കുടലിന്റെ ആരോഗ്യം സംരക്ഷിക്കാനായി സമീകൃതാഹാരവും ആരോഗ്യകരമായ ജീവിതശൈലിയും അത്യന്താപേക്ഷിതമാണ്. കൂടാതെ, ചില വിറ്റാമിനുകൾക്ക് പ്രത്യേകമായി കുടലിന്റെ ആരോഗ്യത്തെ മെച്ചപ്പെടുത്താന്‍ കഴിയും.
വയറിന്‍റെ ആരോഗ്യം സംരക്ഷിക്കേണ്ടത് ശരീരത്തിന്‍റെ മൊത്തം ആരോഗ്യത്തിന് ഗുണം ചെയ്യും. വയറില്‍ താമസിക്കുന്ന ലക്ഷണക്കണക്കിനായ സൂക്ഷ്മ ബാക്ടീരിയകള്‍ ദഹന സംവിധാനത്തെ ആരോഗ്യത്തോടെ സൂക്ഷിക്കുന്നു. ദഹനത്തിന് പുറമേ പോഷകങ്ങൾ ആഗിരണം ചെയ്യൽ, രോഗപ്രതിരോധ പ്രവർത്തനം മെച്ചപ്പെടുത്തുക തുടങ്ങിയവയിലും കുടല്‍ ഒരു പ്രധാന പങ്ക് വഹിക്കുന്നു. പല കാരണങ്ങള്‍ കൊണ്ടും കുടലിന്റെ ആരോഗ്യം മോശമാകാം.
കുടലിന്റെ ആരോഗ്യം സംരക്ഷിക്കാനായി സമീകൃതാഹാരവും ആരോഗ്യകരമായ ജീവിതശൈലിയും അത്യന്താപേക്ഷിതമാണ്. കൂടാതെ, ചില വിറ്റാമിനുകൾക്ക് പ്രത്യേകമായി കുടലിന്റെ ആരോഗ്യത്തെ മെച്ചപ്പെടുത്താന്‍ കഴിയും. ആരോഗ്യകരമായ കുടലിന് വേണ്ടി ഇത്തരം വിറ്റാമിനുകള്‍ അടങ്ങിയ ഭക്ഷണങ്ങള്‍ ഡയറ്റില്‍ ഉള്‍പ്പെടുത്താം. അവ ഏതൊക്കെയാണെന്ന് നോക്കാം...
undefined
1. വിറ്റാമിന്‍ എ
പൊതുവേ കാഴ്ച ശക്തി കൂട്ടാനും രോഗപ്രതിരോധശേഷി വര്‍ധിപ്പിക്കാനുമുള്ള കഴിവിന്‍റെ പേരിലാണ് വിറ്റാമിന്‍ എ അറിയപ്പെടുന്നത്. എന്നാല്‍ വിറ്റാമിൻ എ കുടലിന്റെ ആരോഗ്യം സംരക്ഷിക്കാനും സഹായിക്കും. വിറ്റാമിൻ എ പോഷകങ്ങളുടെ ശരിയായ ആഗിരണം ഉറപ്പാക്കുകയും ദോഷകരമായ വസ്തുക്കൾ രക്തപ്രവാഹത്തിൽ പ്രവേശിക്കുന്നത് തടയുകയും ചെയ്യുന്നു. വിറ്റാമിൻ എയുടെ നല്ല ഉറവിടങ്ങളിൽ കരൾ, മത്സ്യ എണ്ണ, മുട്ട, ക്യാരറ്റ്, മധുരക്കിഴങ്ങ്, ചീര തുടങ്ങിയ പഴങ്ങളും പച്ചക്കറികളും ഉൾപ്പെടുന്നു. വിറ്റാമിൻ എയുടെ സ്വാദിഷ്ടമായ ഉറവിടം കൂടിയാണ് മാമ്പഴം.
2. വിറ്റാമിന്‍ ഡി
പലപ്പോഴും "സൺഷൈൻ വിറ്റാമിൻ" എന്ന് വിളിക്കപ്പെടുന്ന വിറ്റാമിൻ ഡി അസ്ഥികളുടെ ആരോഗ്യത്തിന് മാത്രമല്ല, കുടലിന്റെ ആരോഗ്യത്തിനും പ്രധാനമാണ്. ഇത് രോഗപ്രതിരോധ സംവിധാനത്തെ ക്രമീകരിക്കാനും കുടലിലെ വീക്കം കുറയ്ക്കാനും സഹായിക്കുന്നു. വിറ്റാമിൻ ഡി ദഹനം മെച്ചപ്പെടുത്താനും മലബന്ധത്തെ തടയാനും സഹായിക്കും. വിറ്റാമിൻ ഡിയുടെ പ്രാഥമിക ഉറവിടം സൂര്യപ്രകാശമാണ്. എന്നാൽ ഇത് സാൽമൺ, അയല തുടങ്ങിയ കൊഴുപ്പുള്ള മത്സ്യങ്ങൾ, പാലുൽപ്പന്നങ്ങൾ, മുട്ടയുടെ മഞ്ഞക്കരു എന്നിവയിലും കാണാം. വിറ്റാമിൻ ഡിയുടെ മറ്റൊരു വൈവിധ്യമാർന്ന ഉറവിടമാണ് കൂൺ അഥവാ മഷ്റൂം.
3. ബി വിറ്റാമിനുകള്‍
ബി 1 (തയാമിൻ), ബി 2 (റൈബോഫ്ലേവിൻ), ബി 3 (നിയാസിൻ), ബി 6 (പിറിഡോക്സിൻ), ബി 9 (ഫോളേറ്റ്), ബി 12 (കോബാലമിൻ) എന്നിവയുൾപ്പെടെയുള്ള ബി വിറ്റാമിനുകൾ ആരോഗ്യകരമായ കുടൽ നിലനിർത്താൻ അത്യാവശ്യമാണ്. ഊർജ്ജ ഉത്പാദനം, നാഡികളുടെ പ്രവർത്തനം, ചുവന്ന രക്താണുക്കളുടെ സമന്വയം എന്നിവയ്ക്കും ഇവ സഹായിക്കും. ദഹനവ്യവസ്ഥയ്ക്ക് ഗുണം ചെയ്യുന്ന ബാക്ടീരിയകളുടെ കൂട്ടായ്മയായ ഗട്ട് മൈക്രോബയോമിനെ പിന്തുണയ്ക്കുന്നതിൽ ബി വിറ്റാമിനുകളും നിർണായക പങ്ക് വഹിക്കുന്നു. ധാന്യങ്ങൾ, പയർവർഗങ്ങൾ, ഇലക്കറികൾ, മാംസം, മത്സ്യം, മുട്ട എന്നിവയാണ് ബി വിറ്റാമിനുകളുടെ നല്ല ഉറവിടങ്ങള്‍.
4. വിറ്റാമിന്‍ സി
രോഗ പ്രതിരോധശേഷി വര്‍ധിപ്പിക്കുന്നതില്‍ പേരുകേട്ടതാണ് വിറ്റാമിന്‍ സി. എന്നാൽ ഇതും കുടലിന്റെ ആരോഗ്യത്തിന് ഏറെ ഗുണം ചെയ്യും. വിറ്റാമിൻ സി ഒരു ശക്തമായ ആന്റിഓക്‌സിഡന്റാണ്. ഇത് കുടലിന്റെ ആരോഗ്യത്തിന് ഏറെ ഗുണം ചെയ്യും. സിട്രസ് പഴങ്ങൾ, ബെറി പഴങ്ങള്‍, കിവി, ഇലക്കറികൾ എന്നിവയാണ് വിറ്റാമിൻ സിയുടെ മികച്ച ഉറവിടങ്ങള്‍.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില്‍ മാറ്റം വരുത്തുക.
Also read: വണ്ണം കുറയ്ക്കണോ? പതിവായി ഡയറ്റില്‍ ഉള്‍പ്പെടുത്താം ഈ നട്സ്...