ഇപ്പോഴിതാ ഇന്ത്യൻ ഇലക്ട്രിക് വാഹന ഉടമകളുടെ മനസ് തുറന്നുകാണിക്കുകയും ഇന്ത്യയിലെ ഇവി വിപണിയുടെ ഭാവിയെക്കുറിച്ച് ഒരു ചോദ്യചിഹ്നം ഉയർത്തുകയും ചെയ്‍തിരിക്കുകയാണ് ഒരു സർവ്വേ റിപ്പോര്‍ട്ട്. ഇന്ത്യയിലെ 51 ശതമാനത്തിലധികം ഇലക്ട്രിക് വാഹന ഉടമകൾ പെട്രോൾ അല്ലെങ്കിൽ ഡീസൽ വാഹനങ്ങളിലേക്ക് മടങ്ങാൻ ആഗ്രഹിക്കുന്നുവെന്നാണ് അടുത്തിടെ നടത്തിയ ഒരു പഠനം കണ്ടെത്തിയത്
കഴിഞ്ഞ കുറച്ച് വർഷങ്ങളായി, പുതിയ കാർ വാങ്ങുന്നവർക്കിടയിൽ ഇവികൾ, അതായത് ഇലക്ട്രിക് വാഹനങ്ങളുടെ കുതിപ്പാണ്. കഴിഞ്ഞ ഏതാനും മാസങ്ങളായി കാർ വിൽപ്പനയിലും അതിൻ്റെ സ്വാധീനം കണ്ടു. രാജ്യത്തെ മുൻനിര ഓട്ടോമൊബൈൽ നിർമ്മാതാക്കളായ ടാറ്റ മോട്ടോഴ്‌സ് ഇവി സെഗ്‌മെൻ്റിൻ്റെ നേതാവായി മാറിയിരിക്കുന്നു. എന്നാൽ കഴിഞ്ഞ ജൂലൈയിൽ ടാറ്റയ്ക്കും കനത്ത തിരിച്ചടി നേരിട്ടു. ഇപ്പോഴിതാ ഇന്ത്യൻ ഇലക്ട്രിക് വാഹന ഉടമകളുടെ മനസ് തുറന്നുകാണിക്കുകയും ഇന്ത്യയിലെ ഇവി വിപണിയുടെ ഭാവിയെക്കുറിച്ച് ഒരു ചോദ്യചിഹ്നം ഉയർത്തുകയും ചെയ്‍തിരിക്കുകയാണ് ഒരു സർവ്വേ റിപ്പോര്‍ട്ട്. ഇന്ത്യയിലെ 51 ശതമാനത്തിലധികം ഇലക്ട്രിക് വാഹന ഉടമകൾ പെട്രോൾ അല്ലെങ്കിൽ ഡീസൽ വാഹനങ്ങളിലേക്ക് മടങ്ങാൻ ആഗ്രഹിക്കുന്നുവെന്നാണ് അടുത്തിടെ നടത്തിയ ഒരു പഠനം കണ്ടെത്തിയതെന്ന് ഇക്കണോമിക്ക് ടൈംസ് റിപ്പോര്‍ട്ട് ചെയ്യുന്നു.
ഏകദേശം 1.5 കോടി കാറുകളും 25,000-ലധികം ഇ-കാർ ഉടമകളും ഹോസ്റ്റുചെയ്യുന്ന ഒരു പ്ലാറ്റ്‌ഫോമായ പാർക്ക് പ്ലസ് നടത്തിയ സർവേയാണ് ഈ അമ്പരപ്പിക്കുന്ന വിവരം പുറത്തുവിട്ടത്. ഇന്ത്യൻ നഗരങ്ങളിലെ പാർപ്പിട, വാണിജ്യ പരിസരങ്ങളിൽ പാർക്കിംഗ് സൊല്യൂഷനുകൾ നൽകുന്ന പ്ലാറ്റ് ഫോമാണ് പാർക്ക് പ്ലസ്. ഇന്ത്യയിലെ മൊത്തം 51 ശതമാനം ഇവി കാർ ഉടമകൾ പെട്രോൾ അല്ലെങ്കിൽ ഡീസൽ വാഹനങ്ങൾ വീണ്ടും ഉപയോഗിക്കാൻ ആഗ്രഹിക്കുന്നുവെന്ന് സർവ്വേ വ്യക്തമാക്കുന്നു. ദില്ലി, മുംബൈ, ബംഗളൂരു എന്നിവിടങ്ങളിലെ ഇവി കാർ ഉടമകളിലാണ് ഈ സർവേ നടത്തിയത്. ഈ പഠനം ഇന്ത്യയിലെ വികസിച്ചുകൊണ്ടിരിക്കുന്ന ഇലക്ട്രിക് വെഹിക്കിൾ (ഇവി) വിപണിയിലെ ഇ-കാർ ഉടമകളുടെ മാനസികാവസ്ഥ മനസ്സിലാക്കാൻ ശ്രമിച്ചു. ഐസിഇ കാർ ഉടമകളെ അപേക്ഷിച്ച് ഇ-കാർ ഉടമകൾ പൊതുവെ സംതൃപ്തിയുടെ അളവ് കുറവാണ്. 4W EV ഉടമകളിൽ 51 ശതമാനം പേരും മറ്റൊരു ഇവി വാങ്ങുന്നത് പരിഗണിക്കുന്നില്ലെന്നും പകരം ഐസിഇ വാഹനങ്ങളിലേക്ക് മടങ്ങാൻ താൽപ്പര്യപ്പെടുന്നതായും സർവേ വെളിപ്പെടുത്തുന്നു.
undefined
ശരാശരി, പരമ്പരാഗത ഐസിഇ (പെട്രോൾ-ഡീസൽ) വാഹന ഉടമകളെ അപേക്ഷിച്ച് ഇലക്ട്രിക് വാഹന ഉടമകൾ സംതൃപ്തരല്ലെന്ന് സർവേ റിപ്പോർട്ട് പറയുന്നു. ഇതിനായി ഇലക്ട്രിക് കാറുകളുമായി ബന്ധപ്പെട്ട വിവിധ തരത്തിലുള്ള ദൈനംദിന പ്രശ്നങ്ങൾ പലരും ചൂണ്ടിക്കാട്ടുന്നു. ഇതിൽ, ചാർജ്ജിംഗ് ഇൻഫ്രാസ്ട്രക്ചർ, മെയിൻ്റനൻസ്, റേഞ്ച് ഉത്കണ്ഠ, പുനർവിൽപ്പന മൂല്യം, ഉയർന്ന വില തുടങ്ങി നിരവധി വശങ്ങൾ എടുത്തുകാണിച്ചിരിക്കുന്നു.
ഈ റിപ്പോർട്ട് അനുസരിച്ച്, 88 ശതമാനം ആളുകൾ കാർ ചാർജ് ചെയ്യുന്നതിനുള്ള സൗകര്യത്തെക്കുറിച്ച് ആശങ്ക പ്രകടിപ്പിച്ചിട്ടുണ്ട്. രാജ്യത്തുടനീളം 20,000-ലധികം ഇവി ചാർജിംഗ് സ്റ്റേഷനുകൾ ഉണ്ടെങ്കിലും ഈ സർവേയിൽ പ്രതികരിച്ചവർ ഈ ചാർജിംഗ് സ്റ്റേഷനുകളുടെ പ്രവേശനക്ഷമതയിലും സുതാര്യതയിലും നിരാശ പ്രകടിപ്പിച്ചു. സുരക്ഷിതവും സജീവവുമായ ചാർജിംഗ് സ്റ്റേഷൻ കണ്ടെത്തുന്നത് വലിയ വെല്ലുവിളിയായി തുടരുമെന്ന് മിക്ക ആളുകളും പറയുന്നു.
പെട്രോൾ-ഡീസൽ വാഹനങ്ങളെ അപേക്ഷിച്ച് ഇലക്ട്രിക് കാറുകൾക്ക് പാ‍ർട്‍സുകൾ കുറവാണെന്ന് മുൻനിര ഇവി കാർ കമ്പനികളും തുടർച്ചയായി അവകാശപ്പെടുന്നുണ്ട്. ഇതുമൂലം തേയ്മാനം കുറയുകയും അറ്റകുറ്റപ്പണികൾ എളുപ്പമാക്കുകയും ചെയ്യുന്നു. എന്നാൽ ഈ സർവേ അവകാശപ്പെടുന്നത് ഏകദേശം 73 ശതമാനം ഇലക്ട്രിക് കാർ ഉടമകൾ അറ്റകുറ്റപ്പണികൾ ഒരു പ്രധാന പ്രശ്നമായി കാണുന്നുണ്ട് എന്നാണ്. അവരുടെ അഭിപ്രായത്തിൽ, അവരുടെ ഇലക്ട്രിക് വാഹനങ്ങൾ പലപ്പോഴും "ഒരു ബ്ലാക്ക് ബോക്സ്" പോലെയാണ് അനുഭവപ്പെടുന്നത് എന്നാണ്. അതായത് ചെറിയ പ്രശ്നങ്ങൾ പോലും പരിഹരിക്കാൻ പ്രാദേശിക മെക്കാനിക്കുകൾക്ക് കഴിയുന്നില്ല എന്നതാണ് ഏറ്റവും വലിയ പ്രശ്‍നമെന്നും പല ഉടമകളും ചൂണ്ടിക്കാട്ടുന്നു. പല ഇലക്ട്രിക് കാർ ഉടമകളും റിപ്പയർ ഷോപ്പ് ഓപ്ഷനുകളുടെ അഭാവത്തിലും അറ്റകുറ്റപ്പണി ചെലവ് സംബന്ധിച്ച് വ്യക്തമായ വിവരങ്ങൾ ഇല്ലാത്തതിലും നിരാശ പ്രകടിപ്പിച്ചു.
ഈ സർവേയിൽ ഇലക്ട്രിക് വാഹനങ്ങളുടെ പുനർവിൽപ്പന മൂല്യവും ഒരു വലിയ പ്രശ്നമായി ഉയർന്നുവന്നിട്ടുണ്ട്. നിലവിലുള്ള ഇലക്ട്രിക് കാറിൻ്റെ പുനർവിൽപ്പന മൂല്യം പരിശോധിച്ചപ്പോൾ പ്രതീക്ഷിച്ചതിലും വളരെ കുറഞ്ഞ തുകയാണ് വാഗ്ദാനം ചെയ്തതെന്ന് ഏകദേശം 33 ശതമാനം പേർ പ്രതികരിച്ചു. മറ്റ് പെട്രോൾ-ഡീസൽ വാഹനങ്ങളുടെ പുനർവിൽപ്പന മൂല്യം അവയുടെ മേക്ക് മോഡൽ, മൈലേജ് അല്ലെങ്കിൽ റണ്ണിംഗ് കാലയളവ് എന്നിവയെ അടിസ്ഥാനമാക്കി എളുപ്പത്തിൽ കണക്കാക്കാം. എന്നാൽ ഇലക്ട്രിക് വാഹനങ്ങളുടെ കാര്യം അങ്ങനെയല്ല, കാരണം എല്ലാവർക്കും ഇവികൾ പരിചിതമല്ല എന്നതും ബാറ്ററി ലൈഫിൻ്റെ അടിസ്ഥാനത്തിൽ അവയുടെ റീസെയിൽ മൂല്യം നിർണ്ണയിക്കുന്നത് അൽപ്പം ബുദ്ധിമുട്ടുള്ള കാര്യവുമാണ്. വാഹനത്തിൻ്റെ മൊത്തം വിലയുടെ ഏകദേശം 40 ശതമാനം ആണ് ഏതൊരു ഇവിയുടെയും ബാറ്ററിയുടെ വില.
ടാറ്റയുടെ നെക്‌സോൺ ഇവിയാണ് ജനങ്ങൾക്കിടയിൽ ഏറ്റവും പ്രശസ്തമായതെന്നും ഈ സർവേ റിപ്പോർട്ടിൽ പറഞ്ഞിട്ടുണ്ട്. ഏകദേശം 61 ശതമാനം ആളുകൾ ഈ എസ്‌യുവിക്ക് വോട്ട് ചെയ്തു. 19 ശതമാനം ആളുകൾ ടാറ്റ പഞ്ച് ഇവിക്ക് രണ്ടാമത്തെ ചോയ്‌സായി വോട്ട് ചെയ്തു. ഇതിന് പുറമെ വിപണിയിൽ ലഭ്യമായ മറ്റ് മോഡലുകളും തിരഞ്ഞെടുത്തിട്ടുണ്ട്. ഏപ്രിൽ-ജൂൺ പാദത്തിൽ ഇലക്ട്രിക് കാറുകളുടെ വിൽപ്പനയിൽ പ്രതിവർഷം ഏഴ് ശതമാനം ഇടിവുണ്ടായതായിട്ടാണ് റിപ്പോര്‍ട്ടുകൾ. അതേസമയം, ഇവി സെഗ്‌മെൻ്റിൻ്റെ ലീഡർ എന്ന് വിളിക്കപ്പെടുന്ന ടാറ്റ മോട്ടോഴ്‌സിൻ്റെ വിൽപ്പന കഴിഞ്ഞ ജൂലൈയിൽ 21% ഇടിഞ്ഞു. ജൂലൈയിൽ ആഭ്യന്തര വിപണിയിൽ മൊത്തം 5,027 ഇലക്ട്രിക് കാറുകളാണ് കമ്പനി വിറ്റഴിച്ചത്. കഴിഞ്ഞ വർഷം ജൂലൈയിൽ വിറ്റ 6,329 യൂണിറ്റുകളേക്കാൾ വളരെ കുറവാണ് ഇത്.
അതേസമയം ലോകത്തെ ഇലക്ട്രിക്ക് കാർ ഉടമകളുടെ അതൃപ്‍തി വ്യക്തമാക്കുന്ന ഇത്തരമൊരു സർവ്വേ ഇതാദ്യമായിട്ടല്ല പുറത്തുവരുന്നത്. ഇലക്ട്രിക് കാർ വാങ്ങുന്ന പലരും അവരുടെ തിരഞ്ഞെടുപ്പിൽ സന്തുഷ്‍ടരല്ലെന്ന് യൂറോപ്പിൽ നിന്നും കഴിഞ്ഞ വർഷം വന്ന ഒരു സർവ്വേ റിപ്പോര്‍ട്ട് വ്യക്തമാക്കിയിരുന്നു. മൾട്ടിനാഷണൽ മാർക്കറ്റ് അനാലിസിസ് കൺസൾട്ടൻസിയായ യുഗോവുമായി സഹകരിച്ച്, ഇവി ചാർജിംഗ് സ്റ്റേഷനുകളിൽ സ്പെഷ്യലൈസ് ചെയ്‍ത ഒരു ഡാനിഷ് സ്റ്റാർട്ടപ്പായ മോണ്ട 2023ൽ ഫ്രാൻസിൽ നടത്തിയ ഒരു പഠനമായിരുന്നു ഈ അമ്പരപ്പിക്കുന്ന വിവരങ്ങള്‍ വെളിപ്പെടുത്തിയത്.
ഇവി വാങ്ങുന്നതിന് പകരം മറ്റൊരു തീരുമാനം എടുത്തിരുന്നെങ്കിൽ എന്ന് ആഗ്രഹിക്കുന്നുവെന്ന് ഈ സര്‍വ്വേയില്‍ പങ്കെടുത്ത ഭൂരിഭാഗം പേരും വെളിപ്പെടുത്തി. പല ഉടമകൾക്കും അവരുടെ വാങ്ങലിൽ സംശയമുണ്ടെന്നും 2023 ഓഗസ്റ്റിൽ പുറത്തുവന്ന ഈ സർവ്വേ വെളിപ്പെടുത്തിയത്. വൈദ്യുത വാഹനങ്ങളുടെ 54 ശതമാനം ഉടമകളും വൈദ്യുതി ചെലവ് വർധിച്ചതിനാൽ തങ്ങളുടെ വാങ്ങലിൽ ഖേദിക്കുന്നുവെന്ന് സമ്മതിച്ചതായും ഈ സർവ്വേ പറയുന്നു. മടുപ്പിക്കുന്ന മറ്റ് ഘടകങ്ങളിൽ സുതാര്യതയുടെ അഭാവം ഉൾപ്പെടുന്നു. അതായത് ഒരു ഇവി സ്വന്തമാക്കുന്നതിനുള്ള യഥാർത്ഥ ചെലവുകളുടെ സുതാര്യതയുടെ അഭാവമാണിത്. വാഹനം വാങ്ങിക്കഴിഞ്ഞ് മാത്രമേ യതാര്‍ത്ഥ ചെലവുകളെപ്പറ്റി അറിവുകിട്ടുന്നുള്ളൂവെന്ന് പലരും പറയുന്നു. മികച്ച നിരക്കുകൾ എവിടെയാണെന്ന് കണ്ടെത്താനുള്ള ബുദ്ധിമുട്ടും വിഘടിച്ച വിപണി കാരണം വിവിധ ആപ്പുകൾ ഡൗൺലോഡ് ചെയ്യേണ്ടതിന്റെ ആവശ്യകതയും വര്‍ദ്ധിച്ചതും പല വാഹന ഉടമകളെയും മടുപ്പിക്കുന്നു. റേഞ്ച് ഉത്കണ്ഠയും സാധാരണ പെട്രോൾ, ഡീസൽ കാറുകളേക്കാൾ വാങ്ങാൻ പൊതുവെ ചെലവേറിയതും കാരണം പല ഉടമകളും പുതുതായി ഇലക്ട്രിക് കാറുകൾ വാങ്ങുന്നവരെ നിരുത്സാഹപ്പെടുത്തുന്നു.