പുല്‍പ്പള്ളി പഞ്ഞിമുക്ക് എന്ന സ്ഥലത്ത് പട്രോളിംഗിനിടെ എത്തിയ യുവാക്കൾ പൊലീസിനെ കണ്ടപ്പോള്‍ പരിഭ്രമിച്ചതോടെയാണ് സംശയം തോന്നിയത്.
പുല്‍പള്ളി: പൊലീസിനെ കണ്ടപ്പോള്‍ പരിഭ്രമിച്ച യുവാക്കളെ പിടികൂടി പരിശോധിച്ചപ്പോള്‍ ലഭിച്ചത് വില്‍പ്പനക്കായി സൂക്ഷിച്ച കഞ്ചാവ്. പിന്നാലെ മൂന്ന് യുവാക്കളെയും ഉദ്യോഗസ്ഥര്‍ പിടികൂടി. കണ്ണൂര്‍ ന്യൂ മാഹി സേന പുതുക്കൊടി വീട്ടില്‍ സി.കെ ആഷിക് (28), പാലക്കാട് പടിക്കപ്പാടം വലിയകത്ത് വീട്ടില്‍ വി. അംജാദ് (19), കോഴിക്കോട് പുതിയങ്ങാടി കുഞ്ഞിരായന്‍ കണ്ടി വീട്ടില്‍ കെ.കെ ഷഫീഖ് (33) എന്നിവരെയാണ് പുല്‍പ്പള്ളി പൊലീസും ജില്ല ലഹരി വിരുദ്ധ സ്‌ക്വാഡും ചേര്‍ന്ന് പിടികൂടിയത്.
പുല്‍പ്പള്ളി പഞ്ഞിമുക്ക് എന്ന സ്ഥലത്ത് പട്രോളിംഗിനിടെയാണ് യുവാക്കളെത്തിയത്. പൊലീസിനെ കണ്ടപ്പോള്‍ പരിഭ്രമിച്ച മൂവരെയും പരിശോധിച്ചപ്പോഴാണ് ഇവരില്‍ നിന്നും വില്‍പ്പനക്കായി സൂക്ഷിച്ച 245 ഗ്രാം കഞ്ചാവ് പിടിച്ചെടുത്തത്. ലഹരി വിരുദ്ധ സ്‌ക്വാഡിനൊപ്പം സബ് ഇന്‍സ്പെക്ടര്‍ പി.ജി. സാജന്‍, സീനിയര്‍ സിവില്‍ പൊലീസ് ഓഫീസര്‍ വര്‍ഗീസ്, സിവില്‍ പൊലീസ് ഓഫീസര്‍മാരായ സുജിന്‍ ലാല്‍, കെ.വി. ഷിജു എന്നിവരാണ് പരിശോധന സംഘത്തിലുണ്ടായിരുന്നത്.