നാലാം ദിനം 11 പന്തുകളുടെ ഇടവേളയില്‍ മൂന്ന് വിക്കറ്റുകള്‍ വീഴ്ത്തിയ ജസ്പ്രീത് ബുമ്രയാണ് ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നത്
മെല്‍ബണ്‍: മെല്‍ബണ്‍ ക്രിക്കറ്റ് ടെസ്റ്റില്‍ ഇന്ത്യക്കെതിരെ ഓസ്ട്രേലിയയുടെ ലീഡ് 200 കടന്നു. 91 റണ്‍സെടുക്കുന്നതിനിടെ ആറ് വിക്കറ്റ് നഷ്ടമായി പ്രതിരോധത്തിലായി ഓസ്ട്രേലിയയെ ഭാഗ്യത്തിന്‍റെ പിന്തുണയോടെ ക്രീസില്‍ പിടിച്ചു നില്‍ക്കുന്ന മാര്‍നസ് ലാബുഷെയ്നും പാറ്റ് കമിന്‍സും ചേര്‍ന്ന് നാലാം ദിനം ചായക്ക് പിരിയുമ്പോള്‍ കൂടുതല്‍ നഷ്ടങ്ങളില്ലാതെ 135 റണ്‍സിലെത്തിച്ചു. ഖവാജയെ തുടക്കത്തില്‍ കൈവിട്ട യശസ്വി ജയ്സ്വാള്‍ പിന്നീട് മാര്‍നസ് ലാബുഷെയ്നിനെയും പാറ്റ് കമിന്‍സിനെയും കൈവിട്ടത് ഇന്ത്യക്ക് തിരിച്ചടിയായി. 65 റണ്‍സുമായി ലാബുഷെയ്നും 21 റണ്‍സോടെ പാറ്റ് കമിന്‍സും ക്രീസിലുണ്ട്. നാലു വിക്കറ്റ് കൈയിലിരിക്കെ ഓസ്ട്രേലിയക്കിപ്പോള്‍ 240 റണ്‍സിന്‍റെ ആകെ ലീഡുണ്ട്. ഇന്ത്യക്കായി ജസ്പ്രീത് ബുമ്ര നാലു വിക്കറ്റെടുത്തു.
നാലാം ദിനം 11 പന്തുകളുടെ ഇടവേളയില്‍ മൂന്ന് വിക്കറ്റുകള്‍ വീഴ്ത്തിയ ജസ്പ്രീത് ബുമ്രയാണ് ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നത്. സാം കോണ്‍സ്റ്റാസിനെ ക്ലീന്‍ ബൗള്‍ഡാക്കി വിക്കറ്റ് വേട്ട തുടങ്ങിയ ബുമ്ര പിന്നീട് ട്രാവിസ് ഹെഡിനെയും മിച്ചല്‍ മാര്‍ഷിനെയും അലക്സ് ക്യാരിയെയും പുറത്താക്കിയാണ് ഓസീസിന്റെ നടുവൊടിച്ചത്. സ്റ്റീവ് സ്മിത്തിനെയും ഉസ്മാന്‍ ഖവാജയെയും സിറാജും വീഴ്ത്തി.
ഖവാജയും(21) കോണ്‍സ്റ്റാസും(8) വീണശേഷം സ്മിത്തും ലാബുഷെയ്നും ചേര്‍ന്ന് ഓസീസിനെ 80 റണ്‍സിലെത്തിച്ചശേഷമായിരുന്നു ബുമ്ര ഓസീസിനെ എറിഞ്ഞിട്ടത്. ആദ്യം സ്മിത്തിനെ (13) മുഹമ്മദ് സിറാജ് റിഷഭ് പന്തിന്‍റെ കൈകളിലെത്തിച്ചു. തൊട്ടടുത്ത ഓവറില്‍ രണ്ട് വിക്കറ്റുകള്‍ ബുമ്ര നേടി. ട്രാവിസ് ഹെഡിനെയും (1), മിച്ചല്‍ മാര്‍ഷിനെയുമാണ് (0) ബുമ്ര തിരിച്ചയച്ചത്. അടുത്ത ഓവറില്‍ അലക്സ് ക്യാരിയേയും (2) ബുമ്ര ബൗള്‍ഡാക്കി. ഇതോടെ ആറിന് 91 എന്ന നിലയിലായി ഓസീസ്. എന്നാല്‍ പിന്നീട് ലാബുഷെയ്നിന്‍റെയും കമിന്‍സിന്‍റെയും ക്യാച്ചുകള്‍ ജയ്സ്വാള്‍ കൈവിട്ടു. കമിന്‍സ് നല്‍കിയ ദുഷ്കരമായൊരു ക്യാച്ച് ഓടിപ്പിടിക്കാന്‍ നിതീഷ് കുമാര്‍ റെഡ്ഡിക്കുമായില്ല.
വിജയ് ഹസാരെ ട്രോഫി: ഇഷാന്ത് ശർമക്ക് മുന്നില്‍ അടിതെറ്റി വീണ് കേരളം; ഡല്‍ഹിക്കെതിരെയും തോല്‍വി
നേരത്തെ ഓസീസിന്റെ ഒന്നാം ഇന്നിംഗ്‌സ് സ്‌കോറായ 474നെതിരെ ഇന്ത്യ 369ന് പുറത്തായിരുന്നു. ഒമ്പതിന് 358 എന്ന നിലയിലാണ് ഇന്ത്യ നാലാം ദിനം ക്രീസിലെത്തിയത്. സെഞ്ചുറി നേടിയ നിതീഷ് കുമാര്‍ റെഡ്ഡിക്ക് (114) അധികനേരം ക്രീസില്‍ തുടരാനായില്ല. വ്യക്തിഗത സ്‌കോറിനോട് ഒമ്പത് റണ്‍സ് കൂടി കൂട്ടിചേര്‍ത്ത് നിതീഷ് മടങ്ങി. മുഹമ്മദ് സിറാജ് (4) പുറത്താവാതെ നിന്നു. ഓസീസിന് വേണ്ടി ലിയോണ്‍, പാറ്റ് കമ്മിന്‍സ്, സ്‌കോട്ട് ബോളണ്ട് എന്നിവര്‍ മൂന്ന് വിക്കറ്റുകള്‍ വീതം വീഴ്ത്തി.
ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക