അക്ഷയ് കുമാറിനെപ്പോലുള്ള ഒരു താരത്തിന്‍റെ കരിയറിലെ തന്നെ മോശം റിലീസ് വാരാന്ത്യ കളക്ഷനാണ് സര്‍ഫിറ നേടിയത്.
മുംബൈ: ഈ വെള്ളിയാഴ്ചയാണ് അക്ഷയ് കുമാര്‍ നായകനായ സർഫിറ റിലീസ് ചെയ്തത്. ബിഗ് ബജറ്റും താരനിരയും ഉണ്ടായിരുന്നിട്ടും ചിത്രം ബോക്‌സ് ഓഫീസിൽ ദയനീയമായ പ്രകടനമാണ് പുറത്തെടുക്കുന്നത്. ആദ്യ ദിനം 2.5 കോടിയും ശനിയാഴ്ച 4.25 കോടിയും ഞായറാഴ്ച 5.25 കോടിയും നേടിയ ചിത്രം വാരാന്ത്യത്തിൽ 12 കോടി നേടി. എന്നാല്‍ തിങ്കളാഴ്ച വീണ്ടും 1.5 കോടിക്ക് താഴെയാണ് ചിത്രത്തിന്‍റെ കളക്ഷന്‍ എന്നാണ് വിവരം.
അക്ഷയ് കുമാറിനെപ്പോലുള്ള ഒരു താരത്തിന്‍റെ കരിയറിലെ തന്നെ മോശം റിലീസ് വാരാന്ത്യ കളക്ഷനാണ് സര്‍ഫിറ നേടിയത്. കഴിഞ്ഞ നാല് വര്‍ഷത്തില്‍ അക്ഷയ് കുമാറിന്‍റെ പടങ്ങള്‍ എല്ലാം തന്നെ ഫ്ലോപ്പായിരുന്നു. സർഫിറയുടെ കളക്ഷൻ നോക്കുമ്പോൾ നാല് കൊല്ലത്തിനിടെ അക്ഷയ് കുമാര്‍ നായകനായ ഒമ്പതാമത്തെ ഫ്ലോപ്പ് ആണെന്ന് പറയാം. കഴിഞ്ഞ വർഷം ഓ മൈ ഗോഡ് 2 ൽ അക്ഷയ് അഭിനയിച്ചിരുന്നു ഈ ചിത്രം ഹിറ്റായിരുന്നു. എന്നാല്‍ ഈ ചിത്രത്തില്‍ പ്രധാന കഥാപാത്രത്തെ അവതരിപ്പിച്ചത് പങ്കജ് ത്രിപാഠി ആയിരുന്നു. ഇത് മാറ്റിനിർത്തിയാൽ, അക്ഷയുടെ എല്ലാ ചിത്രങ്ങളും ബോക്സോഫീസിൽ ദുരന്തങ്ങളാണ് എന്ന് പറയാം.
undefined
2021ൽ അക്ഷയ്‌യുടെ സൂര്യവംശി എന്ന ചിത്രമാണ് അക്ഷയ് കുമാറിന്‍റെ അവസാന ഹിറ്റെന്ന് പറയാം. അതിലും രണ്‍വീര്‍ സിംഗും, അജയ് ദേവഗണും അതിഥി വേഷത്തില്‍ എത്തിയിരുന്നു. അതിനെ തുടർന്ന് അത്രംഗി രേ, ബച്ചൻ പാണ്ഡെ, സാമ്രാട്ട് പൃഥ്വിരാജ്, രക്ഷാ ബന്ധൻ, കട്പുട്ട്ലി (ഒടിടിയിൽ റിലീസ് ചെയ്തത്), രാം സേതു, ഓ മൈ ഗോഡ് 2, സെൽഫി, മിഷൻ റാണിഗഞ്ച്, ബഡേ മിയാൻ ഛോട്ടേ മിയാൻ, ഇപ്പോൾ സർഫിറ തുടങ്ങിയ ചിത്രങ്ങളാണ് അക്ഷയുടെതായി എത്തിയത്. ഒടിടിയിൽ റിലീസ് ചെയ്ത ബച്ചന്‍ പാണ്ഡേ, ഒഎംജി 2 എന്നിവ മാറ്റി നിര്‍ത്തിയാലും വന്‍ പരാജയങ്ങളാണ് മറ്റുള്ള ചിത്രങ്ങള്‍ എന്ന് കാണാം.
"അക്ഷയ് ചെയ്യുന്ന സിനിമകളിൽ ഭൂരിഭാഗവും കോവിഡ്-19 കാലത്തിന് മുമ്പോ അതിനു മുമ്പോ ഒപ്പിട്ടതാണ്. നമുക്കെല്ലാവർക്കും അറിയാവുന്നതുപോലെ, കോവിഡിന് ശേഷമുള്ള സിനിമകളും പ്രേക്ഷകരുടെ അഭിരുചികളും മാറിയിട്ടുണ്ട്. പല സിനിമകളിലും അക്ഷയ് മികച്ച പ്രകടനം കാഴ്ചവച്ചിട്ടുണ്ടെങ്കിലും, അവ റീമേക്കുകളും മറ്റുമാണ്. അത് അക്ഷയ് ഒഴിവാക്കണമെന്ന് ഞാൻ കരുതുന്നു, കാരണം അവയുടെ ഒറിജിനൽ ഒടിടിയിലോ യൂട്യൂബിലോ റിലീസ് ചെയ്തിട്ടുണ്ട്. ഇപ്പോള്‍ മികച്ച ചിത്രങ്ങള്‍ ആളുകള്‍ ഭാഷഭേദം ഇല്ലാതെ കാണുന്നുണ്ട്" അക്ഷയുടെ ചിത്രങ്ങള്‍ക്ക് സംബന്ധിക്കുന്നതിനെക്കുറിച്ച് സംസാരിച്ച മാധ്യമ പ്രവര്‍ത്തകന്‍ ഭാരതി ദുബെ പറയുന്നു. 100 കോടിയോളം അക്ഷയ് ഒരോ ചിത്രത്തിനും പ്രതിഫലം വാങ്ങുന്നുണ്ട്. എന്നാല്‍ അവസാന പല ചിത്രങ്ങളിലും താരത്തിന് പ്രതിഫലം ലഭിച്ചില്ലെന്നും വിവരമുണ്ട്.
സിനിമാ ട്രേഡ് അനലിസ്റ്റ് ഗിരീഷ് വാങ്കഡെ അക്ഷയ് കുമാര്‍ സിനിമയുടെ പരാജയത്തിന് മൂന്ന് കാരണങ്ങൾ ചൂണ്ടിക്കാണിക്കുന്നു: "ഒടിടിയിൽ ഇതിനകം ലഭ്യമായ ഒരു സിനിമയിൽ ആളുകൾ താൽപ്പര്യപ്പെടുവാന്‍ ഒരു കാരണവും ഇല്ല. രണ്ടാമതായി, സിനിമയുടെ മാർക്കറ്റിംഗും പ്രൊമോഷനും വളരെ മോശമായിരുന്നു. അക്ഷയുമായുള്ള അഭിമുഖങ്ങളോ പത്രസമ്മേളനങ്ങളോ ഉണ്ടായിരുന്നില്ല. ഒരു അക്ഷയ് കുമാർ ചിത്രത്തിന്‍റെ ആദ്യ ദിന കളക്ഷൻ 2.5 കോടി മാത്രമാണെങ്കിൽ, അത് അദ്ദേഹത്തിന്‍റെ താരപദവിയെ തന്നെ ചോദ്യം ചെയ്യുന്നതാണ്".
ഓഗസ്റ്റ് 15 ന് മറ്റൊരു അക്ഷയ് കുമാർ ചിത്രം ഖേൽ ഖേൽ മേ പുറത്തിറങ്ങാനുണ്ട്. എന്നാൽ, ഈ ചിത്രത്തെക്കുറിച്ച് ഒരു പ്രമോഷനും ആരംഭിച്ചിട്ടില്ല. കൂടാതെ, ജോൺ എബ്രഹാമിന്‍റെ വേദ, രാജ്കുമാർ റാവു, ശ്രദ്ധ കപൂറിന്‍റെ സ്ട്രീ 2 എന്നിവയും അതേ ദിവസം തന്നെ റിലീസ് ചെയ്യുന്നുണ്ട്. അതേ സമയം ഖേൽ ഖേൽ മേ എന്ന ചിത്രത്തിന് ശേഷം മള്‍ട്ടി സ്റ്റാര്‍ ചിത്രം സിംഗം എഗെയ്ന്‍ മാത്രമാണ് അക്ഷയ് കുമാറിന്‍റെ ലിസ്റ്റില്‍ ഇപ്പോള്‍ ഓണായ ഏക ചിത്രം. അതിനാല്‍ തന്നെ വരുന്ന ചിത്രങ്ങളുടെ വിജയം താരത്തിന് നിര്‍ണ്ണായകമാണ്.
'ഇനി ഒരു അവസരം കിട്ടിയാൽ?': സെക്കന്‍ഡ് ചാൻസ് ക്യാമ്പയിനുമായി 'വിശേഷം' ടീം