കശ്‍മീർ- കന്യാകുമാരി സൂപ്പര്‍റോഡ് ഒറ്റവര്‍ഷത്തിനകം; അമ്പരപ്പിക്കും പ്രഖ്യാപനവുമായി ഗഡ്‍കരി!
ഏഷ്യയിലെ ഏറ്റവും ഉയരം കൂടിയ സോജില ടണലിന്റെ സർവേയ്‌ക്കിടെയാണ് നിതിൻ ഗഡ്‍കരി ഇക്കാര്യം വ്യക്തമാക്കിയത്.
 )
Followകശ്‍മീരിൽ നിന്ന് കന്യാകുമാരിയിലേക്ക്, ഇന്ത്യയുടെ വടക്കും തെക്കും, പുതുതായി സ്ഥാപിച്ച ഹൈവേകളിലൂടെ നിങ്ങൾക്ക് താമസിയാതെ ഡ്രൈവ് ചെയ്യാം. അടുത്ത വർഷത്തോടെ പുതിയ റോഡ് ഉപയോഗത്തിന് തയ്യാറാകുമെന്ന് ഗതാഗത-ഹൈവേ മന്ത്രി നിതിൻ ഗഡ്‍കരിയാണ് വാഗ്‍ദാനം ചെയ്‍ത്. ഏഷ്യയിലെ ഏറ്റവും ഉയരം കൂടിയ സോജില ടണലിന്റെ സർവേയ്‌ക്കിടെയാണ് നിതിൻ ഗഡ്‍കരി ഇക്കാര്യം വ്യക്തമാക്കിയത്.
നാഷണൽ ഹൈവേ അതോറിറ്റി ഓഫ് ഇന്ത്യ (NHAI) രാജ്യത്തിന്റെ വിവിധ കോണുകളെ ബന്ധിപ്പിക്കുന്ന പുതിയ ഹൈവേകളുടെയും എക്സ്പ്രസ് വേകളുടെയും നിർമ്മാണത്തിൽ ഏർപ്പെട്ടിരിക്കുകയാണ്. കശ്‍മീരിനെയും കന്യാകുമാരിയെയും ബന്ധിപ്പിക്കുന്ന പുതിയ ഹൈവേ സമീപകാലത്ത് നിർമിക്കുന്ന ഏറ്റവും ദൈർഘ്യമേറിയതാണ്.
പുതിയ ഹൈവേ അടിസ്ഥാനപരമായി നിലവിലുള്ളതും വരാനിരിക്കുന്നതുമായ ഹൈവേകളുമായും എക്സ്പ്രസ് വേകളുമായും പരസ്പരബന്ധിതമായിരിക്കുമെന്നും ഗഡ്‍കരി വ്യക്തമാക്കി. “കശ്‍മീർ മുതൽ കന്യാകുമാരി വരെയുള്ള പാത ഞങ്ങൾക്ക് ഒരു സ്വപ്നമായിരുന്നു. റോഹ്താങ് മുതൽ ലഡാക്ക് വരെ നാല് തുരങ്കങ്ങൾ നിർമ്മിക്കും. ലേയിൽ നിന്ന് ഞങ്ങൾ കാർഗിലിലെത്തി സോജില, ഇസഡ്-മോർ തുരങ്കങ്ങളിൽ ചേരും. പുതിയ പാത വന്നാൽ ഡൽഹിയും ചെന്നൈയും തമ്മിലുള്ള ദൂരം 1,312 കിലോമീറ്റർ കുറയും. 2024-ന്റെ തുടക്കത്തോടെ ഈ സ്വപ്നം സാക്ഷാത്കരിക്കും.." ഗഡ്‍കരി വ്യക്തമാക്കി.
സമുദ്രനിരപ്പിൽ നിന്ന് 11,000 അടിയിലധികം ഉയരത്തിൽ നിർമ്മിക്കുന്ന 13 കിലോമീറ്റർ നീളമുള്ള സോജില ടണൽ, കശ്മീരിനെ ഇന്ത്യയുടെ തെക്കേ അറ്റത്തുള്ള കന്യാകുമാരിയുമായി ബന്ധിപ്പിക്കുന്നതിൽ നിർണായക പങ്ക് വഹിക്കും. ലഡാക്ക് പോലെയുള്ള രാജ്യത്തിന്റെ വിദൂര ഭാഗങ്ങളിലേക്ക് പ്രവേശിക്കുന്നതിനും കനത്ത മഞ്ഞുവീഴ്‍ച കാരണം ശൈത്യകാലത്ത് എത്തിച്ചേരാനാകാത്ത സോജില പാസിനെ ആശ്രയിക്കുന്നത് കുറയ്ക്കുന്നതിനുമുള്ള ഒരു പാതയായിരിക്കും ഈ തുരങ്കം.
അതേസമയം കശ്‍മീരിനെയും കന്യാകുമാരിയെയും ബന്ധിപ്പിക്കുന്ന പുതിയ പാതയുടെ റൂട്ട് സംബന്ധിച്ച് നിതിൻ ഗഡ്‍കരി ഒരു വിശദാംശവും പങ്കിട്ടില്ല. പുതിയ പാതയുടെ ഡൽഹി മുതൽ ചെന്നൈ വരെയുള്ള ഭാഗം വരാനിരിക്കുന്ന 1,350 കിലോമീറ്റർ നീളമുള്ള സൂറത്ത്-ചെന്നൈ എക്സ്പ്രസ് വേയിലൂടെ ബന്ധിപ്പിക്കാൻ സാധ്യതയുണ്ട്. ഇതുവരെ റൂട്ടിന്റെ വിശദാംശങ്ങളൊന്നും എൻഎച്ച്എഐയും പങ്കിട്ടിട്ടില്ല.
അടുത്തകാലത്തായി നിരവധി ദേശീയപാതകളുടെ നിര്‍മ്മാണത്തിലാണ് ദേശീയപാതാ അതോറിറ്റി. ഗ്രീൻഫീൽഡ് എക്സ്പ്രസ് വേ, ഹൈവേ പ്രോജക്‌ടുകള്‍ ഇതില്‍ ഉള്‍പ്പെടുന്നു. രണ്ട് മെട്രോകളെയും 1,320 കിലോമീറ്റർ നീളമുള്ള ആറുവരി പ്രവേശന നിയന്ത്രിത ഹൈവേയുമായി ബന്ധിപ്പിക്കുന്ന ദില്ലി-മുംബൈ എക്സ്പ്രസ് വേയാണ് ഇതിലെ പ്രധാന പദ്ധതികളിലൊന്ന്. എക്സ്പ്രസ് വേയുടെ ആദ്യഘട്ടം ഇതിനകം പ്രവർത്തനസജ്ജമാണ്. എക്സ്പ്രസ് വേയുടെ ബാക്കി ഭാഗങ്ങൾ അടുത്ത വർഷം ആദ്യത്തോടെ പൂർത്തിയാകുമെന്നാണ് പ്രതീക്ഷിക്കുന്നത്.
