യുഎഇ വൈസ് പ്രസിഡന്റും പ്രധാന മന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമാണ് പ്രഖ്യാപനം നടത്തിയത്
ദുബായ് : ദുബായ് എമിറേറ്റിന്റെയും ദുബായ് ഗവൺമെന്റിന്റെയും ഔദ്യോഗിക ചിഹ്നം ഉപയോഗിക്കുന്നത് സംബന്ധിച്ച നിയന്ത്രണങ്ങൾ ഏർപ്പെടുത്തിക്കൊണ്ടുള്ള നിയമം പ്രാബല്യത്തിൽ വന്നു. യുഎഇ വൈസ് പ്രസിഡന്റും പ്രധാന മന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമാണ് പ്രഖ്യാപനം നടത്തിയത്.
ദുബായ് ഗവൺമെന്റിന്റെ ലോഗോ സർക്കാരിന്റെയും സർക്കാർ ഏജൻസികളുടെയും കെട്ടിടങ്ങൾ, സൈറ്റുകൾ, ഇവന്റുകൾ, പ്രവർത്തനങ്ങൾ, രേഖകൾ, ആപ്ലിക്കേഷനുകൾ, സൈറ്റുകൾ എന്നിവിടങ്ങളിൽ ഉപയോഗിക്കാൻ മാത്രമാണ് അനുമതി ഉണ്ടായിരിക്കുക. ഏതെങ്കിലും വ്യക്തിയോ സ്ഥാപനമോ അവരുടെ ആവശ്യങ്ങൾക്കായി ദുബായ് എമിറേറ്റിന്റെ ചിഹ്നം ഉപയോഗിക്കുന്നത് നിയമം കർശനമായി വിലക്കുന്നുണ്ട്. എന്നാൽ, ബന്ധപ്പെട്ട അധികാരികളുടെ പ്രത്യേക അനുമതിയോടെ ലോഗോ ഉപയോഗിക്കാൻ കഴിയും. വാണിജ്യ ആവശ്യങ്ങൾക്കോ പരസ്യ ഉൽപ്പന്നങ്ങൾ, സാധനങ്ങൾ, വസ്തുക്കൾ അല്ലെങ്കിൽ ഉപകരണങ്ങൾ എന്നിവയ്‌ക്കോ ചിഹ്നം ഉപയോഗിക്കുന്നതും മൂല്യത്തെയോ പദവിയെയോ വളച്ചൊടിക്കുന്ന വിധത്തിൽ ചിഹ്നം ദുരുപയോഗം ചെയ്യുന്നതും കർശനമായി നിരോധിച്ചിട്ടുണ്ട്.
read more: സൗദിയിൽ ലൈസൻസ് ഇല്ലാതെ ഭക്ഷ്യ സ്ഥാപനങ്ങൾ പ്രവർത്തിച്ചാൽ 50,000 റിയാൽ വരെ പിഴ
നിയമത്തിലെ വ്യവസ്ഥകൾ ലംഘിച്ച് ഏതെങ്കിലും വ്യക്തികളോ സ്ഥാപനങ്ങളോ ലോഗോ ഉപയോഗിച്ചാൽ അഞ്ച് വർഷം വരെ തടവും ഒരു ലക്ഷം ദിർഹം മുതൽ അഞ്ച് ലക്ഷം ദിർഹം വരെ പിഴയും ലഭിക്കുന്നതായിരിക്കും. കൂടാതെ, അനുമതിയില്ലാതെ ലോഗോ ഉപയോഗിച്ചിട്ടുള്ളവർ 30 ദിവസത്തിനുള്ളിൽ നീക്കം ചെയ്യണമെന്നും നിയമം പറയുന്നുണ്ട്. പുതിയ നിയമം വന്നതോടെ ദുബായ് എമിറേറ്റിന്റെ ചിഹ്നത്തെ സംബന്ധിച്ച 2023 ലെ നിയമം (17) അസാധുവാകുമെന്നും അതിലെ വ്യവസ്ഥകൾക്ക് വിരുദ്ധമായ മറ്റ് നിയമ വ്യവസ്ഥ റദ്ദാക്കപ്പെടുകയും ചെയ്യുന്നതായിരിക്കും.