20,000 കോടി നിക്ഷേപം, 20,000 തൊഴിലവസരങ്ങൾ! ഈ സംസ്ഥാനത്ത് ടൊയോട്ട പ്ലാന്‍റ് വരുന്നൂ, ധാരണാപത്രം ഒപ്പിട്ടു
ഛത്രപതി സംഭാജി നഗറിൽ ഗ്രീൻഫീൽഡ് നിർമ്മാണ പ്ലാൻ്റ് സ്ഥാപിക്കുമെന്ന് ടൊയോട്ട കിർലോസ്കർ മോട്ടോർ (ടികെഎം) പ്രസ്താവനയിൽ പറഞ്ഞു. ഇലക്ട്രിക്, ഹൈബ്രിഡ് കാറുകൾ ഇവിടെ നിർമിക്കും. ഇതിനായി ഏകദേശം 20,000 കോടി രൂപ നിക്ഷേപിക്കാനാണ് കമ്പനി പദ്ധതിയിട്ടിരിക്കുന്നത്.
 )
Followമഹാരാഷ്ട്രയിൽ ഏകദേശം 20,000 കോടി രൂപ മുതൽമുടക്കിൽ പുതിയ നിർമാണ പ്ലാൻ്റ് സ്ഥാപിക്കുമെന്ന് പ്രമുഖ ജാപ്പനീസ് കാർ നിർമാതാക്കളായ ടൊയോട്ട കിർലോസ്കർ മോട്ടോർ അറിയിച്ചു. സംസ്ഥാന സർക്കാരിൻ്റെ വ്യവസായ വകുപ്പും ടൊയോട്ട കിർലോസ്കർ മോട്ടോറും തമ്മിൽ ഛത്രപതി സംഭാജിനഗറിലെ ഔറിക് സിറ്റിയിൽ ഇലക്ട്രിക്, ഹൈബ്രിഡ് കാറുകളുടെ നിർമ്മാണത്തിനുള്ള ധാരണാപത്രം (എംഒയു) ഒപ്പുവച്ചു.
ഛത്രപതി സംഭാജി നഗറിൽ ഗ്രീൻഫീൽഡ് നിർമ്മാണ പ്ലാൻ്റ് സ്ഥാപിക്കുമെന്ന് ടൊയോട്ട കിർലോസ്കർ മോട്ടോർ (ടികെഎം) പ്രസ്താവനയിൽ പറഞ്ഞു. ഇലക്ട്രിക്, ഹൈബ്രിഡ് കാറുകൾ ഇവിടെ നിർമിക്കും. ഇതിനായി ഏകദേശം 20,000 കോടി രൂപ നിക്ഷേപിക്കാനാണ് കമ്പനി പദ്ധതിയിട്ടിരിക്കുന്നത്. അതേസമയം, ഛത്രപതി സംഭാജിനഗറിലെ ടൊയോട്ട കിർലോസ്‌കറിൻ്റെ പദ്ധതി മറാത്ത്‌വാഡയ്ക്ക് മാത്രമല്ല, സംസ്ഥാനത്തും ഇന്ത്യയിലുടനീളമുള്ള ഓട്ടോമോട്ടീവ് നിർമ്മാണ വ്യവസായത്തിൽ വിപ്ലവം സൃഷ്ടിക്കുമെന്ന് മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ പറഞ്ഞു.
ടൊയോട്ട കിർലോസ്കർ മോട്ടോറിൻ്റെ ആസ്ഥാനം കർണാടകയിലാണ്. ഇവിടെ കമ്പനിക്ക് ഇതിനകം ബെംഗളൂരുവിനടുത്തുള്ള ബിദാദിയിൽ രണ്ട് പ്ലാൻ്റുകളുണ്ട്. ഈ പ്ലാൻ്റുകളിൽ കമ്പനി ടൊയോട്ട ഫോർച്യൂണർ, ഇന്നോവ ക്രിസ്റ്റ, ഹൈറൈഡർ തുടങ്ങിയ പ്രശസ്ത കാറുകളുടെ മോഡലുകൾ നിർമ്മിക്കുന്നു. കർണാടകയിൽ മാത്രം ടൊയോട്ട, അസോസിയേറ്റ് കമ്പനികൾ ഉൾപ്പെടെ 16,000 കോടിയിലധികം രൂപ നിക്ഷേപിക്കുകയും ഏകദേശം 86,000 പേർക്ക് പ്രത്യക്ഷമായും പരോക്ഷമായും തൊഴിൽ നൽകുകയും ചെയ്തിട്ടുണ്ട്.
ഛത്രപതി സംഭാജി നഗറിലെ ടൊയോട്ട കിർലോസ്കർ മോട്ടോർ കമ്പനിയുടെ 20,000 കോടി രൂപയുടെ നിക്ഷേപം മഹാരാഷ്ട്രയെ ഓട്ടോമൊബൈൽ മേഖലയിൽ ഒരു ചുവടുവെയ്‌ക്കും. ഈ നിക്ഷേപം 8,000 നേരിട്ടും 12,000 പരോക്ഷ തൊഴിലവസരങ്ങളും സൃഷ്ടിക്കുമെന്ന് ഉപമുഖ്യമന്ത്രി ദേവേന്ദ്ര ഫഡ്‌നാവിസ് സോഷ്യൽ മീഡിയയിൽ കുറിച്ചു.
ഈ പ്രോജക്റ്റിൽ നിന്ന് പ്രതിവർഷം നാലുലക്ഷം കാറുകൾ ഉൽപ്പാദിപ്പിക്കുക എന്ന ലക്ഷ്യത്തോടെയാണ് ടൊയോട്ട പ്രവർത്തിക്കുന്നത് എന്നാണ് റിപ്പോര്‍ട്ടുകൾ. അടുത്ത മൂന്ന് വർഷത്തിനുള്ളിൽ ഇവിടെ വാഹനങ്ങളുടെ ഉത്പാദനം ആരംഭിക്കുമെന്നാണ് പ്രതീക്ഷിക്കുന്നത്. കർണാടകയിൽ മറ്റൊരു പുതിയ പ്ലാൻ്റ് സ്ഥാപിക്കാനുള്ള പദ്ധതിയിലും കമ്പനി പ്രവർത്തിക്കുന്നുണ്ട്. 2026 ഓടെ അവിടെയുള്ള മൂന്നാമത്തെ പ്ലാൻ്റിൽ വാഹന നിർമാണം ആരംഭിക്കാൻ സാധ്യതയുണ്ടെന്നും റിപ്പോര്‍ട്ടുകൾ പറയുന്നു.
