ഒക്‌ടാ-കോര്‍ മീഡിയടെക് ഹിലീയോ ജി85 ചിപ്‌സെറ്റിലാണ് സാംസങ് ഗ്യാലക്‌സി എ06യുടെ വരവ്
ദില്ലി: ബജറ്റ് സ്‌മാര്‍ട്ട്‌ഫോണ്‍ വിഭാഗത്തില്‍പ്പെടുന്ന സാംസങ് ഗ്യാലക്‌സി എ06 ഇന്ത്യയിലെത്തി. മുന്‍ഗാമിയായ ഗ്യാലക്‌സി എ05നോട് രൂപഘടനയില്‍ ഏറെ സാദൃശ്യം ഈ മോഡലിനുണ്ട്. മറ്റ് രാജ്യങ്ങളിലെത്തി ദിവസങ്ങള്‍ക്ക് ശേഷമാണ് ഗ്യാലക്‌സി എ06യില്‍ അവതരിപ്പിച്ചിരിക്കുന്നത്. മികച്ച ക്യാമറ, ബാറ്ററി കപ്പാസിറ്റി എന്നിവയാണ് പ്രധാന ആകര്‍ഷണങ്ങള്‍.
ഒക്‌ടാ-കോര്‍ മീഡിയടെക് ഹിലീയോ ജി85 ചിപ്‌സെറ്റിലാണ് സാംസങ് ഗ്യാലക്‌സി എ06യുടെ വരവ്. ആന്‍‍ഡ്രോയ്‌ഡ് 14 ആണ് പ്ലാറ്റ്ഫോം. 6.7 ഇഞ്ച് എച്ച്‌‍ഡി+ ഡിസ്‌പ്ലെ വരുന്ന ഫോണിന് 50 മെഗാപിക്‌സലിന്‍റെ ഡുവല്‍ റീയര്‍ ക്യാമറ യൂണിറ്റാണ് വരുന്നത്. 50 എംപിയുടെ പ്രധാന സെന്‍സറിനൊപ്പം 2 എംപിയുടെ ഡെപ്‌ത് സെന്‍സറും എല്‍ഇഡി ഫ്ലാഷും ഉള്‍പ്പെടുന്നു. എട്ട് മെഗാപിക്‌സലിന്‍റെതാണ് സെല്‍ഫി ക്യാമറ. ഉയര്‍ന്ന ബാറ്ററിയാണ് ഏറ്റവും പ്രധാന സവിശേഷത. 5,000 എംഎഎച്ച് ബാറ്ററി വരുന്നതിനാല്‍ 25 വാട്ട്‌സ് ഫാസ്റ്റ് ചാര്‍ജിംഗ് ആണ് സാംസങ് ഗ്യാലക്‌സി എ05നുള്ളത്.
Read more: ഈ ഐഫോണ്‍ മോഡലുകള്‍ക്ക് അധികം ആയുസില്ല; ഉടന്‍ വിപണിയില്‍ നിന്ന് പിന്‍വലിക്കാന്‍ സാധ്യത
4ജിബി റാമും 64 ജിബി സ്റ്റോറേജും വരുന്ന അടിസ്ഥാന വേരിയന്‍റിന് 9,999 രൂപയാണ് വില. അതേസമയം 4 ജിബി+128 ജിബി വേരിയന്‍റിന് 11,499 രൂപയാകും. സാംസങ് ഇന്ത്യ വെബ്‌സൈറ്റ് വഴി ഫോണ്‍ വാങ്ങാം. കറുപ്പ്, സ്വര്‍ണം, ഇളംനീല എന്നീ നിറങ്ങളിലുള്ള മോഡലുകള്‍ ലഭ്യം. മൈക്രോ എസ്‌ഡി കാര്‍ഡ് വഴി സ്റ്റോറേജ് 1 ടിബി വരെ വര്‍ധിപ്പിക്കാം.
ഇരട്ട 4ജി, വൈഫൈ, ബ്ലൂടൂത്ത് 5.3, ജിപിഎസ്, 3.3 എംഎം ഓഡിയോ ജാക്ക്, ടൈപ്പ് സി യുഎസ്‌ബി എന്നിവയാണ് കണക്റ്റിവിറ്റി സൗകര്യങ്ങള്‍. സൈഡ്-മൗണ്ടഡ് ഫിംഗര്‍പ്രിന്‍റ് സെന്‍സറും സാംസങ് ഗ്യാലക്‌സി എ06ല്‍ ഉള്‍പ്പെടുന്നു. 189 ഗ്രാമാണ് ഫോണിന്‍റെ ഭാരം.
Read more: മൂന്നായി മടക്കി പോക്കറ്റില്‍ വെക്കാം; ലോകത്തെ ആദ്യ ട്രൈ-ഫോള്‍ഡ് ഫോണ്‍ ഉടന്‍ വരുന്നു- റിപ്പോര്‍ട്ട്
ഏഷ്യാനെറ്റ് ന്യൂസ് ലൈവ് യൂട്യൂബിൽ കാണാം