ടാറ്റയുടെ പണിപ്പുരയില്‍ ഇനി 'ജീപ്പും' പിറക്കും, നടുക്കം വിട്ടുമാറാതെ മഹീന്ദ്രയും ഥാറും!
ജീപ്പ് എസ്യുവി അല്ലെങ്കിൽ മഹീന്ദ്ര ഥാർ പോലുള്ള മോഡലുകളോട് മത്സരിക്കാൻ പരുക്കൻ 4X4 എസ്യുവി അവതരിപ്പിക്കുന്നത് ടാറ്റ മോട്ടോഴ്‌സ് പരിഗണിക്കുന്നു എന്നാണ് പുതിയ റിപ്പോര്‍ട്ടുകള്‍.
ഇന്ത്യൻ വിപണിയില്‍ വേറിട്ട ഉൽപ്പന്ന തന്ത്രങ്ങളുമായി ടാറ്റ മോട്ടോഴ്‌സ് ആക്രമണോത്സുകമായി മുന്നേറുകയാണ്. പുതിയ നെക്സോണ്‍, ഹാരിയര്‍ ഇവി, പഞ്ച് ഇവി, കര്‍വ്വ് എസ്യുവി കൂപ്പെ എന്നിവയുൾപ്പെടെ നാല്പുതിയ ഇലക്ട്രിക് എസ്‌യുവികൾ പുറത്തിറക്കുമെന്ന് കമ്പനി ഔദ്യോഗികമായി പ്രഖ്യാപിച്ചിട്ടുണ്ട് . ഇപ്പോഴിതാ വാഹനലോകത്തെ ആകെ അമ്പരപ്പിച്ചുകൊണ്ടു പുതിയൊരു മോഡല്‍ കൂടി അവതരിപ്പിക്കാനാണ് ടാറ്റയുടെ നീക്കം എന്നാണ് പുതിയ റിപ്പോര്‍ട്ടുകള്‍. ജീപ്പ് എസ്യുവി അല്ലെങ്കിൽ മഹീന്ദ്ര ഥാർ പോലുള്ള മോഡലുകളോട് മത്സരിക്കാൻ പരുക്കൻ 4X4 എസ്യുവി അവതരിപ്പിക്കുന്നത് ടാറ്റ മോട്ടോഴ്‌സ് പരിഗണിക്കുന്നു എന്നാണ് റിപ്പോര്‍ട്ടുകള്‍. വരും വർഷങ്ങളിൽ വിപണിയിൽ ശക്തമായ ചുവടുറപ്പിക്കാനും ഓട്ടോമോട്ടീവ് മേഖലയിൽ വിഹിതം വിപുലപ്പെടുത്താനുമാണ് ഈ നീക്കം.
അടുത്തിടെ നടന്ന ഒരു കോൺഫറൻസിൽ, വളരുന്ന ഇന്ത്യൻ വിപണിയിൽ ജീപ്പിന് സമാനമായ പരുക്കൻ എസ്‌യുവിയുടെ സാധ്യതയെക്കുറിച്ച് ടാറ്റ മോട്ടോഴ്‌സിന്റെ ചെയർമാൻ എൻ ചന്ദ്രശേഖരൻ സൂചന നൽകി. മഹീന്ദ്ര ഥാർ, മാരുതി സുസുക്കി ജിംനി എന്നിവയെ വെല്ലുവിളിച്ചേക്കാവുന്ന പുതിയ ലൈഫ്‌സ്‌റ്റൈൽ എസ്യുവി വികസിപ്പിച്ചുകൊണ്ടിരിക്കുകയാണ്.
ടാറ്റ മോട്ടോഴ്‌സിന്റെ 78-ാമത് വാർഷിക പൊതുയോഗത്തിനിടെയാണ് കമ്പനിയുടെ ജീപ്പിന് സമാനമായ എസ്യുവി അവതരിപ്പിക്കുന്നതിനെക്കുറിച്ച് ഒരു ഷെയർഹോൾഡർ ചോദ്യം ഉന്നയിച്ചത്. പ്രതികരണമായി, ടാറ്റ മോട്ടോഴ്‌സിന്റെ ചെയർമാൻ എൻ ചന്ദ്രശേഖരൻ, ജീപ്പ് പോലുള്ള എസ്‌യുവിയുടെ വികസനം ഉൾപ്പെടെ വിവിധ സാധ്യതകൾ വിലയിരുത്തുന്നതിൽ കമ്പനിയുടെ താൽപ്പര്യം സ്ഥിരീകരിച്ചു.
വൈവിധ്യമാർന്ന വാഹനങ്ങൾ വാഗ്ദാനം ചെയ്യുന്ന ഇന്ത്യൻ എസ്യുവി വിപണിയിൽ ടാറ്റ മോട്ടോഴ്‌സ് ഒരു പ്രധാന കമ്പനിയാണ്. പഞ്ച് പോലുള്ള എൻട്രി ലെവൽ മോഡലുകൾ മുതൽ 7 സീറ്റർ സഫാരി എസ്യുവി വരെ വ്യാപിച്ചുകിടക്കുന്ന ഉൽപ്പന്നങ്ങൾക്കൊപ്പം, ടാറ്റ മോട്ടോഴ്‌സ് ഇതിനകം തന്നെ എസ്യുവി വിഭാഗത്തിൽ ശക്തമായ സ്ഥാനം നേടിയിട്ടുണ്ട്.
ടാറ്റ മോട്ടോഴ്‌സ് ഓപ്ഷനുകൾ സജീവമായി പര്യവേക്ഷണം ചെയ്യുന്നുണ്ടെന്നും വ്യത്യസ്തതയുടെ കാര്യത്തിൽ വേറിട്ടുനിൽക്കുന്ന ഒരു ഉൽപ്പന്നം പുറത്തിറക്കാൻ പ്രതിജ്ഞാബദ്ധമാണെന്നും ചന്ദ്രശേഖരൻ ഊന്നിപ്പറഞ്ഞു. നിലവിലുള്ള മോഡലുകളുടെ അനുകരണത്തിനുപകരം സവിശേഷമായ ഒരു ഓഫർ വികസിപ്പിക്കുന്നതിൽ കമ്പനി ശ്രദ്ധിക്കുന്നുണ്ടെന്നും അദ്ദേഹം എടുത്തുപറഞ്ഞു.
അതേസമയം ടാറ്റ മോട്ടോഴ്‌സ് 2024-ന്റെ തുടക്കത്തിൽ ഒരു പുതിയ ക്രോസ്ഓവർ കൂപ്പെ കര്‍വ്വ് അവതരിപ്പിക്കും. ഇത് മുഖ്യധാരാ ഇടത്തരം എസ്യുവി വിഭാഗത്തിൽ ഒരു പുതിയ സെഗ്‌മെന്റ് ആരംഭിക്കും. 2025ഓടെ ഐക്കണിക് സിയറ ലൈഫ്‌സ്‌റ്റൈൽ എസ്‌യുവിയെ ടാറ്റ തിരികെ കൊണ്ടുവരും. മുമ്പ്, ടാറ്റ മോട്ടോഴ്‌സ് സഫാരി, സിയറ തുടങ്ങിയ 4×4 ശേഷിയുള്ള ഒന്നിലധികം ലൈഫ്‌സ്‌റ്റൈൽ എസ്‌യുവികൾ വിതരണം ചെയ്തിരുന്നു. 2023 ഓട്ടോ എക്‌സ്‌പോയിൽ 4 വീൽ ഡ്രൈവ് ശേഷിയുള്ള ഹാരിയർ ഇവിയും കമ്പനി പ്രദർശിപ്പിച്ചിരുന്നു.
രാജ്യത്ത് താങ്ങാനാവുന്ന ലൈഫ്‌സ്‌റ്റൈൽ എസ്യുവി സെഗ്‌മെന്റിന് കനത്ത ഡിമാൻഡാണ്. മഹീന്ദ്ര ഥാറിന്റെ പുതിയ പതിപ്പ് 2020-ൽ ലോഞ്ച് ചെയ്തതുമുതൽ ഡിമാൻഡിൽ വൻ കുതിച്ചുചാട്ടത്തിന് സാക്ഷ്യം വഹിച്ചിട്ടുണ്ട്. 2020-ൽ പുറത്തിറക്കിയതിന് ശേഷം ഇതിനകം ഒരുലക്ഷം മഹീന്ദ്ര ഥാർ വിറ്റുകഴിഞ്ഞു. പുതിയ ഥാറിനായി കമ്പനിക്ക് നിലവിൽ 68,000 ബുക്കിംഗുകളും ലഭിച്ചിട്ടുണ്ട്. എസ്‌യുവിക്ക് ഒരുവർഷത്തിലധികം കാത്തിരിപ്പ് കാലയളവ് നൽകുന്നു. ടാറ്റ മോട്ടോഴ്‌സ് ഈ സെഗ്‌മെന്റിൽ പ്രവേശിച്ചാല്‍ അത് ഥാറിന് കനത്ത വെല്ലുവിളിയാകും. മഹീന്ദ്ര ഥാറുമായി അതിന്റെ സെഗ്‌മെന്റിൽ മത്സരിക്കുന്ന ഫോഴ്‌സ് ഗൂർഖയ്‍ക്കും അടുത്തിടെ മാരുതി സുസുക്കി ശക്തമായ 4×4 കഴിവുകളോടെ അവതരിപ്പിച്ച ജിംനി ലൈഫ്‌സ്‌റ്റൈൽ എസ്‌യുവിക്കും വൻ ഡിമാൻഡാണ്. ഈ പുതിയ എസ്‌യുവിക്കായി മാരുതി സുസുക്കിക്ക് ഇതിനകം 50,000 ബുക്കിംഗുകൾ ലഭിച്ചു.
