ഇത്രയും മാരുതി കാറുകളില്‍ ബ്രേക്കിംഗ് തകരാര്‍; ഇക്കൂട്ടത്തില്‍ നിങ്ങളുടെ വണ്ടിയും ഉണ്ടോ?
2016 ഒക്ടോബർ 27 നും 2019 നവംബർ ഒന്നിനും ഇടയിൽ നിർമ്മിച്ച വാഹനങ്ങളാണ് തകരാറുള്ള വാഹനങ്ങളെന്ന് മാരുതി സുസുക്കി അറിയിച്ചതായി വിവിധ ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
 )
Followബ്രേക്കിംഗ് സിസ്റ്റത്തിന്‍റെ ഒരു ഭാഗത്തെ തകരാറിനെത്തുടർന്ന് ഇന്ത്യയിലെ ഏറ്റവും വലിയ യാത്രാ വാഹന നിർമ്മാതാക്കളായ മാരുതി സുസുക്കി ബലേനോ ആര്‍എസിന്റെ 7,213 യൂണിറ്റുകൾ തിരികെ വിളിക്കുന്നതായി പ്രഖ്യാപിച്ചു. 2016 ഒക്ടോബർ 27 നും 2019 നവംബർ ഒന്നിനും ഇടയിൽ നിർമ്മിച്ച വാഹനങ്ങളാണ് തകരാറുള്ളവയെന്ന് മാരുതി സുസുക്കി അറിയിച്ചതായി വിവിധ ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.
കാറിന്‍റെ ബ്രേക്ക് പ്രവർത്തനത്തെ സഹായിക്കുന്ന വാക്വം പമ്പിലെ സംശയാസ്‍പദമായ പ്രശ്നം പരിഹരിക്കുന്നതിനാണ് തിരിച്ചുവിളിക്കുന്നത്. വാക്വം പമ്പ് തകരാറിലാകാൻ സാധ്യതയുള്ള വാഹനങ്ങൾക്ക് ബ്രേക്ക് പെഡൽ പ്രയോഗത്തിൽ കൂടുതൽ പരിശ്രമം ആവശ്യമായി വരുമെന്ന് മാരുതി വ്യക്തമാക്കി. തൽഫലമായി, ബ്രേക്കിംഗില്‍ പ്രശ്നം സംഭവിച്ചേക്കാമെന്നാണ് റിപ്പോര്‍ട്ടുകള്‍.
ഈ പ്രശ്നം പരിഹരിക്കുന്നതിനായി, മാരുതി സുസുക്കിയുടെ അംഗീകൃത ഡീലർ വർക്ക്‌ഷോപ്പുകൾ തകരാറിലായ വാഹന ഉടമകളുമായി ബന്ധപ്പെട്ട് തകരാറുള്ള ഭാഗം സൗജന്യമായി മാറ്റിസ്ഥാപിക്കുന്നതിന് ക്രമീകരിക്കും. ഈ കാലയളവിലെ വാഹന യൂണിറ്റുകൾ വാങ്ങിയ ഉപഭോക്താക്കളെ കമ്പനി ഫോൺ, മെസേജ്, ഇമെയിൽ എന്നിവ വഴി അറിയിക്കും. ഇതിന് പുറമെ അടുത്തുള്ള ഷോറൂമിൽ നിന്നും സർവീസ് സെന്ററിൽ നിന്നും ഉടമകള്‍ക്ക് വിവരങ്ങൾ നേടാനാകും. എസ്‌യുവി പരിശോധനയ്ക്കായി സേവന കേന്ദ്രത്തിലേക്ക് അയയ്‌ക്കണം. അവിടെ പിഴവുകൾ സൗജന്യമായി പരിഹരിച്ചു നല്‍കും എന്നുമാണ് കമ്പനി പറയുന്നത്.
ടോപ്പ്-സ്പെക്ക് ആൽഫ വേരിയന്റിനെ അടിസ്ഥാനമാക്കി, ബലേനോ ആര്‍എസിന് 1.0-ലിറ്റർ, ഇൻലൈൻ-ത്രീ-സിലിണ്ടർ, ടർബോചാർജ്ഡ് ബൂസ്റ്റർജെറ്റ് പെട്രോൾ എഞ്ചിൻ 110PS ഉം 149Nm ടോര്‍ക്കും ഉത്പാദിപ്പിക്കുന്നു. ഇത് അഞ്ച് സ്പീഡ് മാനുവൽ ട്രാൻസ്‍മിഷനുമായി ബന്ധിപ്പിച്ചിരിക്കുന്നു. പുതുതായി പുറത്തിറക്കിയ ഫ്രോങ്‌ക്സിലും ഇതേ എഞ്ചിനാണ് നൽകുന്നത്. ഇത് ഇപ്പോൾ മൈൽഡ്-ഹൈബ്രിഡ് പ്രവർത്തനക്ഷമത നേടുന്നു.
അതേസമയം കഴിഞ്ഞ അഞ്ച് മാസത്തിനിടയിലെ മാരുതി സുസുക്കിയുടെ നാലാമത്തെ തിരിച്ചുവിളിയാണ് ഇതെന്നാണ് റിപ്പോര്‍ട്ടുകള്‍. കാരണം ബ്രാൻഡ് ഇതിനകം മൂന്ന് തിരിച്ചുവിളികൾ പ്രഖ്യാപിച്ചിട്ടുണ്ട്. എയർബാഗ് കൺട്രോളറിലെ തകരാർ കാരണം 2023 ജനുവരിയിൽ ആൾട്ടോ കെ10, എസ്-പ്രസ്സോ, ഗ്രാൻഡ് വിറ്റാര, ഇക്കോ, ബ്രെസ്സ, ബലെനോ എന്നിവയുടെ 17,362 യൂണിറ്റുകൾ മാരുതി തിരിച്ചുവിളിച്ചു. ഈ മോഡലുകൾ 2022 ഡിസംബർ 8 നും 2023 ജനുവരി 12 നും ഇടയിൽ നിർമ്മിച്ചതാണ്. ഈ വർഷം അതേ മാസം, പിൻ സീറ്റ് ബെൽറ്റ് മൗണ്ടിംഗ് ബ്രാക്കറ്റുകളിൽ ഉണ്ടായേക്കാവുന്ന തകരാർ പരിഹരിക്കുന്നതിനായി 2022 ഓഗസ്റ്റ് 8 നും 2022 നവംബർ 15 നും ഇടയിൽ നിർമ്മിച്ച ഗ്രാൻഡ് വിറ്റാരയുടെ 11,177 യൂണിറ്റുകൾ കമ്പനി തിരിച്ചുവിളിച്ചു.
2022 ഡിസംബറിൽ, മുൻ നിര സീറ്റ് ബെൽറ്റുകളിലെ തകരാർ കാരണം ഗ്രാൻഡ് വിറ്റാര, ബ്രെസ്സ, XL6, സിയാസ്, എർട്ടിഗ എന്നിവയുടെ 9,125 യൂണിറ്റുകൾ തിരിച്ചുവിളിക്കുന്നതായി മാരുതി സുസുക്കി പ്രഖ്യാപിച്ചിരുന്നു. ഈ വാഹനങ്ങൾ 2022 നവംബർ രണ്ടു മുതൽ നവംബർ 28 വരെ നിർമ്മിച്ചവയാണ്.
