ഹിറ്റ് സിനിമകള്‍ക്കൊപ്പം സൂപ്പര്‍ ഹിറ്റ് ഡയലോഗുകളും സമ്മാനിച്ച വര്‍ഷം.
നമ്മുടെ എല്ലാം ജീവിതത്തിൽ ചില സന്ദർഭങ്ങളുണ്ടാകും. വാക്കുകൾ കൊണ്ട് വിവരിക്കാനാകാത്തവയും അല്ലാത്തവയും. തതവസരത്തിൽ നമ്മുടെ അവസ്ഥ വിവരിക്കാൻ ഇതിലും പറ്റിയ ഡയലോഗ് വേറെയില്ലെന്ന് ചില സിനിമാ ഡയലോഗുകൾ നമ്മെ ഓർമിപ്പിക്കും. അതിപ്പോൾ കൊച്ചു കുട്ടികൾ മുതൽ മുതിർന്നവരോട് വരെ ഈ ഡയലോഗുകളാകും പറയുക. അതിന് ഉദാഹരണങ്ങൾ അനവധിയുമാണ്. അത്തരത്തിൽ ഒരുകൂട്ടം പഞ്ച് സിനിമാ ഡയലോഗുകൾ മലയാളികൾക്ക് സമ്മാനിച്ച വർഷമാണ് 2024. വർഷം തീരാനൊരുങ്ങുമ്പോഴും ഈ ഡയലോഗുകൾ നിത്യജീവിതത്തിൽ മലയാളികൾ ഉപയോഗിച്ചുകൊണ്ടേയിരിക്കുന്നു എന്നത് ഏറെ ശ്രദ്ധേയമാണ്. അക്കൂട്ടത്തിലെ ഏതാനും ചില ഡയലോഗുകളൊന്ന് പരിചയപ്പെടാം.
കൂട്ടത്തിലെ കൊമ്പൻ 'എടാ മോനേ..'
undefined
2024ലെ ഏറ്റവും ഹിറ്റ് ഡയലോഗ് ഏതെന്ന് ചോദിച്ചാൽ ഒറ്റ ഉത്തരമെ ഉണ്ടാകൂ. ആവേശം സിനിമയിലെ ഫഹദ് ഫാസിലിന്റെ ഡയലോഗുകൾ. രംഗൻ എന്ന കഥാപാത്രമായി ഫഹദ് നിറഞ്ഞാടിയപ്പോഴെല്ലാം പഞ്ച് ഡയലോഗുകളുടെ അകമ്പടിയും ഉണ്ടായിരുന്നു. അതുകൊണ്ട് തന്നെ ഈ വർഷത്തെ കൊമ്പൻ 'എടാ മോനേ' എന്ന് തന്നെ പറയേണ്ടി വരും. സന്ദർഭോചിതമായി ഇപ്പോഴും എടാ മോനേന്ന് വിളിക്കാത്ത യുവാക്കൾ വളരെ ചുരുക്കമാകും. ഈ ഡയലോഗോടെ രംഗണ്ണന്റെ കഥ അവസാനിക്കുന്നില്ല. 'ഇതൊക്കെ ശ്രദ്ധിക്കണ്ടേ അമ്പാനെ' എന്ന് രംഗണ്ണന്‍ പറയുന്നതും ശ്രദ്ധിക്കപ്പെട്ടു. രംഗൻ മാത്രമല്ല അമ്പാന്റെ 'ശ്രദ്ധിക്കുന്നുണ്ട് അണ്ണാ' എന്ന മറുപടിയും ഹിറ്റ് തന്നെ.
ലൂസടിക്കടാ..
മലയാള സിനിമയിൽ പുത്തൻ റെക്കോർഡ് സമ്മാനിച്ച സിനിമയാണ് മഞ്ഞുമ്മൽ ബോയ്സ്. കേരളവും കടന്ന് പാൻ ഇന്ത്യൻ ലെവലിൽ ശ്രദ്ധിക്കപ്പെട്ട ചിത്രത്തിലെ ഏതാനും ഡയലോഗുകൾ സോഷ്യൽ മീഡിയയിൽ താരമായിരുന്നു. ഒപ്പം റീൽസുകൾ അടക്കിവാണു. ഇതിൽ ശ്രദ്ധേയം ചന്തു സലിംകുമാർ അവതരിപ്പിച്ച അഭിലാഷിന്റെ 'ലൂസടിക്കടാ..'എന്ന ഡയലോഗാണ്. കഥയുടെ ഏറ്റവും മുർദ്ധന്യാവസ്ഥയിൽ നിൽക്കുമ്പോൾ പറഞ്ഞ ഈ ഡയലോഗ് ചെറുതല്ലാത്ത ഓളം തന്നെ തിയറ്ററുകളിൽ സൃഷ്ടിച്ചിരുന്നു. ഈ കഥാപാത്രത്തിന്റെ തന്നെ 'സുഭാഷ് പോയി സുഭാഷ് പോയി', എന്ന ഡയലോഗും ശ്രദ്ധിക്കപ്പെട്ടു. ശ്രീനാഥ് ഭാസിയുടെ സുഭാഷ് എന്ന വേഷത്തിന്റെ 'കുട്ടേട്ടാ…കുട്ടേട്ടാ' എന്ന വിളിയും ഏറെ വൈറലായി മാറിയിരുന്നു.
ജസ്റ്റ് കിഡ്ഡിങ്..
ഗിരീഷ് എഡിയുടെ സംവിധാനത്തിൽ റിലീസ് ചെയ്ത ബ്ലോക് ബസ്റ്റർ ചിത്രമാണ് പ്രേമലു. റൊമന്റിക് കോമഡി വിഭാഗത്തിലിറങ്ങിയ ചിത്രം ഇതര ഭാഷകളിലും ശ്രദ്ധനേടിയപ്പോൾ സൂപ്പർ ഹിറ്റായി മാറിയൊരു ഡയലോഗുണ്ട്. 'ജസ്റ്റ് കിഡ്ഡിങ്'. ശ്യാം മോഹന്റെ ആദി എന്ന കഥാപാത്രത്തിന്റേതായിരുന്നു ഈ ഡയലോഗ്. മലയാളികൾക്കിടയിൽ മാത്രമല്ല അന്യഭാഷക്കാരിലും ഈ ഡയലോഗ് ശ്രദ്ധിക്കപ്പെട്ടു.
നിനക്ക് പോകാന്‍ അനുവാദല്ല്യാ..
പുതുയുഗത്തിൽ ബ്ലാക് ആന്റ് വൈറ്റിൽ പരീക്ഷണം നടത്തിയ സിനിമയാണ് ഭ്രമയുഗം. രാഹുൽ സദാശിവന്റെ സംവിധാനത്തിലൊരുങ്ങിയ ചിത്രം ഏറെ ശ്രദ്ധിക്കപ്പെട്ടിരുന്നു. പാണനെ മനയിൽ തളച്ച കൊടുമൺ പോറ്റിയുടെ(മമ്മൂട്ടി) 'നിനക്ക് പോകാന്‍ അനുവാദല്ല്യാ', എന്ന ഡയലോഗ് ഏറെ ശ്രദ്ധനേടി. ട്രോളുകളിലും ഇത് ഇടംനേടിയിരുന്നു.
ഒറ്റയ്ക്ക് വഴിവെട്ടി വന്നവനാടാ..
വർഷങ്ങൾക്കു ശേഷം എന്ന സിനിമയാണ് അടുത്തത്. വിനീത് ശ്രീനിവാസന്റെ സംവിധാനത്തിൽ റിലീസ് ചെയ്ത ചിത്രത്തിന്റെ വിജയത്തിനൊപ്പം ശ്രദ്ധനേടിയത് നിവിൻ പോളിയുടെ പഞ്ച് ഡയലോഗുകളായിരുന്നു. 'ഒറ്റയ്ക്ക് വഴി വെട്ടി വന്നവനാടാ' എന്ന സംഭാഷണം ഒരിക്കലെങ്കിലും ഉപയോഗിക്കാത്ത മലയാളികൾ വിരളമായിരിക്കും. 'അവന്റെ മകനും ഇവന്റെ മകനും മറ്റവന്റെ മകനും കൂടിയല്ലേ ഇപ്പോൾ മലയാള സിനിമ ഉണ്ടാക്കുന്നത്. ഒറ്റയ്ക്ക് വഴി വെട്ടി വന്നവനാടാ ഞാൻ. ഒറ്റയ്ക്ക് വന്നവനെ കളിയാക്കുന്നോടാ പട്ടികളെ. ബോഡി ഷെയ്മിംഗ് ചെയ്യുന്ന പട്ടികളെ', എന്നിങ്ങനെ പോകുന്നു ആ ഡയലോഗ്.
കാണപ്പോവത് നിജം..
മോഹൻലാലിന്റേതായി ഈ വർഷം റിലീസ് ചെയ്തത് ഒരൊറ്റ സിനിമ മാത്രമാണ്. ലിജോ ജോസ് പെല്ലിശ്ശേരി സംവിധാനം ചെയ്ത മലൈക്കോട്ടൈ വാലിബൻ. 2024ലെ ട്രെന്‍ഡിങ് ഡയലോഗുകളില്‍ ഈ ചിത്രത്തിലെ സംഭാഷണവും ഉണ്ട്. 'നീ കണ്ടതെല്ലാം പൊയ് കാണപ്പോവത് നിജം', എന്നതാണ് ആ ഡയലോഗ്. ട്രോളുകളിലാണ് ഏറ്റവും കൂടുതൽ ഈ സംഭാഷണം ഉപയോഗിച്ച് കണ്ടത്.
ആര് വാണു, ആര് വീണു; രണ്ടാം വരവിലെ ജനപ്രിയർ ആരൊക്കെ ?
It's not a കൊണച്ച പ്ലാൻ..
സമീപകാലത്ത് റിലീസ് ചെയ്ത് പ്രേക്ഷക പ്രശംസ ഏറെ നേടിയ സിനിമയായിരുന്നു സൂക്ഷ്മദർശിനി. നസ്രിയയും ബേസിൽ ജോസഫും ആദ്യമായി ഒന്നിച്ചെത്തിയ ചിത്രം വൻ വിജയം നേടിയപ്പോൾ ശ്രദ്ധിക്കപ്പെട്ടൊരു ഡയലോഗ് കൂടിയുണ്ട്. തന്റെ പ്ലാനിനെ കളിയാക്കിയ മാനുവലിനോട്(ബേസിൽ) കയർത്ത് ഡോ. ജോൺ(സിദ്ധാർത്ഥ് ഭരതൻ) പറയുന്ന "It's not a കൊണച്ച പ്ലാൻ" എന്നതാണ് ആ ഡയലോഗ്.
ഇനി ഇവിടെ ഞാൻ മതി..
നിലവിൽ തിയറ്ററുകളിൽ പ്രദർശനം തുടരുന്ന ഹനീഫ് അദേനി ചിത്രമാണ് മാർക്കോ. റിലീസ് ചെയ്ത ആദ്യദിനം മുതൽ മികച്ച പ്രതികരണങ്ങളോടെ മുന്നേറുന്ന ചിത്രത്തിലെ ഒരു ഡയലോഗ് പ്രേക്ഷക ശ്രദ്ധനേടിയിട്ടുണ്ട്. ഏതാനും ദിവസങ്ങൾക്ക് മുൻപ് റിലീസ് ചെയ്ത മാർക്കോ ആക്ഷൻ ടീസറിന് പിന്നാലെയാണ് ആ സംഭാഷണം ഏറെ ശ്രദ്ധനേടിയത്. 'ഞാൻ വന്നപ്പോൾ മുതൽ എല്ലാ ചെന്നായ്ക്കളും കൂടി എന്നെ കൂട്ടം കൂടി അടികാൻ നോക്കുവ, ഇനി ഇവിടെ ഞാൻ മതി', എന്നാണ് ഡയലോഗ്.
മുകളില്‍ പറഞ്ഞ സംഭാഷണങ്ങള്‍ക്ക് പുറമെ വേറെ നല്ല ഡയലോഗുകള്‍ ഈ വര്‍ഷം മലയാള സിനിമകളില്‍ ഉണ്ടായിട്ടുണ്ട്. അവ ഏതെക്കെയാണെന്ന് പ്രേക്ഷകര്‍ക്ക് കൂട്ടിച്ചേര്‍ക്കാവുന്നതാണ്.
ഏഷ്യാനെറ്റ് ന്യൂസ് തത്സമയ വാർത്തകൾ അറിയാം..