തീയറ്ററില്‍ ചിത്രം വലിയ പരാജയം ഏറ്റുവാങ്ങിയെങ്കിലും നിരൂപകർക്കിടയില്‍ ചിത്രം മികച്ച അഭിപ്രായം നേടിയിരുന്നു.
മുംബൈ: അജയ് ദേവ്ഗൺ, പ്രിയാമണി, ഗജരാജ് റാവു എന്നിവർ അഭിനയിച്ച സ്പോർട്സ് ബയോപിക് മൈതാന്‍ ജൂൺ 5 മുതൽ ആമസോൺ പ്രൈം വീഡിയോയിൽ സ്ട്രീം ചെയ്യാൻ ആരംഭിച്ചു. ഏപ്രിൽ 10 ന് തിയേറ്ററിൽ റിലീസ് ചെയ്ത മൈതാന്‍ രണ്ട് മാസത്തിന് ശേഷമാണ് ഡിജിറ്റൽ റിലീസ് ചെയ്യുന്നത്.
സീ സ്റ്റുഡിയോസ്, ബോണി കപൂർ, അരുണാവ ജോയ് സെൻഗുപ്ത, ആകാശ് ചൗള എന്നിവർ ചേർന്ന് നിർമ്മിച്ച ഈ ചിത്രം സംവിധാനം ചെയ്തിരിക്കുന്നത് ദേശീയ അവാർഡ് ജേതാവായ ചലച്ചിത്ര നിർമ്മാതാവ് അമിത് ശർമ്മയാണ്. "ഇന്ത്യയുടെ ഫുട്ബോളിലെ ഏറ്റവും മികച്ച കാലഘട്ടത്തിന്‍റെ കഥ" എന്ന് അടിക്കുറിപ്പോടെയാണ് ഡിജിറ്റല്‍ റിലീസ് വിവരം ആമസോണ്‍ പ്രൈം വീഡിയോ കഴിഞ്ഞ ദിവസം അറിയിച്ചത്.
തീയറ്ററില്‍ ചിത്രം വലിയ പരാജയം ഏറ്റുവാങ്ങിയെങ്കിലും നിരൂപകർക്കിടയില്‍ ചിത്രം മികച്ച അഭിപ്രായം നേടിയിരുന്നു. ഐഎംഡിബിയിൽ ചിത്രത്തിന് 8.2/10 റേറ്റിംഗ് ലഭിച്ചിരുന്നു. ഒടിടി റിലീസിലൂടെ ചിത്രത്തിന് ഓണ്‍ലൈന്‍ പ്രേക്ഷകരെ ലഭിക്കും എന്നാണ് പ്രതീക്ഷിക്കുന്നത്.
മൈതാന്‍ ഇന്ത്യൻ ഫുട്ബോൾ പരിശീലകനായിരുന്ന സയ്യിദ് അബ്ദുൾ റഹീമിന്‍റെ ജീവിതകഥയാണ്. ഇദ്ദേഹം കോച്ചിംഗ് നല്‍കിയ ഇന്ത്യന്‍ ഫുട്ബോള്‍ ടീം 1952 മുതൽ 1962 വരെയുള്ള കാലഘട്ടത്തില്‍ പല ഗംഭീര നേട്ടങ്ങളും ഇന്ത്യന്‍ ഫുട്ബോളിന് നല്‍കിയിരുന്നു. ഈ കാലഘട്ടം ഇന്ത്യൻ ഫുട്ബോളിന്‍റെ സുവര്‍ണ്ണകാലം എന്നാണ് ഇന്നും വിശേഷിപ്പിക്കപ്പെടുന്നത്.
1962 ലെ ഏഷ്യൻ ഗെയിംസിൽ ഇന്ത്യന്‍ ഫുട്ബോള്‍ ടീം വിജയികളായത് ചിത്രത്തില്‍ കാണിക്കുന്നുണ്ട്. ഇന്ത്യന്‍ ഫുട്ബോളിലെ അക്കാലത്തെ സൂപ്പര്‍താരങ്ങളെ ചിത്രത്തില്‍ ആവിഷ്കരിക്കുന്നുണ്ട്.
തമിഴ് സിനിമയെ കൈപിടിച്ചുയര്‍ത്തിയ 'സുന്ദരി പ്രേതങ്ങള്‍': ഇനി ഒടിടി റിലീസിന്, റിലീസ് ഡേറ്റായി
ഷാരൂഖ്, രണ്‍ബീര്‍ ചിത്രങ്ങളെ മലര്‍ത്തിയടിച്ച് പെണ്‍പട; ക്രൂ ഒടിടിയിലും വിസ്മയം തീര്‍ക്കുന്നു !