കാർ വാങ്ങാൻ പോകുന്നെങ്കിൽ പ്ലീസ് വെയിറ്റ്, വരുന്നൂ ഇന്ത്യയിലെ ഏറ്റവും ചെറിയ ഇലക്ട്രിക്ക് എസ്‍യുവി!

കിയ തങ്ങളുടെ പുതിയ ഇലക്ട്രിക് എസ്‌യുവി, സിറോസ് ഇവി, ഇന്ത്യയിൽ പുറത്തിറക്കാൻ ഒരുങ്ങുന്നു. ഈ വാഹനം ടാറ്റ നെക്‌സോൺ ഇവി, മഹീന്ദ്ര XUV400 ഇവി, എംജി വിൻഡ്‌സർ ഇവി എന്നിവയ്‌ക്ക് വെല്ലുവിളി ഉയർത്തും. ഏകദേശം 450 കിലോമീറ്റർ റേഞ്ചും മികച്ച സവിശേഷതകളുമായിരിക്കും ഇതിന്റെ പ്രത്യേകത.

2025 ലെ നിക്ഷേപക ദിനത്തിൽ കിയ അടുത്തിടെ തങ്ങളുടെ ദീർഘകാല ആഗോള ഉൽപ്പന്ന തന്ത്രം പ്രഖ്യാപിച്ചു . സെൽറ്റോസ് ഹൈബ്രിഡ് ഉൾപ്പെടെ ആഗോള, ഇന്ത്യൻ വിപണികൾക്കായി ഒന്നിലധികം ഇലക്ട്രിക് വാഹനങ്ങളും ഹൈബ്രിഡ് വാഹനങ്ങളും പദ്ധതിയിൽ ഉൾപ്പെടുത്തിയിട്ടുണ്ട്. ദക്ഷിണ കൊറിയൻ വാഹന നിർമ്മാതാവ് ഇന്ത്യയ്ക്കായി രണ്ട് മാസ് മാർക്കറ്റ് ഇലക്ട്രിക് കാറുകളും സ്ഥിരീകരിച്ചിട്ടുണ്ട്. കാരൻസ് ഇവിയും സിറോസ് ഇവിയും. ആദ്യത്തെ മോഡൽ ജൂണിൽ റോഡുകളിൽ എത്തുമെന്ന് പ്രതീക്ഷിക്കുന്നു. രണ്ടാമത്തേത് 2026 ന്റെ ആദ്യ പാദത്തിൽ എത്താൻ സാധ്യതയുണ്ട്.

ടാറ്റ നെക്‌സോൺ ഇവിക്കും മഹീന്ദ്ര XUV400 ഇവിക്കും വെല്ലുവിളി ഉയർത്തുന്ന കിയ സിറോസ് ഇവിയും ഉടനെത്തും. ഇത് ബ്രാൻഡിൽ നിന്നുള്ള ഏറ്റവും ചെറിയ ഇലക്ട്രിക് എസ്‌യുവി ആയിരിക്കും. വിലയുടെ കാര്യത്തിൽ, നിലവിൽ ഈ വിഭാഗത്തിൽ ആധിപത്യം പുലർത്തുന്ന എംജി വിൻഡ്‌സർ ഇവിയുമായും ഇത് മത്സരിക്കും. കിയയുടെ അനന്തപൂർ നിർമ്മാണ കേന്ദ്രത്തിൽ ഈ പുതിയ ഇവി ഉൽപ്പാദിപ്പിക്കും. കിയയുടെ ഏറ്റവും ചെറിയ ഇലക്ട്രിക് എസ്‌യുവിയെക്കുറിച്ച് ഇതുവരെ നമുക്കറിയാവുന്ന എല്ലാ പ്രധാന വിവരങ്ങളും ഇതാ.

ഹ്യുണ്ടായിയുടെ K2 പ്ലാറ്റ്‌ഫോമിന്റെ പരിഷ്‌ക്കരിച്ച പതിപ്പിലാണ് സിറോസ് ഇവി രൂപകൽപ്പന ചെയ്തിരിക്കുന്നത്. ചില ഇവി ഘടകങ്ങൾ ഉപയോഗിക്കുന്നതിനാൽ  കാഴ്ചയിൽ, അതിന്റെ ഐസിഇ എതിരാളിയിൽ നിന്ന് അല്പം വ്യത്യസ്തമായിരിക്കും ഇത്. ഔദ്യോഗിക വിശദാംശങ്ങൾ ഇപ്പോൾ ലഭ്യമല്ല. എങ്കിലും ഇലക്ട്രിക് എസ്‌യുവിയിൽ ഒരു ക്ലോസ്ഡ്-ഓഫ് ഗ്രിൽ, പുതുക്കിയ ബമ്പറുകൾ, പുതുതായി രൂപകൽപ്പന ചെയ്ത അലോയ് വീലുകൾ, 'EV' ബാഡ്‍ജുകൾ എന്നിവ ഉണ്ടാകുമെന്ന് പ്രതീക്ഷിക്കുന്നു.

ഇന്റീരിയർ ലേഔട്ടും സവിശേഷതകളും ഐസിഇ പതിപ്പിൽ പ്രവർത്തിക്കുന്ന സിറോസിന് സമാനമായിരിക്കും. എങ്കിലും, എസ്‌യുവിയുടെ ഇലക്ട്രിക് പതിപ്പിൽ ഡിജിറ്റൽ ഇൻസ്ട്രുമെന്റ് ക്ലസ്റ്ററിൽ ചില ഇവി ഗ്രാഫിക്‌സ് ഉണ്ടായിരിക്കാൻ സാധ്യതയുണ്ട്. ഡ്യുവൽ-പാളി പനോരമിക് സൺറൂഫ്, ഫ്രണ്ട് വെന്റിലേറ്റഡ് സീറ്റുകൾ, ക്ലൈമറ്റ് കൺട്രോളിനായി 5 ഇഞ്ച് ടച്ച്‌സ്‌ക്രീൻ, 8-സ്പീക്കർ ഹർമൻ കാർഡൺ സിസ്റ്റം, 64 കളർ ആംബിയന്റ് ലൈറ്റിംഗ്, 12.3 ഇഞ്ച് എച്ച്ഡി ടച്ച്‌സ്‌ക്രീൻ, 4.2 ഇഞ്ച് എംഐഡി, മുന്നിലും പിന്നിലും യാത്രക്കാർക്കായി സി-ടൈപ്പ് യുഎസ്ബി ചാർജർ, ക്രൂയിസ് കൺട്രോൾ, ലെവൽ 2 എഡിഎഎസ് തുടങ്ങിയവ ഫീച്ചർ പട്ടികയിൽ ഉൾപ്പെടും. നിലവിൽ, അതിന്റെ പവർട്രെയിൻ സവിശേഷതകളെ കുറിച്ച് ഔദ്യോഗിക വിവരങ്ങളൊന്നുമില്ല. എങ്കിലും, കിയ സിറോസ് ഇവിക്ക് പൂർണ്ണമായി ചാർജ് ചെയ്താൽ ഏകദേശം 450 കിലോമീറ്റർ റേഞ്ച് വാഗ്ദാനം ചെയ്യുമെന്ന് പ്രതീക്ഷിക്കുന്നു.