ക്യാബിനിൽ പുകയുടെ ഗന്ധം ഉണ്ടെന്ന് ക്രൂ അംഗങ്ങൾ റിപ്പോർട്ട് ചെയ്തതിനെത്തുടർന്ന് സൗത്ത് വെസ്റ്റ് എയർലൈൻസ് ഫ്ലൈറ്റ് WN984 ഒൻ്റാറിയോ അന്താരാഷ്ട്ര വിമാനത്താവളത്തിൽ അടിയന്തര ലാൻഡിംഗ് നടത്തി. ബോയിംഗ് 737 MAX 8 വിമാനമാണ് അടിയന്തിര ലാൻഡിംഗ് ചെയ്‍തത്.
ക്യാബിനിൽ പുകയുടെ ഗന്ധം ഉണ്ടെന്ന് ക്രൂ അംഗങ്ങൾ റിപ്പോർട്ട് ചെയ്തതിനെത്തുടർന്ന് സൗത്ത് വെസ്റ്റ് എയർലൈൻസ് ഫ്ലൈറ്റ് WN984 ഒൻ്റാറിയോ അന്താരാഷ്ട്ര വിമാനത്താവളത്തിൽ അടിയന്തര ലാൻഡിംഗ് നടത്തി. ബോയിംഗ് 737 MAX 8 വിമാനമാണ് അടിയന്തിര ലാൻഡിംഗ് ചെയ്‍തത്. ഫീനിക്സ് സ്കൈ ഹാർബർ ഇൻ്റർനാഷണൽ എയർപോർട്ടിലെ (PHX) ഗേറ്റ് D7 ൽ നിന്ന് പുറപ്പെട്ട വിമാനമാണ് അടിയന്തിരമായി ലാൻഡ് ചെയ്‍തതെന്ന് സാൻ ഫ്രാൻസിസ്കോ ക്രോണിക്കിൾ റിപ്പോര്‍ട്ട് ചെയ്യുന്നു.
38,000 അടി ഉയരത്തിൽ വടക്കുപടിഞ്ഞാറൻ പാതയിലൂടെ അതിൻ്റെ ലക്ഷ്യസ്ഥാനമായ സാൻ ഫ്രാൻസിസ്കോ ഇൻ്റർനാഷണൽ എയർപോർട്ട് (എസ്എഫ്ഒ) ലക്ഷ്യമാക്കി നീങ്ങുകയായിരുന്നു വിമാനം. ഏകദേശം 19:50 ന്, ഫ്ലൈറ്റ് ഇറങ്ങാനും അതിൻ്റെ ഗതി മാറ്റാനും തുടങ്ങി. ഫ്ലൈറ്റ്റാഡാർ 24-ൽ നിന്നുള്ള ഫ്ലൈറ്റ് ഡാറ്റ സൂചിപ്പിക്കുന്നത് വിമാനം വിക്ടർവില്ലിന് മുകളിലൂടെ ദിശ മാറ്റി തെക്ക് കിഴക്കോട്ട് തിരിഞ്ഞ് സാൻ ബെർണാർഡിനോ നാഷണൽ ഫോറസ്റ്റിന് മുകളിലൂടെ പറക്കുകയായിരുന്നു. പിന്നാലെയാണ് അടിയന്തിര ലാൻഡിംഗ് നടത്തിയത്.
പുക ഗന്ധത്തിൻ്റെ കൃത്യമായ ഉറവിടം വ്യക്തമല്ലെങ്കിലും, വിമാന പാതയിൽ സമീപത്തെ കാട്ടുതീയിൽ നിന്നാണ് ഇത് ഉത്ഭവിച്ചതെന്ന് ഉദ്യോഗസ്ഥർ സംശയിക്കുന്നു. സിഎൻഎൻ പറയുന്നതനുസരിച്ച്, സാൻ ബെർണാർഡിനോ പർവതനിരകളുടെ അടിത്തട്ടിൽ പൊട്ടിപ്പുറപ്പെട്ട കാട്ടുതീ, ശനിയാഴ്ച വൈകുന്നേരത്തോടെ അതിവേഗം വളരുകയും 17,200 ഏക്കറിലധികം കത്തിക്കുകയും 4,800 ഓളം വീടുകൾക്ക് ഭീഷണിയാകുകയും ചെയ്തു. ഈ കാട്ടുതീയുടെ പുകയാകാം വിമാനത്തിൽ കണ്ടെത്തിയ ദുർഗന്ധത്തിന് കാരണം എന്നാണ് റിപ്പോര്‍ട്ടുകൾ.
സാൻ ഫ്രാൻസിസ്കോയിലേക്കുള്ള യാത്ര പൂർത്തിയാക്കാൻ പകരം ഒരു വിമാനം അയച്ചുകൊണ്ട് യാത്രക്കാരുടെയും ജീവനക്കാരുടെയും സുരക്ഷ ഉറപ്പാക്കിയെന്ന് സൗത്ത് വെസ്റ്റ് എയർലൈൻസ് അറിയിച്ചു.