ചില്ല, എഴുത്തിന്റെ ചിറകനക്കങ്ങള്‍. സ്മിത്ത് അന്തിക്കാട് എഴുതിയ കവിത
ചില്ല. മികച്ച എഴുത്തുകള്‍ക്ക് ഒരിടം. സൃഷ്ടികള്‍ submissions@asianetnews.in എന്ന വിലാസത്തില്‍ അയക്കൂ. ഒപ്പം ഫോട്ടോയും വിശദമായ വിലാസവും അയക്കണം. എഡിറ്റോറിയല്‍ ബോര്‍ഡ് തെരഞ്ഞെടുക്കുന്ന സൃഷ്ടികള്‍ പ്രസിദ്ധീകരിക്കും
undefined
അവളുടെ വാക്കുകളില്‍
കൊടുങ്കാറ്റ് കൂടുവെക്കുന്നു
സ്പര്‍ശത്തിന്‍ തൂവല്‍ പൊഴിച്ച്
ഒരു കിളി പറന്നു പോകുന്നു
ദേശാടന ദൂരങ്ങളില്‍ നിന്ന്
കാറ്റിനൊപ്പം
അടയിരുന്നു മുട്ടവിരിയിക്കാന്‍
ഒരോര്‍മയെത്തുന്നു
മെലിഞ്ഞ ശ്വാസത്തില്‍
ജീവനുലഞ്ഞു കത്തുന്നു
അവളുടെ ചലനങ്ങളില്‍
ജലഗീതികളുണരുന്നു
ആലിംഗനങ്ങളില്‍
പുതുമഴ പെരുക്കങ്ങള്‍
ഇത് ഭ്രാന്തമായ ജലപല്ലവി
ആദ്യരതിയുടെ
ഉഷ്ണപ്രവാഹങ്ങള്‍ നിറഞ്ഞ
ഉടല്‍
ജലഞരമ്പ് തേടി
അവളുടെയുടലില്‍
വേരുകള്‍ നീളുന്നു
മഴവെള്ളം നിറഞ്ഞ
കോളിനു കുറുകെ
താറാവു വഞ്ചിക്കാരുടെ
കൂവല്‍ പോലെ
ബാല്യത്തിലേയ്ക്കു
തിരിച്ചോടുന്നു
കറുകമണം നിറഞ്ഞ
ഒരോര്‍മ
അവളുടെ മുടി
ഭൂമി പിളര്‍ന്നു താഴ്ന്ന
മുറിവിനെ മൂടുന്നു
കൈതണ്ടില്‍ ഭൂമി സ്പന്ദിക്കുന്നൊരു
പച ഞരമ്പു തെളിയുന്നു
ആദ്യമഴ മഴയേറ്റു ശമിച്ച
മണ്ണിന്റെ മണമേറ്റ്
പഴയ പ്രണയത്തിലേയ്ക്ക്
മുലക്കണ്ണുകളുണരുന്നു
നീലിമ പടര്‍ന്നു
അവളുടെ മിഴികളില്‍
ആകാശമുദിക്കുന്നു
ഇലമുളച്ചിയെ പോലെ
ഉടല്‍ നിറയെ വേരുകളാഴ്ത്തി
പടരുന്നു, മരണം
ഇവിടെ ക്ലിക്ക് ചെയ്താല്‍ വായിക്കാം, മികച്ച കഥകള്‍, മികച്ച കവിതകള്‍...