വരാനിരിക്കുന്ന 2022 സ്കോഡ കൊഡിയാക് ഫെയ്‌സ്‌ലിഫ്റ്റിന്റെ നിർമ്മാണം കമ്പനി തുടങ്ങിയതായി റിപ്പോര്‍ട്ട്.
2022 ജനുവരിയിൽ കൊഡിയാക്ക് എസ്‍യുവിയുടെ (Kodiaq) ഫെയ്‌സ്‌ലിഫ്റ്റ് അവതരിപ്പിക്കാന്‍ ഒരുങ്ങുകയാണ് ചെക്ക് വാഹന നിര്‍മ്മാതാക്കളായ സ്കോഡ (Skoda). ഇപ്പോഴിതാ വരാനിരിക്കുന്ന 2022 സ്കോഡ കൊഡിയാക് ഫെയ്‌സ്‌ലിഫ്റ്റിന്റെ നിർമ്മാണം കമ്പനി തുടങ്ങിയതായി റിപ്പോര്‍ട്ട്.
കമ്പനിയുടെ മഹാരാഷ്ട്രയിലെ ഔറംഗബാദ് ആസ്ഥാനമായുള്ള കേന്ദ്രത്തിൽ പുത്തന്‍ കോഡിയാക്കിന്‍റെ നിര്‍മ്മാണം ആരംഭിച്ചതായി ഇന്ത്യാ കാര്‍ ന്യൂസ് റിപ്പോര്‍ട്ട് ചെയ്യുന്നു. എസ്‌യുവിക്ക് പുറത്തും ക്യാബിനിലും ധാരാളം ഡിസൈൻ, എയറോഡൈനാമിക് മെച്ചപ്പെടുത്തലുകൾ ലഭിച്ചിട്ടുണ്ടെന്ന് വാഹന നിർമ്മാതാവ് പറയുന്നു. ആഗോളതലത്തിൽ പ്രശസ്തമായ MQB പ്ലാറ്റ്‌ഫോമിനെ അടിസ്ഥാനമാക്കി, 7-സീറ്റർ എസ്‌യുവിക്ക് പുതിയ 2.0L ടർബോ പെട്രോൾ എഞ്ചിൻ നൽകും.
undefined
പുതിയ പതിപ്പ് വരുന്നതോടെ ഡീസൽ എഞ്ചിൻ മോഡൽ നിരയിൽ നിന്ന് ഒഴിവാക്കപ്പെടും. അതായത്, കോഡിയാക് ഇനി പെട്രോൾ എൻജിൻ മാത്രമേ നൽകൂ. ഇത് 2.0 ലിറ്റർ ശേഷിയുള്ള ടർബോചാർജ്ഡ്, നാല് സിലിണ്ടർ യൂണിറ്റായിരിക്കും. എഞ്ചിന് 190 പിഎസ് പരമാവധി കരുത്തും 320 എൻഎം പീക്ക് ടോർക്കും ഉത്പാദിപ്പിക്കാൻ കഴിയും. ഏഴ് സ്‍പീഡ് DSG ഡ്യുവൽ-ക്ലച്ച് ഓട്ടോമാറ്റിക് ഗിയർബോക്‌സായിരിക്കും ട്രാന്‍സ്‍മിഷന്‍.
സ്കോഡ ഒക്ടാവിയ, ഫോക്‌സ്‌വാഗൺ ടിഗ്വാൻ ഓൾസ്‌പേസ്, സ്കോഡ സൂപ്പർബ്, ഔഡി ക്യൂ2 എന്നിവയിൽ കരുത്ത് പകരുന്നത് ഇതേ എഞ്ചിനാണ്. ഇതിന് മുമ്പ് 150 PS പരമാവധി കരുത്തും 340 Nm പീക്ക് ടോർക്കും ഉൽപ്പാദിപ്പിക്കുന്ന 2.0-ലിറ്റർ TDI ഡീസൽ എഞ്ചിൻ കോഡിയാക് വാഗ്ദാനം ചെയ്‍തിരുന്നു. AWD (ഓൾ-വീൽ ഡ്രൈവ്) സിസ്റ്റത്തിൽ എസ്‌യുവി ലഭ്യമാകും.
പുതിയ വാഹനത്തിന്‍റെ ഇന്റീരിയറിലും ചെറിയ മാറ്റങ്ങൾ വരുത്തും. പുതിയ 2022 സ്കോഡ കൊഡിയാക്ക് ഫെയ്‌സ്‌ലിഫ്റ്റ് ടു-സ്‌പോക്ക് സ്റ്റിയറിംഗ് വീൽ (ഫോക്‌സ്‌വാഗൺ ടൈഗൺ എസ്‌യുവിയിൽ കണ്ടത് പോലെ), പുതിയ സീറ്റ് ഡിസൈനുകൾ, ഇലക്‌ട്രിക്കലി അഡ്ജസ്റ്റ് ചെയ്യാവുന്ന ലെതർ എർഗണോമിക്‌സ് സീറ്റുകൾ എന്നിവയുമായാണ് വരുന്നത്.
ആഗോള മോഡലിന് സമാനമായി, നിലവിലുള്ള 8 ഇഞ്ച് യൂണിറ്റിന് പകരം ഇന്ത്യ-സ്പെക്ക് മോഡലിന് വലിയ 9.2 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം ലഭിച്ചേക്കാം. സ്കോഡയുടെ 10.25 ഇഞ്ച് വെർച്വൽ കോക്ക്പിറ്റ് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഓട്ടോമാറ്റിക് ക്ലൈമറ്റ് കൺട്രോൾ, 10 സ്പീക്കർ കാന്റൺ ഓഡിയോ സിസ്റ്റം, ആംബിയന്റ് ലൈറ്റിംഗ് തുടങ്ങിയ സവിശേഷതകൾ നിലവിലുള്ള മോഡലിൽ നിന്ന് മുന്നോട്ട് കൊണ്ടുപോകും.
പുത്തന്‍ കോഡിയാക്കിന്‍റെ ഡിസൈനിനെയും സ്റ്റൈലിംഗിനെയും കുറിച്ച് പറയുകയാണെങ്കിൽ, പുതിയ കൊഡിയാക് നിലവിലെ ഡിസൈനും അളവുകളും നിലനിർത്തും. എന്നിരുന്നാലും, മുൻവശത്ത് ശ്രദ്ധേയമായ മാറ്റങ്ങൾ വരുത്തും. പുതുതായി രൂപകൽപ്പന ചെയ്‍ത ഗ്രിൽ, പുതിയ എൽഇഡി മാട്രിക്സ് ഹെഡ്‌ലാമ്പുകൾ, പുതുക്കിയ ബമ്പർ എന്നിവ എസ്‌യുവിയിൽ ഉണ്ടാകും. പുതിയ സെറ്റ് അലോയ് വീലുകൾ ലഭിച്ചേക്കും. സൈഡ് പ്രൊഫൈൽ വലിയ മാറ്റമില്ലാതെ തുടരും. പിൻഭാഗത്ത്, പുതിയ ടെയിൽലാമ്പുകളും ചെറുതായി ട്വീക്ക് ചെയ്‍ത ബമ്പറും ഉൾക്കൊള്ളും.
പുതുക്കിയ കൊഡിയാക് എസ്‌യുവി 2022 ജനുവരിയിൽ ഇന്ത്യയിൽ പുറത്തിറങ്ങുമെന്ന് സ്കോഡ നേരത്തെ സ്ഥിരീകരിച്ചിരുന്നു. കമ്പനിയുടെ ഡയറക്ടർ സാക് ഹോളിസ് ആണ് ഇക്കാര്യം അടുത്തിടെ വ്യക്തമാക്കിയത്. ഈ സമയം, ബ്ലാക്ക് ഫ്രണ്ട് ഗ്രിൽ, ബ്ലാക്ക് റൂഫ് റെയിലുകൾ, ബ്ലാക്ക് ഒആർവിഎം, വിൻഡോ തുടങ്ങിയ ഘടകങ്ങൾ ഉൾക്കൊള്ളുന്ന സ്‌പോർട്ട്‌ലൈൻ ട്രിമ്മിലും എസ്‌യുവി എത്തിയേക്കും. ട്രിം, കറുത്ത അലോയ് വീലുകൾ, ഒരു കറുത്ത പിൻ സ്‌പോയിലർ തുടങ്ങിയവ സ്പോര്‍ട്ട്ലൈന്‍ ട്രിമ്മിന് ലഭിക്കും.
CKD അഥവാ കംപ്ലീറ്റ്ലി നോക്ഡ് ഡൗൺ യൂണിറ്റായാണ് കോഡിയാക് ഇന്ത്യയിലെത്തുന്നത്. വാഹനത്തിന്‍റെ വില ഏകദേശം 34 ലക്ഷം രൂപ മുതൽ ആരംഭിക്കുമെന്ന് പ്രതീക്ഷിക്കുന്നു. ഫോക്‌സ്‌വാഗൺ ടിഗ്വാൻ, എംജി ഗ്ലോസ്റ്റർ, ടൊയോട്ട ഫോർച്യൂണർ, വരാനിരിക്കുന്ന ജീപ്പ് മെറിഡിയൻ എന്നിവയ്‌ക്കെതിരെയാണ് സ്കോഡ കൊഡിയാക്ക് മത്സരിക്കുന്നത്.