ആറ് വിക്കറ്റ് കയ്യിലിരിക്കേ അവസാന അഞ്ച് ഓവറില്‍ 52 റണ്‍സാണ് ജയിക്കാന്‍ ഗുജറാത്ത് ടൈറ്റന്‍സിന് വേണ്ടിയിരുന്നത്
അഹമ്മദാബാദ്: ഐപിഎല്‍ പതിനാറാം സീസണില്‍ ആദ്യം ബാറ്റ് ചെയ്‌ത് 130 റണ്‍സ് മാത്രം നേടിയിട്ടും പോയിന്‍റ് പട്ടികയിലെ ഒന്നാം സ്ഥാനക്കാരായ ഗുജറാത്ത് ടൈറ്റന്‍സിനെ എറിഞ്ഞുപിടിച്ച് അവസാനക്കാരായ ഡല്‍ഹി ക്യാപിറ്റല്‍സ്. അഞ്ച് റണ്‍സിനാണ് ഡേവിഡ് വാര്‍ണറുടെയും സംഘത്തിന്‍റേയും വിജയം. 131 റണ്‍സ് വിജയലക്ഷ്യം തേടിയിറങ്ങിയ ടൈറ്റന്‍സിനെ 20 ഓവറില്‍ 6 വിക്കറ്റിന് 125 റണ്‍സെടുക്കാനേ ഡല്‍ഹി ബൗളര്‍മാര്‍ അനുവദിച്ചുള്ളൂ. ഹാര്‍ദിക് പാണ്ഡ്യയുടെ അര്‍ധസെഞ്ചുറിയും രാഹുല്‍ തെവാട്ടിയയുടെ ഫിനിഷിംഗും ഏല്‍ക്കാതെ വന്നപ്പോള്‍ രണ്ട് വീതം വിക്കറ്റുമായി ഖലീല്‍ അഹമ്മദും ഇഷാന്ത് ശര്‍മ്മയും ഓരോരുത്തരെ പുറത്താക്കി ആന്റിച്ച് നോര്‍ക്യയും കുല്‍ദീപ് യാദവും ഡല്‍ഹിക്ക് ആശ്വാസ ജയമൊരുക്കി. അവസാന ഓവറില്‍ 11 റണ്‍സ് പ്രതിരോധിച്ച ഇഷാന്താണ് ഹീറോ.
മറുപടി ബാറ്റിംഗില്‍ ഗുജറാത്ത് ടൈറ്റന്‍സിന്‍റെ തുടക്കവും പാളി. ഖലീല്‍ അഹമ്മദിന്‍റെ ആദ്യ ഓവറിലെ അവസാന പന്തില്‍ വൃദ്ധിമാന്‍ സാഹ(6 പന്തില്‍ 0) വിക്കറ്റിന് പിന്നില്‍ സാള്‍ട്ടിന്‍റെ കൈകളിലെത്തി. നാലാം ഓവറിലെ ആദ്യ ബോളില്‍ ശുഭ്‌മാന്‍ ഗില്ലിനെ(7 പന്തില്‍ 6) ആന്റിച്ച് നോര്‍ക്യ മടക്കി. ഇഷാന്ത് ശര്‍മ്മയുടെ അഞ്ചാം ഓവറിലെ ആറാം പന്തില്‍ വിജയ് ശങ്കറും(9 പന്തില്‍ 6), കുല്‍ദീപ് യാദവിന്‍റെ ഏഴാം ഓവറിലെ നാലാം ബോളില്‍ ഡേവിഡ് മില്ലറും(3 പന്തില്‍ 0) പുറത്തായതോടെ ടൈറ്റന്‍സ് 32-4. മൂന്നാമനായി ക്രീസിലെത്തിയ നായകന്‍ ഹാര്‍ദിക് പാണ്ഡ്യയും ആറാമന്‍ അഭിനവ് മനോഹറും രക്ഷാപ്രവര്‍ത്തനം ഏറ്റെടുത്തു.
undefined
ആറ് വിക്കറ്റ് കയ്യിലിരിക്കേ അവസാന അഞ്ച് ഓവറില്‍ 52 റണ്‍സാണ് ജയിക്കാന്‍ ഗുജറാത്ത് ടൈറ്റന്‍സിന് വേണ്ടിയിരുന്നത്. 18-ാം ഓവറിലെ ആദ്യ പന്തില്‍ അഭിനവ് മനോഹറിനെ(33 പന്തില്‍ 26) പുറത്താക്കി ഖലീല്‍ ബ്രേക്ക് ത്രൂ നേടി. പാണ്ഡ്യ ഫിഫ്റ്റി പിന്നിട്ടപ്പോള്‍ രാഹുല്‍ തെവാട്ടിയും ക്രീസില്‍ നില്‍ക്കേ ടൈറ്റന്‍സിന് 12 പന്തില്‍ 33 വേണമെന്നായി. 19-ാം ഓവറില്‍ നോര്‍ക്യയുടെ ആദ്യ മൂന്ന് പന്തുകള്‍ നന്നായെങ്കിലും തുടര്‍ച്ചയായി മൂന്ന് സിക്‌സുകള്‍ പിന്നാലെ പറത്തി രാഹുല്‍ തെവാട്ടിയ ആവേശമാക്കി. ഇതോടെ ഇഷാന്ത് ശര്‍മ്മയുടെ 20-ാം ഓവറില്‍ 12 റണ്‍സ് മാത്രമായി വിജയലക്ഷ്യം. നാലാം പന്തില്‍ വെടിക്കെട്ട് വീരന്‍ രാഹുല്‍ തെവാട്ടിയയെ(7 പന്തില്‍ 20) ഇഷാന്ത് ശര്‍മ്മ പുറത്താക്കിയതോടെ ട്വിസ്റ്റായി. രണ്ട് പന്തില്‍ ടൈറ്റന്‍സിന് ജയിക്കാന്‍ 9 റണ്‍സ്. എന്നാല്‍ ഇഷാന്ത് ശര്‍മ്മയുടെ പരിചയമ്പത്തിന് മുന്നില്‍ ഹാര്‍ദിക് പാണ്ഡ്യയും(53 പന്തില്‍ 59*) റാഷിദ് ഖാനും(2 പന്തില്‍ 3*) അടിയറവുപറ‌ഞ്ഞു.
നേരത്തെ, ടോസ് നേടി ആദ്യം ബാറ്റ് ചെയ്‌ത ഡല്‍ഹി ക്യാപിറ്റല്‍സ് തുടക്കത്തിലെ കൂട്ടത്തകര്‍ച്ചയ്‌ക്ക് ശേഷം അമാന്‍ ഹക്കീം ഖാന്‍റെ ഫിഫ്റ്റിയിലും അക്‌സര്‍ പട്ടേല്‍, റിപാല്‍ പട്ടേല്‍ എന്നിവരുടെ പോരാട്ടത്തിലും 20 ഓവറില്‍ 8 വിക്കറ്റിന് 130 റണ്‍സ് സ്കോര്‍ ബോര്‍ഡില്‍ ചേര്‍ക്കുകയായിരുന്നു. ആറ് ഓവറിനിടെ അഞ്ച് വിക്കറ്റ് നഷ്‌ടമായ ഡല്‍ഹി കഷ്‌ടപ്പെട്ടാണ് സ്കോര്‍ ബോര്‍ഡില്‍ 100 തൊട്ടത്. മുഹമ്മദ് ഷമി നാല് ഓവറില്‍ വെറും 11 റണ്‍സിന് നാല് വിക്കറ്റ് പേരിലാക്കി. പവര്‍പ്ലേയിലെ തന്‍റെ മൂന്ന് ഓവറിനിടെ 7 റണ്‍സ് മാത്രം വിട്ടുകൊടുത്ത് ഷമി നാലാളെ പുറത്താക്കിയിരുന്നു. മോഹിത് ശര്‍മ്മ രണ്ടും റാഷിദ് ഖാന്‍ ഒന്നും വിക്കറ്റ് നേടി. ആറാം വിക്കറ്റില്‍ അക്‌സര്‍ പട്ടേലിനൊപ്പം 50 റണ്‍സിന്‍റെയും ഏഴാം വിക്കറ്റില്‍ റിപാല്‍ പട്ടേലിനൊപ്പം 53 റണ്‍സിന്‍റേയും നിര്‍ണായ കൂട്ടുകെട്ടുകള്‍ അമാന്‍ ഹക്കീം ഖാന്‍ പണിതു.
പ്രിയം ഗാര്‍ഗ്(14 പന്തില്‍ 10), അക്‌സര്‍ പട്ടേല്‍(30 പന്തില്‍ 27), അമാന്‍ ഹക്കീം ഖാന്‍(44 പന്തില്‍ 51), റിപാല്‍ പട്ടേല്‍(13 പന്തില്‍ 23) എന്നിവര്‍ മാത്രമാണ് രണ്ടക്കം കണ്ടത്. ഓപ്പണര്‍ ഫിലിപ് സാള്‍ട്ട് ഗോള്‍ഡന്‍ ഡക്കായപ്പോള്‍ ക്യാപ്റ്റന്‍ ഡേവിഡ് വാര്‍ണര്‍(2 പന്തില്‍ 2), റൈലി റൂസ്സോ(6 പന്തില്‍ 8), മനീഷ് പാണ്ഡെ(4 പന്തില്‍ 1), ആന്റിച്ച് നോര്‍ക്യ(6 പന്തില്‍ 3*), കുല്‍ദീപ് യാദവ്(1 പന്തില്‍ 0*) എന്നിങ്ങനെയായിരുന്നു മറ്റുള്ളവരുടെ സ്കോറുകള്‍. നാല് വിക്കറ്റ് പ്രകടനവുമായി മുഹമ്മദ് ഷമി മത്സരത്തിലെ താരമായി തെര‌ഞ്ഞെടുക്കപ്പെട്ടു.
Read more: പവര്‍പ്ലേയിലെ തീപാറും ബൗളിംഗ്; ഏഴ് വര്‍ഷം പഴക്കമുള്ള റെക്കോര്‍ഡ് തകര്‍ത്ത് ഷമി