ലൊക്കേഷന്‍ കൊവിഡിനെ തോല്‍പ്പിച്ച ന്യൂസിലന്‍ഡില്‍; 'അവതാര്‍' 2 ചിത്രീകരണം പുനരാരംഭിച്ച് ജെയിംസ് കാമറൂണ്‍
First Published | May 9, 2020, 12:25 AM ISTലോക സിനിമയില്‍ എക്കാലത്തെയും വലിയ രണ്ടാമത്തെ ബോക്സ് ഓഫീസ് വിജയമായിരുന്നു അവതാര്‍. ജയിംസ് കാമറൂണിന്‍റെ സംവിധാനത്തില്‍ 2009ല്‍ പുറത്തെത്തിയ എപിക് സയന്‍സ് ഫിക്ഷന്‍ ചിത്രത്തിന് വരാനിരിക്കുന്ന നാല് ഭാഗങ്ങള്‍ ഒരുമിച്ചാണ് പ്രഖ്യാപിക്കപ്പെട്ടിരുന്നത്. രണ്ടാംഭാഗം അടുത്ത വര്‍ഷവും മൂന്നാം ഭാഗം 2023ലും നാലാംഭാഗം 2025ലും അഞ്ചാം ഭാഗം 2027ലും റിലീസ് ചെയ്യാനാണ് നിര്‍മ്മാതാക്കളുടെ പദ്ധതി. രണ്ട്, മൂന്ന് ഭാഗങ്ങളുടെ ചിത്രീകരണം ഒരുമിച്ച് പുരോഗമിക്കുന്നതിനിടയിലാണ് കൊവിഡ് ഭീഷണിയെത്തുടര്‍ന്ന് മിക്ക രാജ്യങ്ങളും ലോക്ക് ഡൗണിലേക്ക് പോയത്. എന്നാല്‍ ഇപ്പോഴിതാ നിര്‍ത്തിവച്ചിരുന്ന ചിത്രീകരണം പുനരാരംഭിച്ചിരിക്കുകയാണ് സംവിധായകന്‍ ജെയിംസ് കാമറൂണ്‍. കൊവിഡിനെ ഫലപ്രദമായി നിയന്ത്രിക്കാനായ ന്യൂസിലന്‍ഡിലാണ് ചിത്രീകരണം പുനരാരംഭിച്ചിരിക്കുന്നത്.