സമ്മാന വിവരം അറിയിക്കാനായി ബിഗ് ടിക്കറ്റ് പ്രതിനിധി അദ്ദേഹത്തെ വിളിച്ചപ്പോള്‍ അടക്കാനാവാത്ത സന്തോഷം പങ്കുവെച്ച രാകേഷ്, തനിക്ക് കിട്ടുന്ന പണം മുഴുവന്‍ തന്റെ മകളുടെ ഭാവി വിദ്യാഭ്യാസത്തിനായി മാറ്റിവെയ്ക്കുമെന്നും അറിയിച്ചു.
അബുദാബി: ഓണക്കാലത്ത് നടന്ന അബുദാബി ബിഗ് ടിക്കറ്റ് പ്രതിവാര നറുക്കെടുപ്പില്‍ പ്രവാസി ഇന്ത്യക്കാരന് മൂന്ന് ലക്ഷം ദിര്‍ഹം (65 ലക്ഷത്തിലധികം ഇന്ത്യന്‍ രൂപ) സമ്മാനം. ഖത്തറില്‍ പ്രവാസിയായ രാകേഷ് ശശിധരനാണ് സെപ്റ്റംബറിലെ ആദ്യ പ്രതിവാര നറുക്കെടുപ്പില്‍ വിജയിയായത്. സുഹൃത്തിനൊപ്പം എടുത്ത ടിക്കറ്റിലൂടെയാണ് അദ്ദേഹത്തെ ഭാഗ്യം തേടിയെത്തിയത്.
എന്നെങ്കിലും വിജയിയാകുമെന്ന പ്രതീക്ഷയോടെ കഴിഞ്ഞ വര്‍ഷം മുതല്‍ സുഹൃത്തുമായി ചേര്‍ന്ന് രാകേഷ് ബിഗ് ടിക്കറ്റെടുക്കുകയാണ്. ഒടുവില്‍ രണ്ട് പേരെയും ഭാഗ്യം കടാക്ഷിച്ചപ്പോള്‍ ലഭിക്കുന്ന സമ്മാനത്തുക ഇരുവരും തുല്യമായി വീതിച്ചെടുക്കും. ഏറെക്കാലമായി ഖത്തറില്‍ ജീവിക്കുന്ന രാകേഷ് റീട്ടെയില്‍ മേഖലയിലാണ് ജോലി ചെയ്യുന്നത്. സമ്മാന വിവരം അറിയിക്കാനായി ബിഗ് ടിക്കറ്റ് പ്രതിനിധി അദ്ദേഹത്തെ വിളിച്ചപ്പോള്‍ അടക്കാനാവാത്ത സന്തോഷം പങ്കുവെച്ച രാകേഷ്, തനിക്ക് കിട്ടുന്ന പണം മുഴുവന്‍ തന്റെ മകളുടെ ഭാവി വിദ്യാഭ്യാസത്തിനായി മാറ്റിവെയ്ക്കുമെന്നും അറിയിച്ചു.
ഇപ്പോള്‍ ലഭിച്ച പ്രതിവാര നറുക്കെടുപ്പിലെ വിജയത്തിന് പുറമെ ഒക്ടോബര്‍ മൂന്നിന് നടക്കാനിരിക്കുന്ന 'മൈറ്റി 20 മില്യന്‍' തത്സമയ നറുക്കെടുപ്പില്‍ രണ്ട് കോടി ദിര്‍ഹത്തിന്റെ ഒന്നാം സമ്മാനമോ അല്ലെങ്കില്‍ അതേ നറുക്കെടുപ്പിലെ മറ്റേതെങ്കിലും ക്യാഷ് പ്രൈസോ സ്വന്തമാക്കാനും രാകേഷിന് ഇനിയും അവസരമുണ്ട്.
സെപ്റ്റംബര്‍ മാസത്തില്‍ ബിഗ് ടിക്കറ്റെടുക്കുന്നവര്‍ക്ക് മൂന്ന് ലക്ഷം ദിര്‍ഹം സ്വന്തമാക്കാന്‍ അവസരം നല്‍കുന്ന രണ്ട് പ്രതിവാര നറുക്കെടുപ്പുകള്‍ കൂടി ഇനിയും ബാക്കിയുണ്ട്. സെപ്റ്റംബര്‍ 22നും ഒക്ടോബര്‍ ഒന്നിനുമാണ് യഥാക്രമം മൂന്നാമത്തെയും നാലാമത്തെയും പ്രതിവാര നറുക്കെടുപ്പുകള്‍ നടക്കുക. രാകേഷിനെപ്പോലെ പ്രതിവാര നറുക്കെടുപ്പുകളില്‍ പങ്കെടുത്ത എല്ലാവര്‍ക്കും ഒക്ടോബര്‍ മൂന്നിന് നടക്കാനിരിക്കുന്ന അടുത്ത നറുക്കെടുപ്പില്‍ വിജയിക്കാനുള്ള അവസരവുമുണ്ടാകും.
ബിഗ് ടിക്കറ്റിനെക്കുറിച്ചുള്ള ഏറ്റവും പുതിയ വിവരങ്ങള്‍ക്കും വാര്‍ത്തകള്‍ക്കും ബിഗ് ടിക്കറ്റിന്റെ ഔദ്യോഗിക വെബ്‍സൈറ്റും സോഷ്യല്‍ മീഡിയ പ്ലാറ്റ്ഫോമുകളും സന്ദര്‍ശിക്കുക. ഓരോ പ്രതിവാര നറുക്കെടുപ്പിന്റെയും തീയ്യതികള്‍ക്കിടയില്‍ എടുക്കുന്ന ബിഗ് ടിക്കറ്റുകള്‍ തൊട്ടടുത്ത തീയ്യതിയിലെ പ്രതിവാര നറുക്കെടുപ്പിലേക്ക് മാത്രമേ പരിഗണിക്കപ്പെടുകയുള്ളൂ. മറിച്ച് എല്ലാ ആഴ്ചയിലെയും ഇലക്ട്രോണിക് നറുക്കെടുപ്പുകളില്‍ ആ ടിക്കറ്റ് ഉള്‍പ്പെടില്ല. ബിഗ് ടിക്കറ്റ് നറുക്കെടുപ്പില്‍ പങ്കെടുക്കുന്നവര്‍ക്ക് വലിയ വിജയം നേടാനുള്ള അവസരമാണ് ഇപ്പോള്‍ ലഭ്യമായിരിക്കുന്നതെന്നും സംഘാടകര്‍ അറിയിച്ചു.