198 റണ്‍സ് വിജയലക്ഷ്യം പിന്തുടർന്ന ക്യാപിറ്റല്‍സിന് 20 ഓവറില്‍ 188/6 എന്ന സ്കോറിലെത്താനേ കഴിഞ്ഞുള്ളൂ
ദില്ലി: ഐപിഎല്ലില്‍ മിച്ചല്‍ മാർഷിന്‍റെ ഓള്‍റൗണ്ട് മികവും ഫിലിപ് സാള്‍ട്ട്, അക്സർ പട്ടേല്‍ എന്നിവരുടെ വെടിക്കെട്ടും സ്വന്തം മൈതാനത്ത് ഡല്‍ഹി ക്യാപിറ്റല്‍സിന് ജയമൊരുക്കിയില്ല. അരുണ്‍ ജെയ്‌റ്റ്‌ലി സ്റ്റേഡിയത്തില്‍
സണ്റൈസേഴ്സ് ഹൈദരാബാദ് 9 റണ്‍സിന്‍റെ ജയം സ്വന്തമാക്കി. 198 റണ്‍സ് വിജയലക്ഷ്യം പിന്തുടർന്ന ക്യാപിറ്റല്‍സിന് 20 ഓവറില്‍ 188/6 എന്ന സ്കോറിലെത്താനേ കഴിഞ്ഞുള്ളൂ. ഫിഫ്റ്റികള്‍ നേടിയ
ഫിലിപ് സാള്‍ട്ടും മിച്ചല്‍ മാർഷും 112 റണ്‍സിന്‍റെ ഗംഭീര കൂട്ടുകെട്ടുണ്ടാക്കിയത് പിന്നീട് വന്ന ഡല്‍ഹി ബാറ്റർമാർക്ക് മുതലാക്കാനായില്ല. മാർഷ് നേരത്തെ നാല് വിക്കറ്റും നേടിയിരുന്നു.
മറുപടി ബാറ്റിംഗില്‍ ഫീലിപ് സാള്‍ട്ടും മിച്ചല്‍ മാർഷും ഒഴികെയുള്ള ഡല്‍ഹി ക്യാപിറ്റല്‍സ് മുന്‍നിര ബാറ്റർമാരൊന്നും ഉത്തരവാദിത്തം കാണിച്ചില്ല. ഇന്നിംഗ്സിലെ രണ്ടാം പന്തില്‍ ഭുവി ക്യാപ്റ്റന്‍ ഡേവിഡ് വാർണറെ ബൗള്‍ഡാക്കി. ഇതിന് ശേഷം ക്രീസിലൊന്നിച്ച സാള്‍ട്ട്-മാർഷ് സഖ്യം 112 റണ്‍സിന്‍റെ രണ്ടാം വിക്കറ്റ് കൂട്ടുകെട്ടുമായി ഡല്‍ഹിക്ക് വലിയ പ്രതീക്ഷ നല്‍കിയ ശേഷമാണ് 12-ാം ഓവറില്‍ പിരിഞ്ഞത്. 35 പന്തില്‍ 9 ഫോറുകളോടെ 59 റണ്‍സെടുത്ത സാള്‍ട്ടിനെ മായങ്ക് മർക്കാണ്ഡെ റിട്ടേണ്‍ ക്യാച്ചിലൂടെ പുറത്താക്കുകയായിരുന്നു. ശേഷം ക്രീസിലെത്തിയ മനീഷ് പാണ്ഡെ തൊട്ടടുത്ത ഓവറില്‍ വിക്കറ്റ് വലിച്ചെറിഞ്ഞു. അഭിഷേക് ശർമ്മയെ ക്രീസ് വിട്ട് നേരിടാന്‍ ശ്രമിച്ച മനീഷിനെ(3 പന്തില്‍ 1) ക്ലാസന്‍ സ്റ്റംപ് ചെയ്യുകയായിരുന്നു.
undefined
ഇതിന് ശേഷവും അടി തുടർന്ന മിച്ചല്‍ മാർഷിന് ഇന്നിംഗ്സിലെ 14-ാം ഓവറില്‍ പിഴച്ചു. ആദ്യ പന്തില്‍ അക്കീല്‍ ഹൊസൈനെ സിക്സിന് പറത്തിയ മാർഷ് വീണ്ടും ശ്രമിച്ചപ്പോള്‍ രണ്ടാം പന്തില്‍ മാർക്രമിന്‍റെ ക്യാച്ചില്‍ മടങ്ങി. മാർഷ് 39 പന്തില്‍ ഒരു ഫോറും ആറ് സിക്സും സഹിതം 63 എടുത്തു. യുവതാരം പ്രിയം ഗാർഗിനും അവസരം മുതലാക്കാനായില്ല. 16-ാം ഓവറില്‍ ഗാർഗിനെ(9 പന്തില്‍ 12) മർക്കാണ്ഡെ ബൗള്‍ഡാക്കി. ഇംപാക്ട് പ്ലെയറായി എത്തി ദൗത്യം മറന്ന സർഫറാസ് ഖാനെ(10 പന്തില്‍ 9) നടരാജന്‍ ബൗള്‍ഡാക്കിയതോടെ ഡല്‍ഹി കുഴിയിലായി. റിപാല്‍ പട്ടേലിനെ കൂട്ടുപിടിച്ച് അക്സർ പട്ടേല്‍ വെടിക്കെട്ട് തുടങ്ങിയതോടെ ഡല്‍ഹിക്ക് നേരിയ പ്രതീക്ഷയായി. എന്നാല്‍ 19-ാം ഓവറില്‍ നടരാജനെതിരെ 9 റണ്‍സേ നേടാനായുള്ളൂ. അവസാന ഓവറില്‍ ഭുവി 25 റണ്‍സ് പ്രതിരോധിച്ചു. അക്സർ 14 പന്തില്‍ 29* ഉം, റിപാല്‍ 8 പന്തില്‍ 11* ഉം റണ്‍സുമായി പുറത്താവാതെ നിന്നു.
തുടക്കവും ഒടുക്കവും അടി, ഇതിനിടെ മാർഷിന് 4 വിക്കറ്റ്
അരുണ്‍ ജെയ്‌റ്റ്‌ലി സ്റ്റേഡിയത്തില്‍ ആദ്യം ബാറ്റ് ചെയ്‌ത സണ്റൈസേഴ്സ് നിശ്ചിത 20 ഓവറില്‍ 6 വിക്കറ്റ് നഷ്‌ടത്തില്‍ 197 റണ്‍സെടുത്തു. സണ്‍റൈസേഴ്‌സിനായി അഭിഷേക് ശര്‍മ്മയും ഹെന്‍‌റിച്ച് ക്ലാസനും വെടിക്കെട്ട് ഫിഫ്റ്റികള്‍ സ്വന്തമാക്കി. ഡല്‍ഹി ക്യാപിറ്റല്‍സിനായി മിച്ചല്‍ മാര്‍ഷ് 4 ഓവറില്‍ 27 റണ്‍സിന് നാല് വിക്കറ്റ് നേടി. അക്‌സര്‍ പട്ടേലും ഇഷാന്ത് ശര്‍മ്മയും ഓരോ വിക്കറ്റ് നേടി.
ടോസ് നേടി ബാറ്റിംഗിനിറങ്ങിയ സണ്റൈസേഴ്സ് പവര്‍പ്ലേയില്‍ രണ്ട് വിക്കറ്റിന് 62 എന്ന സ്കോര്‍ നേടിയിരുന്നു. ഇന്നിംഗ്സിലെ മൂന്നാം ഓവറിലെ മൂന്നാം പന്തില്‍ ഇഷാന്ത് ശര്‍മ്മ ഒന്നാന്തരം ബൗണ്‍സറില്‍ മായങ്ക് അഗര്‍വാളിനെ(6 പന്തില്‍ 5) വിക്കറ്റിന് പിന്നില്‍ ഫിലിപ് സാള്‍ട്ടിന്‍റെ കൈകളില്‍ എത്തിച്ചു. മിച്ചല്‍ മാര്‍ഷ് അ‍ഞ്ചാം ഓവറിലെ നാലാം പന്തില്‍ രാഹുല്‍ ത്രിപാഠിയെ(6 പന്തില്‍ 10) മനീഷ് പാണ്ഡെയുടെ കൈകളിലെത്തിച്ചു. എന്നാല്‍ ആറ് ഓവര്‍ പിന്നിട്ടപ്പോള്‍ അഭിഷേക് ശര്‍മ്മയും(39*), ഏയ്‌ഡന്‍ മാര്‍ക്രമും(1*) ചേര്‍ന്ന് ടീമിനെ 60 കടത്തി. മിച്ചല്‍ മാര്‍ഷിന്‍റെ പത്താം ഓവര്‍ സണ്‍റൈസേഴ്‌സിന് ഇരട്ട പ്രഹരം നല്‍കുന്നതാണ് കണ്ടത്. ഏയ്‌ഡന്‍ മാര്‍ക്രമും(13 പന്തില്‍ 8), ഹാരി ബ്രൂക്കും(2 പന്തില്‍ 0) അക്‌സര്‍ പട്ടേലിന്‍റെ കൈകളിലെത്തി.
എന്നാല്‍ ഒരറ്റത്ത് പൊരുതിക്കളിച്ച അഭിഷേക് ശര്‍മ്മ അര്‍ധസെഞ്ചുറി കണ്ടെത്തി. സണ്റൈസേഴ്സ് ഇന്നിംഗ്സിലെ 12-ാം ഓവറില്‍ അക്‌സര്‍ പട്ടേലാണ് അഭിഷേകിനെ മടക്കിയത്. താരം 36 ബോളില്‍ 12 ഫോറും ഒരു സിക്‌സറും സഹിതം 67 റണ്‍സെടുത്തു. 15 ഓവര്‍ പൂര്‍ത്തിയാകുമ്പോള്‍ 135-5 എന്ന സ്കോറിലായിരുന്നു സണ്റൈസേഴ്സ്. തൊട്ടടുത്ത ഓവറില്‍ അക്‌സറിനെ തുടര്‍ച്ചയായി രണ്ട് സിക്സിന് പറത്തി ഹെന്‍‌റിച്ച് ക്ലാസന്‍ ടീമിനെ 150 കടത്തി. 17-ാം ഓവറിലെ അവസാന പന്തില്‍ അബ്‌ദുല്‍ സമദിനെ(21 പന്തില്‍ 28) പുറത്താക്കി മിച്ചല്‍ മാര്‍ഷ് നാല് വിക്കറ്റ് തികച്ചു. ഇന്നിംഗ്സിലെ 19-ാം ഓവറും എറിയാന്‍ മിച്ചല്‍ എത്തിയെങ്കിലും വിക്കറ്റൊന്നും കൂടുതല്‍ നേടാനായില്ല. നോര്‍ക്യയുടെ 20-ാം ഓവറില്‍ 12 റണ്‍സ് പിറന്നതോടെ സണ്റൈസേഴ്സ് മികച്ച സ്കോറിലെത്തി. ഹെന്‍‌റിച്ച് ക്ലാസനും(27 പന്തില്‍ 53*), അക്കീല്‍ ഹൊസൈനും(10 പന്തില്‍ 16*) പുറത്താവാതെ നിന്നു.
Read more: പന്തെറിഞ്ഞതും ബാറ്റ് ചെയ്‌തതും ക്യാച്ചെടുത്തതും അഫ്‌ഗാന്‍ താരങ്ങള്‍! ഐപിഎല്ലില്‍ അത്യപൂര്‍വ നിമിഷം