രാജ്യത്ത് പുരുഷന്മാരുടെ കുറവ് കാരണം അവരുടെ സ്ത്രീകളെ വിവാഹം കഴിക്കുന്ന വിദേശീയരായ പുരുഷന്മാർക്ക് ഐസ്‌ലാൻഡിക് സർക്കാർ 5,000 ഡോളർ (ഏകദേശം 4.16 ലക്ഷം രൂപ) നൽകുന്നുവെന്നായിരുന്നു വാര്‍ത്ത. .
ഐസ്‌ലൻഡ് സർക്കാർ തങ്ങളുടെ രാജ്യത്തെ സ്ത്രീകളെ വിവാഹം കഴിക്കുന്ന വിദേശ പുരുഷന്മാർക്ക് പണം വാഗ്ദാനം ചെയ്യുന്നതായി അവകാശപ്പെടുന്ന ഒരു റിപ്പോർട്ട് ഏറെ പ്രചാരം നേടി. എന്നാൽ, യഥാർത്ഥ കഥ എന്താണ്? സാമൂഹിക മാധ്യമമായ ക്വോറയില്‍ ഏറെ പങ്കുവയ്ക്കപ്പെട്ട ഒരു കുറിപ്പ് പറയുന്നത് അനുസരിച്ച് രാജ്യത്ത് പുരുഷന്മാരുടെ കുറവ് കാരണം അവരുടെ സ്ത്രീകളെ വിവാഹം കഴിക്കുന്ന വിദേശീയരായ പുരുഷന്മാർക്ക് ഐസ്‌ലാൻഡിക് സർക്കാർ 5,000 ഡോളർ (ഏകദേശം 4.16 ലക്ഷം രൂപ) നൽകുന്നുവെന്നാണ്. കൂടാതെ, അവർ വടക്കേ ആഫ്രിക്കൻ പുരുഷന്മാർക്ക് മുൻഗണന നൽകുമെന്നും പോസ്റ്റിൽ അവകാശപ്പെട്ടു. പിന്നാലെ ഈ കുറിപ്പ് സാമൂഹിക മാധ്യമങ്ങളില്‍ വ്യാപകമായി പങ്കുവയ്ക്കപ്പെട്ടു. സ്വാഭാവികമായും ഇത് സത്യമാണെന്ന് നിരവധി പേര്‍ വിശ്വസിച്ചു. എന്നാൽ, ഇതൊരു ഓൺലൈൻ തട്ടിപ്പ് മാത്രമാണെന്നാണ് പുറത്ത് വരുന്ന റിപ്പോർട്ടുകൾ വ്യക്തമാക്കുന്നത്.
2016 ജൂൺ അവസാനത്തോടെ നിരവധി ആഫ്രിക്കൻ വെബ്‌സൈറ്റുകൾ ഈ വിവരങ്ങൾ അടങ്ങിയ ലേഖനങ്ങൾ പ്രസിദ്ധീകരിച്ചിരുന്നെന്ന് സ്‌നോപ്‌സ് ഡോട്ട് കോം എന്ന ഒരു വസ്തുതാ പരിശോധന വെബ്‌സൈറ്റ് പറയുന്നു. ഈ റിപ്പോര്‍ട്ട് പരിശോധിക്കുന്ന ആദ്യത്തെ സൈറ്റുകളില്‍ ഒന്ന് സ്പിരിറ്റ് വിസ്‌പേഴ്‌സ് ആണ്. റിപ്പോര്‍ട്ടുകള്‍ വായിച്ച, പുരുഷന്മാരില്‍ പലരും ഇത് ഗൗരവമായി എടുക്കുകയും ഓഫര്‍ പരിശോധിക്കാന്‍ തയ്യാറാവുകയും ചെയ്തെന്നും റിപ്പോര്‍ട്ടുകള്‍ പറയുന്നു.
ഇപ്പോഴും നിരവധി ഐസ്‌ലാൻഡിക് സ്ത്രീകൾക്ക് തങ്ങൾക്കറിയാത്ത ഐസ്‌ലാൻഡിക് ഇതര പുരുഷന്മാരിൽ നിന്നുള്ള സൗഹൃദ അഭ്യർത്ഥനകൾ വന്നുകൊണ്ടിരിക്കുകയാണെന്ന് മറ്റൊരു വെബ്‌സൈറ്റായ ഐസ്‌ലാൻഡ് മോണിറ്റർ റിപ്പോര്‍ട്ട് ചെയ്തു. എന്നാല്‍ വിവരങ്ങള്‍ പൂര്‍ണ്ണമായും തെറ്റാണെന്ന് ഐസ്‌ലാൻഡ് വിദേശകാര്യ മന്ത്രാലയം സ്ഥിരീകരിച്ചു. കൗതുകകരമായ മറ്റൊരു കാര്യമെന്തെന്നാല്‍, ഐസ്‌ലാൻഡിൽ സ്ത്രീ - പുരുഷ അനുപാതത്തില്‍ ഈ പറയുന്ന കുറവില്ലെന്ന് മാത്രമല്ല, പുരുഷന്മാര്‍ സ്ത്രീകളെക്കാള്‍ എണ്ണത്തില്‍ അല്പം കൂടുതലാണ് എന്നതാണ്. കഴിഞ്ഞ ദശകത്തിൽ രാജ്യത്തെ ജനസംഖ്യയുടെ ഏകദേശം 50 ശതമാനവും പുരുഷന്മാരാണെന്നും ഇൻഫർമേഷൻ ഡിവിഷന്‍റെ കണക്കുകള്‍ സൂചിപ്പിക്കുന്നു,