179 റണ്‍സ് വിജയലക്ഷ്യവുമായി ബാറ്റിംഗിനെത്തിയ ലഖ്നൗ പവര്‍ പ്ലേയില്‍ തന്നെ എല്ലാം പിഴച്ചു. 5.3 ഓവറില്‍ മൂന്നിന് 29 എന്ന നിലയിലായി അവര്‍. ക്വിന്റണ്‍ ഡി കോക്ക് (7), ആയുഷ് ബദോനി (0), കെ എല്‍ രാഹുല്‍ (10) എന്നിവര്‍ പവലിയനില്‍ തിരിച്ചെത്തി.
മുംബൈ: നിര്‍ണായക മത്സരത്തില്‍ ലഖ്നൗ സൂപ്പര്‍ ജയന്റ്‌സിനെ തോല്‍പ്പിച്ച രാജസ്ഥാന് റോയല്‍സ് ഐപിഎല്‍ പ്ലേ ഓഫിനരികെ. മുംബൈ ബ്രാബോണ്‍ സ്‌റ്റേഡിയത്തില്‍ 24 റണ്‍സിനായിരുന്നു സഞ്ജുവിന്റേയും സംഘത്തിന്റേയും ജയം. ടോസ് നേടി ബാറ്റിംഗിനെത്തിയ രാജസ്ഥാന് നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 178 റണ്‍സാണ് നേടിയത്. മറുപടി ബാറ്റിംഗില്‍ ലഖ്‌നൗവിന് എട്ട് വിക്കറ്റ് നഷ്ടത്തില്‍ 154 റണ്‍സെടുക്കാനാണ് സാധിച്ചത്. ട്രന്റ് ബോള്‍ട്ട്, പ്രസിദ്ധ് കൃഷ്ണ, ഒബെദ് മക്കോയ് രണ്ട് വിക്കറ്റ് വീതമെടുത്തു. ജയത്തോടെ രാജസ്ഥാാനും ലഖ്‌നൗവിനും 13 മത്സരങ്ങളില്‍ 16 പോയിന്റായി. എന്നാല്‍ രാജസ്ഥാനാണ് രണ്ടാമത്. കുറഞ്ഞ റണ്‍റേറ്റുള്ള ലഖ്നൌ മൂന്നാമതാണ്. കൊല്‍ക്കത്തയ്‌ക്കെതിരെയാണ് ലഖ്‌നൗവിന്റെ അവസാന മത്സരം. രാജസ്ഥാന് ചെന്നൈ സൂപ്പര്‍ കിംഗ്‌സാണ് എതിരാളി.
179 റണ്‍സ് വിജയലക്ഷ്യവുമായി ബാറ്റിംഗിനെത്തിയ ലഖ്നൗ പവര്‍ പ്ലേയില്‍ തന്നെ എല്ലാം പിഴച്ചു. 5.3 ഓവറില്‍ മൂന്നിന് 29 എന്ന നിലയിലായി അവര്‍. ക്വിന്റണ്‍ ഡി കോക്ക് (7), ആയുഷ് ബദോനി (0), കെ എല്‍ രാഹുല്‍ (10) എന്നിവര്‍ പവലിയനില്‍ തിരിച്ചെത്തി. പിന്നീട് ക്രീസില്‍ ഒത്തുചേര്‍ന്ന ദീപക് ഹൂഡ (39 പന്തില്‍ 59), ക്രുനാല്‍ പാണ്ഡ്യ (23 പന്തില്‍ 25) എന്നിവരാണ് തകര്‍ച്ച ഒിവാക്കിയത്. ഇരുവരും 65 റണ്‍സ് കൂട്ടിചേര്‍ത്തു. എന്നാല്‍ പാണ്ഡ്യയെ പുറത്താക്കി അശ്വിന്‍ ബ്രേക്ക് ത്രൂ നല്‍കി. അധികം വൈകാതെ ഹൂഡയും മടങ്ങി. ജേസണ്‍ ഹോള്‍ഡര്‍ (1), ദുഷ്മന്ത ചമീര (0) എന്നിവരും മടങ്ങിയതോടെ ലഖ്നൗ പരാജയമുറിപ്പിച്ചു. മാര്‍കസ് സ്റ്റോയിനിസ് (17 പന്തില്‍ 27) ശ്രമിച്ചെങ്കിലും ഫലമുണ്ടായില്ല. മുഹ്‌സിന്‍ ഖാന്‍ (9), ആവേഷ് ഖാന്‍ (1) പുറത്താവാതെ നിന്നു. യൂസ്‌വേന്ദ്ര ചാഹല്‍, ആര്‍ അശ്വിന്‍ എന്നിവര്‍ക്ക് ഓരോ വിക്കറ്റുണ്ട്.
undefined
നേരത്തെ, 29 പന്തില്‍ 41 റണ്‍സെടുത്ത യഷസ്വി ജയ്‌സ്വാളാണ് രാജസ്ഥാന്റെ ടോപ് സ്‌കോറര്‍. ദേവ്ദത്ത് പടിക്കല്‍ (18 പന്തില്‍ 39), സഞ്ജു സാംസണ്‍ (24 പന്തില്‍ 32) എന്നിവരും ഭേദപ്പെട്ട പ്രകടനം പുറത്തെടുത്തു. രവി ബിഷ്ണോയ് രണ്ട് വിക്കറ്റെടുത്തു. മോശം തുടക്കമാണ് രാജസ്ഥാന് ലഭിച്ചത്. മൂന്നാം ഓവറില്‍ തന്നെ ജോസ് ബട്‌ലറെ (2) നഷ്ടമായി. ആവേഷ് ഖാനെ സ്‌കൂപ്പ് ചെയ്യാനുള്ള ചെയ്യാനുള്ള ശ്രമത്തില്‍ വിക്കറ്റ് തെറിച്ചു. പിന്നാലെ ക്രീസിലെത്തിയ സഞ്ജു പതിയെ നിയന്ത്രണം ഏറ്റെടുത്തു. ജയ്‌സ്വാളിനൊപ്പം 64 റണ്‍സ് കൂട്ടിചേര്‍ക്കാന്‍ സഞ്ജുവിനായി. എന്നാല്‍ ജേസണ്‍ ഹോള്‍ഡറുടെ പന്തില്‍ അനാവശ്യ ഷോട്ടിന് ശ്രമിച്ച് ഡീപ്പ് പോയിന്റില്‍ ദീപക് ഹൂഡയ്ക്ക് ക്യാച്ച് നല്‍കി.
സഞ്ജു പുരത്താവുമ്പോള്‍ സ്‌കോര്‍ബോര്‍ഡില്‍ 75 റണ്‍സുണ്ടായിരുന്നു. പിന്നാലെ രണ്ട് റണ്‍സ് കൂടി കൂട്ടിചേര്‍ത്ത് ജയ്‌സ്വാളും പവലിയനില്‍ തിരിച്ചെത്തി. പാര്‍ട്ട് ടൈം സ്പിന്നറായ ആയുഷ് ബദോനിക്കെതിരെ കൂറ്റന്‍ ഷോട്ടിന് ശ്രമിച്ചപ്പോള്‍ പിഴിച്ചു. വായുവില്‍ പൊന്തിയ പന്ത് ബദോനിയുടെ കയ്യില്‍ തന്നെ വിശ്രമിച്ചു. ആറ് ഫോറും ഒരു സിക്‌സും അടങ്ങുന്നതായിരുന്നു ജയ്‌സ്വാളിന്റെ ഇന്നിംഗ്‌സ്. തുടര്‍ന്ന് ക്രീസിലെത്തിയ ദേവ്ദത്ത് പതിവിന് വിപരീതമായി ആക്രമിച്ച് കളിച്ചു. കേവലം 18 പന്തുകള്‍ മാത്രം നേരിട്ട ദേവ്ദത്ത് രണ്ട് സിക്‌സിന്റേയും അഞ്ച് ഫോറിന്റേയും പിന്‍ബലത്തിലാണ് 39 റണ്‍സെടുത്തത്. എന്നാല്‍ രവി ബിഷ്ണോയ് ദേവ്ദത്തിന്റെ ഇന്നിംഗ്‌സ് അവസാനിപ്പിച്ചു.
റിയാന്‍ പരാഗിനെയും (16 പന്തില്‍ 17) ബിഷ്ണോയ് മടക്കി. ജയിംസ് നീഷാം (12 പന്തില്‍ 14) റണ്ണൗട്ടാവുകയും ചെയ്തതോടെ രാജസ്ഥാന് ആറിന് 152 എന്ന നിലയിലായി. അവസാന ഓവറുകളില്‍ ആര്‍ അശ്വിന്‍ (10), ട്രന്റ് ബോള്‍ട്ട് (17) എന്നിവരാണ് പൊരുതാവുന്ന സ്‌കോറിലേക്ക് നയിച്ചത്. ഇരുവരും 26 റണ്‍സെടുത്തു.
രണ്ട് മാറ്റവുമായിട്ടാണ് രാജസ്ഥാന് ഇറങ്ങിയത്. ജയിംസ് നീഷം, ഒബെഡ് മക്കോയ് എന്നിവര്‍ ടീമിലെത്തി. കുല്‍ദീപ് സെന്‍, റാസി വാന്‍ ഡര്‍ സെന്‍ എന്നിവര്‍ പുറത്തായി. ലഖ്നൗ ഒരു മാറ്റം വരുത്തി. കരണ്‍ ശര്‍മയ്ക്ക് പകരം രവി ബിഷ്ണോയ് ടീമിലെത്തി.
ലഖ്നൗ സൂപ്പര്‍ ജയന്റ്‌സ്: ക്വിന്റണ്‍ ഡി കോക്ക്, കെ എല്‍ രാഹുല്‍, ദീപക് ഹൂഡ, മാര്‍കസ് സ്റ്റോയിനിസ്, ക്രുനാല്‍ പാണ്ഡ്യ, ആയുഷ് ബദോനി, ജേസണ്‍ ഹോള്‍ഡര്‍, ദുഷ്മന്ത ചമീര, രവി ബിഷ്ണോയ്, ആവേഷ് ഖാന്‍, മുഹ്‌സിന്‍ ഖാന്‍.
രാജസ്ഥാന് റോയല്‍സ്: യഷസ്വി ജെയ്്‌സ്വാള്‍, ജോസ് ബട്‌ലര്‍, സഞ്ജു സാംസണ്‍, ദേവ്ദത്ത് പടിക്കല്‍, റാസി വാന്‍ ഡര്‍ ഡസ്സന്‍, റിയാന്‍ പരാഗ്, ആര്‍ അശ്വിന്‍, ട്രന്റ് ബോള്‍ട്ട്, പ്രസിദ്ധ് കൃഷ്ണ, യൂസ്‌വേന്ദ്ര ചാഹല്‍, കുല്‍ദീപ് സെന്‍.