വസിം ജാഫര്‍, സച്ചിന്‍ ടെന്‍ഡുല്‍ക്കര്‍ ഫുട്‌ബോള്‍ താരം സുനില്‍ ഛേത്രി തുടങ്ങിയവരെല്ലാം ഇന്ത്യന്‍ ഹോക്കി ടീമിന് ആശംസയുമായെത്തി. രാഷ്ട്രീയ രംഗത്തെ പ്രമുഖരും ഇക്കൂട്ടത്തിലുണ്ടായിരുന്നു. നേരത്തെ പ്രധാനമന്ത്രി നരേന്ദ്ര മോദി അഭിനന്ദനം അറിയിച്ചിരുന്നു.
വെങ്കലത്തിനായുള്ള മത്സരത്തില്‍ 5-4നാണ് ഇന്ത്യ ജര്‍മനിയെ തോല്‍പ്പിച്ചത്.
3-1ന് പിറകില്‍ നിന്ന ശേഷം ടീം തിരിച്ചെത്തുകയായിരുന്നു.
അവസാന സെക്കന്‍ഡില്‍ പെനാല്‍റ്റി കോര്‍ണര്‍ തടഞ്ഞിട്ട മലയാളി ഗോള്‍ കീപ്പര്‍ പി ആര്‍ ശ്രീജേഷ് ഇന്ത്യയുടെ വിജയത്തില്‍ നിര്‍ണായക പങ്കുവഹിച്ചു.
ഒളിംപിക് മെഡല്‍ നേടുന്ന രണ്ടാമത്തെ മലയാളിയാണ് ശ്രീജേഷ്.
കണ്ണൂരുകാരനായ മാനുവല്‍ ഫ്രെഡറിക്കാണ് ആദ്യത്തെ മലയാളി.
1972 മ്യൂനിച്ച് ഒളിംപിക്‌സില്‍ ഇന്ത്യ വെങ്കലം നേടുമ്പോള്‍ ഫ്രെഡറിക്കായിരുന്നു ഗോള്‍ കീപ്പര്‍.
ടോക്യോ ഒളിംപിക്‌സ് ഹോക്കിയില്‍ ഓസ്‌ട്രേലിയയോട് മാത്രമാണ് ഇന്ത്യ തോല്‍വി അറിഞ്ഞത്.
രണ്ടാം മത്സരത്തില്‍ തന്നെ ഇന്ത്യ 7-1ന്റെ തോല്‍വി രുചിച്ചു.
പിന്നീട് ശക്തമായി തിരിച്ചുവന്ന ഇന്ത്യ കരുത്തരായ അര്‍ജന്റീന, സ്‌പെയ്ന്‍ എന്നിവരെ തോല്‍പ്പിച്ച് ക്വാര്‍ട്ടറിലെത്തി.
ക്വാര്‍ട്ടറില്‍ ബ്രിട്ടണെ ഞെട്ടിച്ച് സെമി ഫൈനലില്‍ ഇടം നേടി.
സെമിയില്‍ കരുത്തരായ ബെല്‍ജിയത്തോട് തോല്‍ക്കുകയായിരുന്നു.
പിന്നീടാണ് വെങ്കലത്തിനായുള്ള മത്സരത്തില്‍ ജര്‍മനിയെ നേരിട്ടത്.
ഒരു ത്രില്ലര്‍ മത്സരത്തിലാണ് ഇന്ത്യ ജര്‍മനിയെ മറികടന്നത്.
ആദ്യ ക്വാര്‍ട്ടറില്‍ തിമൂറിലൂടെ ജര്‍മനി ലീഡെടുത്തിരുന്നു.
എന്നാല്‍ രണ്ടാം ക്വാര്‍ട്ടറിന്റെ തുടക്കത്തില്‍ സിമ്രന്‍ജീത് ഇന്ത്യയെ ഒപ്പമെത്തിച്ചു.
വൈകാതെ വില്ലെന്‍ ജര്‍മനിക്ക് വീണ്ടും മുന്‍തൂക്കം നല്‍കി.
പിന്നാലെ ഫര്‍ക്കിലൂടെ ജര്‍മനി 3-1ന്റെ വ്യക്തമായ ആധിപത്യം നേടുകയും ചെയ്തു.
എന്നാല്‍ ഇതിന് ശേഷം ഇരട്ട ഗോളുമായി തിരിച്ചെത്തുന്ന ഇന്ത്യയെയാണ് ടോക്കിയോയില്‍ കണ്ടത്.
റീബൗണ്ടില്‍ നിന്ന് ഹര്‍ദിക് മത്സരത്തില്‍ ഇന്ത്യയുടെ രണ്ടാം ഗോള്‍ നേടിയപ്പോള്‍ ഹര്‍മന്‍പ്രീതാണ് മൂന്നാം ഗോളുമായി ഇന്ത്യയെ ഒപ്പമെത്തിച്ചു.
ഇതോടെ സ്‌കോര്‍ 3-3. ടൂര്‍ണമെന്റില്‍ ഹര്‍മന്‍പ്രീതിന്റെ ആറാം ഗോള്‍ കൂടിയാണിത്.
മൂന്നാം ക്വാര്‍ട്ടറിലും ഇന്ത്യ അതിശക്തമായ തിരിച്ചുവരവ് തുടര്‍ന്നതോടെ ഗോള്‍മഴയായി.
രൂപീന്ദറും സിമ്രന്‍ജിതും ലക്ഷ്യം കണ്ടപ്പോള്‍ ഇന്ത്യ 5-3ന്റെ ലീഡ് കയ്യടക്കി.
അവസാന ക്വാര്‍ട്ടറില്‍ തുടക്കത്തിലെ ഗോള്‍ മടക്കി ജര്‍മനി ഒരുവേള ഇന്ത്യയെ പ്രതിരോധത്തിലാക്കി.
എന്നാല്‍ ശ്രീജേഷ് കീഴടങ്ങാന്‍ കൂട്ടാക്കാതിരുന്നതോടെ ഇന്ത്യ കാത്തിരുന്ന ജയം സ്വന്തമാക്കുകയായിരുന്നു.
അവസാന സെക്കന്‍ഡില്‍ അപകടം മണത്ത പെനാല്‍റ്റി കോര്‍ണര്‍ ശ്രീജേഷ് തടുത്തതോടെ ഇന്ത്യ ലോക ഹോക്കിയില്‍ ഐതിഹാസിക തിരിച്ചുവരവ് അടയാളപ്പെടുത്തി.
ഇന്ത്യന്‍ വനിതകളും നാളെ വെങ്കലത്തിനായി മത്സരിക്കും.
നാളെ നടക്കുന്ന മത്സരത്തില്‍ ബ്രിട്ടണനാണ് ഇന്ത്യയുടെ എതിരാളി