എസ്‌യുവി വിപണിയിൽ തങ്ങളുടെ സ്ഥാനം ശക്തിപ്പെടുത്തുന്നതിനായി, അടുത്ത രണ്ട് വർഷത്തിനുള്ളിൽ വിൽപ്പനയ്‌ക്കെത്തുന്ന പുതിയ മോഡലുകളുടെ ഒരു ശ്രേണി കമ്പനി ആസൂത്രണം ചെയ്തിട്ടുണ്ട്.
ഇന്ത്യയിലെ സ്‌പോർട്‌സ് യൂട്ടിലിറ്റി വെഹിക്കിൾ (എസ്‌യുവി) സെഗ്‌മെൻ്റിലേക്ക് കടക്കാൻ ആദ്യം വൈകിയെങ്കിലും രാജ്യത്തെ ജനപ്രിയ വാഹന ബ്രാൻഡായ മാരുതി സുസുക്കി, കഴിഞ്ഞ രണ്ട് വർഷങ്ങളായി ഈ മേഖലയിൽ വൻ വളർച്ചയാണ് കൈവരിച്ചത്. കഴിഞ്ഞ സാമ്പത്തിക വർഷത്തിൻ്റെ മൂന്നാം പാദത്തിൽ മികച്ച എസ്‌യുവി നിർമ്മാതാക്കളായി മാരുതി സുസുക്കി മാറി. 2023 സാമ്പത്തിക വർഷത്തിന്‍റെ നാലാം പാദത്തിൽ മഹീന്ദ്രയ്ക്ക് ഒന്നാം സ്ഥാനം നഷ്‍ടമായി. ഇപ്പോൾ, എസ്‌യുവി വിപണി വിഹിതത്തിൻ്റെ 22 ശതമാനത്തിൽ നിന്ന് 50 ശതമാനം പിടിച്ചെടുക്കാനാണ് മാരുതി സുസുക്കി ലക്ഷ്യമിടുന്നത്. എസ്‌യുവി വിപണിയിൽ തങ്ങളുടെ സ്ഥാനം ശക്തിപ്പെടുത്തുന്നതിനായി, അടുത്ത രണ്ട് വർഷത്തിനുള്ളിൽ വിൽപ്പനയ്‌ക്കെത്തുന്ന പുതിയ മോഡലുകളുടെ ഒരു ശ്രേണി കമ്പനി ആസൂത്രണം ചെയ്തിട്ടുണ്ട്.
മാരുതി സുസുക്കിയിൽ നിന്നുള്ള ആദ്യത്തെ ഇലക്ട്രിക് ഓഫറായിരിക്കും മാരുതി ഇവിഎക്സ്. ഇത് 2025 മാർച്ചോടെ വിപണിയിൽ എത്തും. 60kWh ബാറ്ററി പാക്കും ഏകദേശം 550km റേഞ്ചും ഉള്ള ഒരു ഹൈ-സ്പെസിഫിക്കേഷൻ ഇലക്ട്രിക് എസ്‌യുവിയായിരിക്കും ഇത്. ടൊയോട്ടയുടെ 27PL സ്കേറ്റ്‌ബോർഡ് പ്ലാറ്റ്‌ഫോമിനെ അടിസ്ഥാനമാക്കിയുള്ളതാണ് ഈ മോഡൽ. ഏകദേശം 4.3 മീറ്റർ നീളമുണ്ടാകും ഈ കാറിന്. ഇവിഎക്‌സിൻ്റെ റീബാഡ്‍ജ് ചെയ്‌ത പതിപ്പ് ടൊയോട്ടയും അവതരിപ്പിക്കും. ഇത് സുസുക്കി മോട്ടോർ ഗുജറാത്തിൻ്റെ ഹൻസൽപൂർ പ്ലാൻ്റിൽ നിർമ്മിക്കും.
മഹീന്ദ്ര XUV700, MG ഹെക്ടർ പ്ലസ്, ടാറ്റ സഫാരി തുടങ്ങിയ കാറുകൾക്ക് വെല്ലുവിളി ഉയർത്താൻ മാരുതി സുസുക്കി മൂന്നുവരി എസ്‌യുവി സെഗ്‌മെൻ്റിലേക്കും കടക്കും. Y17 എന്ന കോഡ്‌നാമമുള്ള ഈ മോഡൽ ഗ്രാൻഡ് വിറ്റാര എസ്‌യുവിയെ അടിസ്ഥാനമാക്കിയുള്ളതായിരിക്കും. അതിൻ്റെ പ്ലാറ്റ്‌ഫോം, ഫീച്ചറുകൾ, ഡിസൈൻ ഘടകങ്ങൾ, പവർട്രെയിനുകൾ എന്നിവ സഹോദര മോഡലുകളുമായി പങ്കിടും. മാരുതി സുസുക്കിയുടെ പുതിയ ഖാർഖോഡ പ്ലാന്‍റ് പുതിയ മാരുതി സെവൻ സീറ്റർ എസ്‌യുവിയുടെ പ്രൊഡക്ഷൻ ഹബ്ബായി പ്രവർത്തിക്കും. ഇതിൻ്റെ പ്രൊഡക്ഷൻ പതിപ്പ് 2025ൽ നിരത്തിലെത്താൻ സാധ്യതയുണ്ട്.
ടാറ്റ പഞ്ചിൻ്റെ ആധിപത്യത്തെ വെല്ലുവിളിക്കാൻ, മാരുതി സുസുക്കി 2026-ൽ ഒരു പുതിയ മൈക്രോ എസ്‌യുവിയും അവതരിപ്പിക്കും. വിലയിലും സ്ഥാനനിർണ്ണയത്തിലും, ഇത് ബ്രെസ്സയ്ക്ക് താഴെ സ്ഥാനം പിടിക്കുകയും ഇഗ്നിസിനൊപ്പം വിൽക്കുകയും ചെയ്യും. നിലവിൽ, പുതിയ മാരുതി മൈക്രോ എസ്‌യുവിയുടെ വിശദാംശങ്ങൾ വളരെ കുറവാണ്. എങ്കിലും, ഇതിന് സ്വിഫ്റ്റിൻ്റെ പുതിയ 1.2L, 3-സിലിണ്ടർ Z-സീരീസ് പെട്രോൾ എഞ്ചിനും ലഭിക്കുമെന്ന് സ്ഥിരീകരിക്കാത്ത റിപ്പോര്‍ട്ടുകൾ ഉണ്ട്.