കിങ്‌സ് ഇലവന്‍ പഞ്ചാബിനോടേറ്റ തോല്‍വിയുടെ കാരണം വ്യക്തമാക്കി ചെന്നൈ സൂപ്പര്‍ കിങ്‌സ് ക്യാപ്റ്റന്‍ എം.എസ്. ധോണി. കെ.എല്‍ രാഹുലിന്റെ ഇന്നിങ്‌സാണ് കിങ്‌സ് ഇലവനെ തുണച്ചതെന്ന് ധോണി വ്യക്തമാക്കി.
മൊഹാലി: കിങ്‌സ് ഇലവന്‍ പഞ്ചാബിനോടേറ്റ തോല്‍വിയുടെ കാരണം വ്യക്തമാക്കി ചെന്നൈ സൂപ്പര്‍ കിങ്‌സ് ക്യാപ്റ്റന്‍ എം.എസ്. ധോണി. കെ.എല്‍ രാഹുലിന്റെ ഇന്നിങ്‌സാണ് കിങ്‌സ് ഇലവനെ തുണച്ചതെന്ന് ധോണി വ്യക്തമാക്കി. ഇന്ത്യയുടെ ലോകകപ്പ് ടീമില്‍ ഇടം നേടിയ രാഹുലിന്റെ ഇന്നിങ്‌സിനെ പുകഴ്ത്താനും ധോണി മടിച്ചില്ല.
ഇന്ത്യന്‍ വിക്കറ്റ് കീപ്പര്‍ തുടര്‍ന്നു... ക്രഡിറ്റ് മുഴുവന്‍ കിങ്‌സ് ഇലവനുള്ളതാണ്. മൂന്ന് സ്പിന്നര്‍മാരുമായി കളിക്കാന്‍ എളുപ്പമുള്ള പിച്ചായിരുന്നില്ല മൊഹാലിയിലേത്. ആദ്യ ആറോവറില്‍ ബാറ്റേന്തുക ബുദ്ധിമുട്ടായിരുന്നു. എന്നാല്‍ രാഹുല്‍ അതിമനോഹരമായി ബാറ്റ് ചെയ്തു. ക്രിസ് ഗെയ്‌ലിന്റെ പിന്തുണയും മികച്ചതായിരുന്നു. പിന്നീടെത്തിയ നിക്കോളാസ് പുറന്റെ ഇന്നിഹ്‌സും നിര്‍ണായകമായി. ഞങ്ങളെക്കൊണ്ട് ആവുന്നത് മുഴുവന്‍ ചെയ്തുവെന്നും ധോണി കൂട്ടിച്ചേര്‍ത്തു.
മൊഹാലിയില്‍ നടന്ന മത്സരത്തില്‍ ആറ് വിക്കറ്റിനായിരുന്നു കിങ്‌സ് ഇലവന്റെ വിജയം. ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ സൂപ്പര്‍ കിങ്‌സ് അഞ്ച് വിക്കറ്റ് നഷ്ടത്തില്‍ 170 റണ്‍സ് നേടി. പഞ്ചാബ് 18 ഓവറില്‍ ലക്ഷ്യം മറികടന്നു. 71 റണ്‍സ് നേടിയ രാഹുലാണ് വിജയം എളുപ്പമാക്കിയത്.