മോഹൻലാൽ- പൃഥ്വിരാജ് കൂട്ടുക്കെട്ടിൽ ഒരുങ്ങുന്ന ചിത്രത്തിൽ കല്യാണി പ്രിയദർശനാണ് നായിക.
പ്രഖ്യാപന സമയം മുതൽ പ്രേക്ഷക ശ്രദ്ധപിടിച്ചു പറ്റിയ ചിത്രമാണ് ബ്രോ ഡാഡി. ലൂസിഫർ എന്ന ഹിറ്റ് ചിത്രത്തിന് ശേഷം മോഹൻലാലും പൃഥ്വിരാജും വീണ്ടും ഒന്നിക്കുന്നു എന്നതാണ് അതിന് പ്രധാനകാരണം. നിലവിൽ ചിത്രത്തിന്റെ ഷൂട്ടിംഗ് പുരോഗമിക്കുകയാണ്. ബ്രോ ഡാഡിയുടെ ഗാനം ഒരുക്കാൻ വിനീത് ശ്രീനിവാസനും ദീപക് ദേവും എത്തുവെന്ന് കഴിഞ്ഞ ദിവസം പൃഥ്വിരാജ് അറിയിച്ചിരുന്നു ഇതിന് പിന്നാലെ വിനീത് കുറിച്ച വാക്കുകളാണ് ഇപ്പോൾ ശ്രദ്ധനേടുന്നത്.
ഒരു പതിറ്റാണ്ടിന് ശേഷമാണ് ദീപക് ദേവും വിനീത് ശ്രീനിവാസനും ഒന്നിക്കുന്നത്. ബ്രോ ഡാഡിയിലെ ഗാനം നല്‍കിയതിന് പൃഥ്വിരാജിനും വിനീത് നന്ദിയും പറയുന്നു.
‘ഒരു പതിറ്റാണ്ടിനു ശേഷം ഞാന്‍ ഇന്ന് ദീപക് ഏട്ടനൊപ്പം പാട്ട് റെക്കോര്‍ഡ് ചെയ്തു. 17 വര്‍ഷം മുന്‍പാണ് കരളെ… എന്ന ഗാനം അദ്ദേഹത്തിനൊപ്പം ഞാന്‍ റെക്കോര്‍ഡ് ചെയ്യുന്നത്. 2005ല്‍ റിലീസായ ഗാനം എല്ലാം മാറ്റിമറിച്ചു. നരന്‍ ഉള്‍പ്പടെ നിരവധി മനോഹരമായ ഗാനങ്ങള്‍ ദീപക് ഏട്ടന്‍ എനിക്കു തന്നു. ബ്രോ ഡാഡിക്കുവേണ്ടിയുള്ള ഈ ഗാനം മനോഹരമായ നിരവധി ഓര്‍മകള്‍ തിരിച്ചുകൊണ്ടുവന്നു. ഈ ഗാനം നല്‍കിയതിന് നന്ദി പൃഥ്വിരാജ്,’ എന്നാണ് വിനീത് കുറിച്ചത്.
മോഹൻലാൽ- പൃഥ്വിരാജ് കൂട്ടുക്കെട്ടിൽ ഒരുങ്ങുന്ന ചിത്രത്തിൽ കല്യാണി പ്രിയദർശനാണ് നായിക. ഇവരെ കൂടാതെ
മീന, ലാലു അലക്സ്, മുരളി ഗോപി, കനിഹ, സൗബിൻ ഷാഹിർ തുടങ്ങിയ വമ്പൻ താരനിരയുമായാണ് ബ്രോ ഡാഡി എത്തുക. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്. ഒരു ഫണ്‍-ഫാമിലി ഡ്രാമയാണ് ബ്രോ ഡാഡിയെന്നാണ് പൃഥ്വിരാജ് ചിത്രം പ്രഖ്യാപിച്ചപ്പോൾ പറഞ്ഞിരുന്നു. ശ്രീജിത്ത് എനും ബിബിൻ ജോര്‍ജുമാണ് ചിത്രത്തിന്റെ തിരക്കഥയെഴുതുന്നത്. ദീപക് ദേവ് സംഗീത സംവിധാനം നിര്‍വഹിക്കുന്നു.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യർത്ഥിക്കുന്നു. ഒന്നിച്ച് നിന്നാൽ നമുക്കീ മഹാമാരിയെ തോൽപ്പിക്കാനാവും. #BreakTheChain #ANCares #IndiaFightsCorona