തിരക്കുള്ള ഒരു ട്രെയിനാണ് വീഡിയോയിൽ കാണുന്നത്. അതിൽ നീല ഷർട്ട് ധരിച്ച ഒരു യാത്രക്കാരൻ ഗാനം ആലപിക്കുന്നതോടെയാണ് വീഡിയോ ആരംഭിക്കുന്നത്.
ഇന്ത്യയിലെ ട്രെയിൻ യാത്ര മിക്കവാറും ദുരിതമായിത്തീരാറാണ് പതിവ്. അതുമായി ബന്ധപ്പെട്ട ചിത്രങ്ങളും വീഡിയോകളുമെല്ലാം മിക്കവാറും സോഷ്യൽ മീഡിയാ പ്ലാറ്റ്‍ഫോമുകളിൽ വൈറലായി മാറാറുമുണ്ട്. എന്നാൽ, അതിൽ നിന്നെല്ലാം തീർത്തും വ്യത്യസ്തമായ ഒരു വീഡിയോയാണ് ഇപ്പോൾ സോഷ്യൽ മീഡിയയിൽ വൈറലായിക്കൊണ്ടിരിക്കുന്നത്.
മുംബൈ ലോക്കൽ ട്രെയിനിൽ നിന്നും പകർത്തിയിരിക്കുന്നതാണ് ഈ വീഡിയോ. വീഡിയോ ഇൻസ്റ്റഗ്രാമിൽ പങ്കുവച്ചിരിക്കുന്നത് the_minihaboo എന്ന യൂസറാണ്. സോനു നിഗമിന്റെ 1997 ഹിറ്റായ 'യേ ദിൽ ദീവാന' പാട്ടും പെർഫോമൻസുമാണ് വീഡിയോയിൽ കാണുന്നത്. ഗായകന്റെ ശ്രദ്ധയും വീഡിയോ പിടിച്ചുപറ്റിയിട്ടുണ്ട്.
undefined
തിരക്കുള്ള ഒരു ട്രെയിനാണ് വീഡിയോയിൽ കാണുന്നത്. അതിൽ നീല ഷർട്ട് ധരിച്ച ഒരു യാത്രക്കാരൻ ഗാനം ആലപിക്കുന്നതോടെയാണ് വീഡിയോ ആരംഭിക്കുന്നത്. താമസിയാതെ, മറ്റ് യാത്രക്കാരും അയാളുടെ ഒപ്പം ചേരുകയാണ്. ചിലർ താളമിടുന്നതും ഒക്കെ വീഡിയോയിൽ വ്യക്തമാണ്. 'എല്ലായിടത്തും കല അതിന്റെ ഇടം കണ്ടെത്തുന്നു' എന്നാണ് വീഡിയോയുടെ കാപ്ഷനിൽ പറഞ്ഞിരിക്കുന്നത്.
അതിവേഗം തന്നെ വീഡിയോ വൈറലായി മാറി. സോനു നിഗം തന്നെ വീഡിയോയ്ക്ക് കമന്റുമായി എത്തി. 'എത്ര മനോഹരം. എനിക്ക് ഒരുപാട് സന്തോഷം തോന്നുന്നു. ദൈവം എല്ലാവരെയും അനുഗ്രഹിക്കട്ടെ' എന്നായിരുന്നു കമന്റ്.
'എന്നെ വിശ്വസിക്കൂ, ഞാനൊരു സിനിമയെടുക്കുകയാണെങ്കിൽ അതിന്റെ ഓപ്പണിംഗ് സീക്വൻസ് ഇതായിരിക്കും' എന്നാണ് വീഡിയോയിൽ എഴുതിയിരിക്കുന്നത്. ഒരുപാടുപേരാണ് വീഡിയോയ്ക്ക് കമന്റുകളുമായി എത്തിയിരിക്കുന്നത്. ഭൂരിഭാഗം പേരും വീഡിയോയിൽ പാടിയിരിക്കുന്നവരേയും മറ്റ് യാത്രക്കാരെയും അഭിനന്ദിക്കുകയാണ് ചെയ്തത്. എത്ര മനോഹരമായ കാഴ്ച എന്ന് പറഞ്ഞവരും ഉണ്ടായിരുന്നു.
എന്തായാലും, ഏറെക്കാലമായി നെഗറ്റീവ് വീഡിയോകൾ കൂടുതലും വരുന്ന ട്രെയിനിൽ നിന്നും ഇങ്ങനെയൊരു മനോഹര ദൃശ്യം വന്നത് എല്ലാവരേയും സന്തോഷിപ്പിച്ചിട്ടുണ്ട്.