷൻ പ്ലാറ്റ്ഫോം നിർമ്മിക്കുന്നത് കമ്പനിയുടെ മുൻ‌ഗണനയാണെന്ന് സറ്റോ അറിയിച്ചു.ഈ വർഷം 10.6 ദശലക്ഷം കാറുകൾ ടൊയോട്ട നിർമ്മിക്കുമെന്ന് പ്രതീക്ഷിക്കുന്നു. വൈദ്യുതീകരണത്തിന്റെയും ബുദ്ധിശക്തിയുള്ള വാഹനങ്ങളുടെയും ഒരു പുതിയ യുഗത്തിലേക്കാണ് ടൊയോട്ടയുടെ സഞ്ചാരമെന്നും കമ്പനി പറയുന്നു.
2021 ഡിസംബറിൽ, 2030-ഓടെ പ്രതിവർഷം 3.5 ദശലക്ഷം ഇവികൾ വിൽക്കുമെന്ന് ടൊയോട്ട പ്രതിജ്ഞയെടുത്തിരുന്നു. എന്നാൽ 2022 മാർച്ചിൽ അവസാനിച്ച സാമ്പത്തിക വർഷത്തിൽ വിറ്റ 9.5 ദശലക്ഷം കാറുകളിൽ 16,000 എണ്ണം ബാറ്ററിയിൽ പ്രവർത്തിക്കുന്ന വാഹനങ്ങളാണ്. അത്രയും ഇലക്ട്രിക് വാഹനങ്ങൾ വിൽക്കുക എന്നതാണ് കമ്പനിയുടെ ലക്ഷ്യം.
